1 Nao i bin gat wan ples long Semlon we ol gel blong Ol Man blong Leman oli kam tugeta blong singsing, mo blong danis, mo blong mekem olgeta oli stap hapi.

2 Mo i bin hapen se i gat wan dei, wan smol namba blong olgeta oli kam tugeta blong singsing mo blong danis.

3 Mo nao ol pris blong king Noa, from oli sem blong gobak long bigtaon blong Nifae, yes, mo tu, oli fraet se ol pipol bae oli kilim olgeta i ded, nao, from hemia, oli bin fraet blong gobak long ol waef blong olgeta mo ol pikinini blong olgeta.

4 Mo afta we oli bin stap long waelples, mo afta we oli faenem ol gel blong Ol Man blong Leman, oli bin haed mo wajem olgeta;

5 Mo taem we i gat, be smol nomo long olgeta, we oli kam tugeta blong danis, oli kamkamaot long ol sikret ples blong olgeta, mo tekem olgeta mo karem olgeta i go long waelples; yes, twante mo fo long ol gel blong Ol Man blong Leman oli bin karem olgeta oli go long waelples.

6 Mo i bin hapen se taem we Ol Man blong Leman oli faenem se ol gel blong olgeta oli lus, oli kros long ol pipol blong Limhae, from oli ting se hem i ol pipol blong Limhae.

7 From hemia, oli bin sendem ami blong olgeta i go; yes, king tu, hemwan i go fastaem long ol pipol blong hem; mo oli go antap long graon blong Nifae blong prapa spolem gud ol pipol blong Limhae.

8 Mo nao Limhae i luk olgeta antap long taoa, mo tu, evri samting we oli stap mekem rere blong faet, hem i bin luk; from hemia, hem i tekem ol pipol blong hem oli kam tugeta, mo i wet long olgeta long ol plantesen mo long ol bus.

9 Mo i bin hapen se taem we Ol Man blong Leman oli kam antap, se ol pipol blong Limhae i stat blong foldaon long olgeta long ol ples we oli stap wet long hem, mo oli bin stat blong kilim olgeta i ded.

10 Mo i bin hapen se faet ia i stat blong kam rabis tumas, from oli faet olsem we ol laeon oli faet from kaekae blong olgeta.

11 Mo i bin hapen se ol pipol blong Limhae oli stat blong pusumbak bakegen Ol Man blong Leman long fored blong olgeta; be namba blong olgeta i no kasem haf blong ol namba blong Ol Man blong Leman. Be oli bin faet from laef blong olgeta, mo from ol waef blong olgeta, mo from ol pikinini blong olgeta; from hemia, oli yusum evri paoa blong olgeta mo oli faet olsem ol dragon.

12 Mo i bin hapen se oli faenem king blong Ol Man blong Leman long medel blong olgeta we oli ded; be hem i no ded, from hem i kasem kil mo oli livim hem i stap long graon, from ol pipol blong hem oli ronwe kwiktaem nomo.

13 Mo oli tekem hem mo putum bandej long ol kil blong hem, mo tekem hem i kam long fored blong Limhae, mo oli talem: “Luk, hemia king blong Ol Man blong Leman; from hem i bin kasem wan kil mo foldaon long medel blong ol dedman blong olgeta, mo oli livim hem; mo luk, mifala i tekem hem i kam long fored blong yu; mo nao, bae yumi kilim hem i ded”.

14 Be Limhae i bin talem long olgeta: “Bae yufala i no kilim hem i ded, be tekem hem i kam ia blong mi save luk hem”. Mo oli tekem hem i kam. Mo Limhae i talem long hem: “?From wanem nao yu bin kam antap blong faet agensem ol pipol blong mi? Luk, ol pipol blong mi oli no bin brekem strong promes ia we mi bin mekem long yu; nao, ?from wanem yu bin brekem strong promes we yu bin mekem long ol pipol blong mi?”

15 Mo nao king i bin talem se: “Mi brekem strong promes ia from ol pipol blong yu oli bin karem ol gel blong ol pipol blong mi oli go; from hemia, long kros blong mi, mi mekem se ol pipol blong mi oli kam antap blong mekem wo agensem ol pipol blong yu”.

16 Mo nao Limhae i no bin harem wan samting long saed blong samting ia; from hemia, hem i talem: “Bae mi lukaotem long medel blong ol pipol blong mi, mo huia man we i bin mekem samting ia, bae i ded”. From hemia, hem i mekem se oli lukaotem olgeta long medel blong ol pipol blong hem.

17 Nao taem we Gidion i bin harem ol samting ia, from we hem i kapten blong king, hem i go mo i talem long king: “Mi askem yu blong wet, mo no lukaotem long ol pipol ia, mo no blemem olgeta long samting ia.

18 From ?yu no tingbaot ol pris blong papa blong yu, we olgeta pipol ia oli lukaotem blong kilim olgeta oli ded? ?Mo i no olgeta ia we oli stap long waelples? ?Mo i no olgeta ia nao we oli bin stilim ol gel blong Ol Man blong Leman?

19 Mo nao, luk, mo talem long king abaot ol samting ia, blong mekem se hem i save talem long ol pipol blong hem blong oli save putumdaon kros blong olgeta long yumi; from luk, oli stat blong rere finis blong kam bakegen agensem yumi; mo luk tu, i gat smol nomo blong yumi.

20 Mo luk, oli kam wetem bigfala ami blong olgeta; mo hemia nomo, sapos king i no putum kros blong olgeta i kamdaon, yumi, yumi mas ded.

21 ?From nao, ol toktok blong Abinadae oli no bin hapen, we hem i profesae agensem yumi—mo evri samting ia, from yumi no bin wantem lisin long ol toktok blong Lod, mo tanem yumi long ol rabis fasin?

22 Mo naoia bae yumi mekem kros blong king i kamdaon, mo bae yumi mekem i hapen, strong promes ia, we yumi bin mekem wetem hem; from i moa gud se yumi stap olsem slef bitim we yumi lusum ol laef blong yumi; from hemia, bae yumi stopem fasin blong plante blad i ron”.

23 Mo nao Limhae i bin talem long king evri samting long saed blong papa blong hem, mo ol pris we oli ronwe i go long waelples, mo blemem olgeta blong stilim ol gel blong olgeta.

24 Mo i bin hapen se king i putumdaon kros blong hem long ol pipol blong hem; mo hem i bin talem long olgeta: “Bae yumi go blong mitim ol pipol blong mi, mo no holem ol tul blong faet; mo mi mekem promes long yufala wetem wan strongfala promes se bae ol pipol blong mi bae oli no kilimded ol pipol blong yu”.

25 Mo i bin hapen se oli folem king, mo oli go mo no holem ol tul blong faet blong mitim Ol Man blong Leman. Mo i bin hapen se oli mitim Ol Man blong Leman; mo king blong Ol Man blong Leman, hemwan bakegen i bodaon long fored blong olgeta, mo i askem strong long olgeta blong helpem ol pipol blong Limhae.

26 Mo taem we Ol Man blong Leman oli bin luk ol pipol blong Limhae, se oli no gat ol tul blong faet wetem olgeta, oli gat lav mo sore long olgeta mo oli putumdaon kros blong olgeta long olgeta, mo oli gobak wetem king blong olgeta wetem pis long graon blong olgeta bakegen.