Buk blong Mosaea

1 Mo nao i nomo bin gat rao long ful graon blong Sarahemla, long medel blong evri pipol we oli blong king Benjamin, mekem se king Benjamin i bin gohed blong gat pis long ol dei blong laef blong hem we i stap.

2 Mo i bin hapen se hem i gat tri boe; mo hem i singaotem ol nem blong olgeta Mosaea, mo Heloram, mo Hileman. Mo hem i mekem se oli mas tijim olgeta long evri lanwis blong ol papa blong hem blong bifo, mekem se, tru long samting ia, bae oli save kam ol man blong haremsave samting; blong mekem se oli save kasem ol samting long saed blong ol profesi we oli bin kamaot long maot blong ol papa blong olgeta blong bifo, we i bin kam long olgeta tru long han blong Lod.

3 Mo tu, hem i bin tijim olgeta long saed blong ol histri we oli bin raetem long ol buk we oli bin mekem wetem bras, mo hem i talem se: “Ol boe blong mi. Mi wantem se bae yufala i mas tingbaot se, sapos yumi no gat ol buk ia we oli holem ol histri mo ol komanmen ia, bae yumi safa from bae yumi no save wan samting, go kasem naoia, from bae yumi no save ol sikret blong God.

4 From i no save hapen se papa blong yumi, Lihae, i save tingbaot evri samting ia, blong hem i save tijim olgeta long ol pikinini blong hem, sapos i no bin gat help blong ol buk ia; from oli tijim hem long lanwis blong Ol Man Ijip, from hemia, hem i save ridim ol raeting ia, mo hem i save tijim olgeta long ol pikinini blong hem, mekem se tru long wei ia, oli save tijim olgeta raeting ia long ol pikinini blong olgeta. Mo taem oli mekem olsem, oli mekem ol komanmen blong God oli hapen, i kam kasem taem naoia.

5 Mi talem long yufala, ol boe blong mi. Sapos yumi no bin gat ol raeting ia, we han blong God i bin holemtaet mo sevem gud blong yumi save ridim mo save long ol sikret blong hem, mo gat ol komanmen blong hem oltaem long fored blong ae blong yumi, iven bae ol papa blong yumi bae oli kam slak from oli lusum bilif. Mo bae yumi kam olsem ol brata blong yumi, Ol Man blong Leman, we oli no save wan samting long saed blong ol samting ia, o iven, oli no bilivim olgeta taem oli tijim olgeta long ol samting ia, from ol kastom blong ol papa blong olgeta blong bifo, we oli no stret.

6 O, ol boe blong mi. Mi wantem se bae yufala i mas tingbaot se ol toktok ia oli tru, mo tu, ol histri ia oli tru. Mo luk, ol buk blong Nifae tu, we oli holem ol histri mo ol toktok blong ol papa blong yumi blong bifo stat long taem we oli bin lego Jerusalem kasem naoia, mo oli tru; mo yumi save kasem stret se oli tru from yumi gat olgeta long fored blong ae blong yumi.

7 Mo nao, ol boe blong mi. Mi wantem se yufala i mas tingbaot blong luklukgud long olgeta raeting ia wetem strong tingting, blong mekem se yufala i save kasem gud save long wei ia. Mo mi wantem se bae yufala i obei long ol komanmen blong God, blong yufala i save kam antap gud long graon folem ol promes we Lod i bin mekem long ol papa blong yumi blong bifo.”

8 Mo king Benjamin i tijim olgeta boe blong hem long plante moa samting we oli no raetem long buk ia.

9 Mo i bin hapen se afta we king Benjamin i bin stop blong tijim ol boe blong hem, nao hem i kam olfala mo hem i bin luk se kolosap bae hem i mas go long rod ia blong ded blong wol; from hemia, hem i ting se i gat nid blong hem i givim kingdom long wan long ol boe blong hem.

10 From hemia, hem i bin mekem Mosaea i kam long fored blong hem; mo hemia ol toktok we hem i bin talem long hem, i talem se: “Boe blong mi, mi wantem se bae yu mekem wan ofisol toktok truaot long ful graon ia long medel blong evri pipol ia, o ol pipol blong Sarahemla mo ol pipol blong Mosaea we oli stap long graon, se tru long toktok ia bae oli save kam tugeta; from long tumoro bae mi talemaot long olgeta ia, ol pipol blong mi, tru long maot blong mi, se yu yu wan king mo wan man blong rul ova long pipol ia, we Lod, God blong yumi i bin givim long yumi.

11 Mo antap long hemia, bae mi givim long pipol ia, wan nem, blong mekem se tru long nem ia, bae oli luksave gud olgeta aot long evri pipol ia we Lod God i bin tekem olgeta oli kamaot long graon blong Jerusalem; mo samting ia mi mekem from oli bin wan pipol we oli wok strong wetem strong tingting blong obei ol komanmen blong Lod.

12 Mo mi givim long olgeta, wan nem, we bae i neva lus, hemia nomo, sapos nomo oli brekem loa.

13 Yes, mo antap long hemia mi talem long yu se, sapos ol pipol ia we Lod i laekem olgeta tumas, oli foldaon long fasin blong brekem loa, mo kam wan nogud pipol mo wan pipol we i mekem adaltri, bae Lod i lego olgeta, mekem se long wei ia, oli kam slak olsem ol brata blong olgeta; mo bae hem i nomo sevem olgeta tru long paoa blong hem we i gudfala mo i bitim evri narafala paoa, olsem we hem i bin sevem ol papa blong yumi bifo.

14 From mi talem long yu, se sapos hem i no bin yusum paoa blong hem blong sevem ol papa blong yumi blong bifo, bae oli mas foldaon long han blong Ol Man blong Leman, mo bae oli harem nogud from bae oli fesem nogud filing blong Ol Man blong Leman.”

15 Mo i bin hapen se afta we king Benjamin i bin stop blong talem ol toktok ia long boe blong hem, hem i bin givim long boe blong hem wok blong lukaotem evri wok blong kingdom.

16 Mo antap long hemia, hem i givim wok tu long hem long saed blong ol histri we oli bin raetem long ol buk we oli bin mekem wetem bras; mo tu, ol buk blong Nifae; mo tu, naef blong faet blong Leban, mo bol o samting ia we i poenem rod, we i bin lidim ol papa blong yumi bifo tru long waelples, we han blong Lod i bin mekem rere mekem se tru long samting ia, i save lidim wanwan long olgeta folem fasin blong folem gud mo fasin blong wokhad oltaem, we oli bin givim long hem.

17 From hemia, taem we oli no bin fetful, oli no bin kam antap gud, o go fored long rod blong olgeta, be God i bin pusumbak olgeta, mo God i no bin glad nating long olgeta; mo from hemia, God i kilim olgeta wetem hadtaem blong kasem kaekae, mo ol hadtaem we i mekem olgeta oli harem nogud, blong mekem olgeta oli tingbaot wok blong olgeta.

18 Mo nao, i bin hapen se Mosaea i go mo i mekem olsem we papa blong hem i bin givim oda long hem, mo i talemaot long evri pipol we oli bin stap long graon blong Sarahemla, blong mekem se oli save kam tugeta blong go antap long tempol blong harem ol toktok we papa blong hem bae i talemaot long olgeta.