1 Mo nao i bin hapen se Amon mo king Limhae i bin stat blong toktok wetem ol pipol long wei we bae oli mekem blong oli kamaot long fasin blong stap slef; mo tu, oli bin mekem se evri pipol oli mas kam tugeta long wan ples; mo oli bin mekem samting ia blong mekem se oli save harem voes blong ol pipol long saed blong samting ia.

2 Mo i bin hapen se oli no bin save faenem wan wei blong mekem olgeta oli kamaot long fasin blong stap slef, be nomo blong tekem ol woman blong olgeta mo ol pikinini blong olgeta, mo ol grup blong animol blong olgeta, mo ol buluk blong olgeta, mo ol tenet blong olgeta, mo aot i go long waelples; from Ol Man blong Leman oli bin plante tumas, hem i had tumas blong ol pipol blong Limhae blong faet wetem olgeta, oli tingting blong mekem olgeta oli go fri aot long fasin blong stap slef tru long naef blong faet.

3 Nao i bin hapen se Gidion i bin go mo i bin stanap long fored blong king, mo i bin talem long hem: “Nao, O king, yu bin lisin long ol toktok blong mi plante taem bifo taem we yumi bin stap faet wetem ol brata blong yumi, Ol Man blong Leman.

4 Mo nao O king, sapos yu no bin faenem mi olsem wan wokman we i blong nating, o sapos yu bin lisin bifo long ol toktok blong mi long eni pat, mo oli bin helpem yu, mi wantem tu se yu lisin long ol toktok blong mi long taem ia, mo bae mi wokman blong yu mo mekem ol pipol ia oli kamaot long fasin blong stap slef.”

5 Mo king i bin letem blong hem i toktok. Mo Gidion i bin talem long hem se:

6 “Luk, get we i stap biaen, we i go tru long wol we i stap biaen, long baksaed blong bigtaon. Ol Man blong Leman, o ol gadman blong Ol Man blong Leman, oli stap drong long naet; from hemia, bae yumi sendemaot wan toktok i go long evri pipol ia se bae oli karem i kam tugeta ol grup blong animol blong olgeta mo ol buluk, blong mekem se oli save tekem olgeta oli go long waelples long naet.

7 Mo bae mi go folem oda blong yu mo pem las takis blong waen long Ol Man blong Leman, mo bae oli drong; mo bae yumi go tru long sikret rod long lef saed blong kamp blong olgeta taem we oli drong mo slip.

8 Olsem ia nao bae yumi aot wetem ol woman blong yumi mo ol pikinini blong yumi, ol grup blong animol blong yumi, mo ol buluk blong yumi i go long waelples; mo bae yumi wokbaot go raonem graon blong Saelom.”

9 Mo i bin hapen se king i bin lisin long ol toktok blong Gidion.

10 Mo king Limhae i bin mekem se ol pipol blong hem i bin karem i kam tugeta ol grup blong animol blong olgeta; mo hem i bin sendem takis blong waen i go long Ol Man blong Leman; mo hem i bin sendem tu moa waen, olsem wan presen long olgeta; mo oli bin dring plante long waen we king Limhae i bin sendem long olgeta.

11 Mo i bin hapen se ol pipol blong king Limhae oli bin aot long naet i go long waelples wetem ol grup blong animol blong olgeta, mo ol buluk blong olgeta, mo oli bin go raonabaot graon blong Saelom long waelples, mo oli bin tanem rod blong olgeta i go long graon blong Sarahemla, from Amon mo ol brata blong hem i bin lidim olgeta.

12 Mo oli bin tekem evri gol blong olgeta, mo silva, mo ol gudgudfala samting blong olgeta, we oli bin save karem, mo tu, ol kaekae blong olgeta wetem olgeta, i go long waelples; mo oli gohed long wokbaot blong olgeta.

13 Mo afta oli bin spenem plante dei long waelples, oli bin kam long graon blong Sarahemla, mo oli bin joenem ol pipol blong Mosaea, mo oli bin kam pat blong ol pipol blong hem.

14 Mo i bin hapen se Mosaea i bin kasem olgeta wetem glad; mo hem i bin kasem ol histri blong olgeta tu, mo tu, ol histri we ol pipol blong Limhae oli bin faenem.

15 Mo nao i bin hapen se taem we Ol Man blong Leman oli bin faenemaot se ol pipol blong Limhae oli bin aot long graon long naet, mekem se oli bin sendem wan ami i go long waelples blong folem olgeta;

16 Mo afta we oli bin folem olgeta blong tu dei, oli nomo bin save folem trak blong olgeta; from hemia, oli lus long waelples.