Mosiah Binaaltsoos

1 Áádóó Mosiah bizhéʼé ádíílííł bidííniidę́ę yiʼiilaa, dóó kéyah tʼáá ałtsogo nahasneʼgo, diné tʼáá ałtsodę́ę́ʼ áłah silį́į́ʼ, áko Diyin God bighangóó dookaah áadi aláahdi naatʼáanii Benjamin bizaad yaa hodoolnihígíí deididootsʼį́į́ł biniiyé.

2 Dóó diné tʼóó ahayóí áłah silį́į́ʼ, tʼóó ahayóígíí biniinaa tʼáadoo dayííłtaʼ da; háálá ałʼąą nootʼį́į́ł dóó dabidziil daazlį́į́ʼ lá.

3 Dóó bilį́į́ʼ áłtsé naheezhchínígíí ałdóʼ ndayiizjaaʼ, áko kǫʼ bikááʼ náádahidoonih biniiyé Moses bibeehazʼáanii bikʼehgo;

4 Dóó ałdóʼ Bóhólníihii biDiyin God, Jerusalemdę́ę́ʼ chʼíbiníʼeezhígíí ahéheeʼ deididooniił, dóó beʼenaʼí danilínígíí yitsʼą́ą́dóó yisdádabííʼeezh, dóó diné tʼáá ákogi ádaatʼéii ndabinitin dooleełígíí yikʼidadiilniiʼ, dóó diné tʼáá ákogi átʼéii łaʼ aláahdi binaatʼáanii nilį́įgo ałdóʼ yikʼidadiilniiʼ, éí éiyá Zarahemla hazʼą́ągi kʼé hólǫ́ǫgo áyiilaa, dóó Diyin God bibeehazʼáanii yikʼeh dahółʼį́į doogo neineeztą́ą́ʼ, áko bił dahózhǫ́ǫ dooleeł dóó Diyin God dóó diné tʼáá ałtso ayóo daʼahóʼníi dooleeł biniiyé.

5 Áádóó Diyin God bighandi neheeskai, binaagóó biníbaal ndeiznil; diné tʼáá ałtso baʼáłchíní yił, díí éí beʼesdzáán, dóó beʼashiiké, dóó beʼátʼééké, dóó éí beʼashiiké dóó beʼátʼééké, alą́ąjįʼ naagháhígíí dóó akéeʼdi biʼdizhchį́įjįʼ, ałʼąą baʼáłchíní yił dah deíkáahgo.

6 Dóó tʼáá ałtso diné Diyin God bighan binaagóó biníbaal ndeiznil, chʼéʼétiinígíí Diyin God bighan bichʼįʼgo naaznil, áko, biníbaal tʼáá yiiʼ naháaztą́ągo aláahdi naatʼáanii Benjamin bichʼįʼ yáłtiʼgo tʼáá áádóó deididootsʼį́į́ł biniiyé;

7 Háálá diné tʼóó ahayóígíí biniinaa aláahdi naatʼáanii Benjamin Diyin God bighan tsé binázʼáhígíí biyiʼ tʼáá átʼé neidínóotįįłgo doo bíighah da, éí bąą wódahdi dah azką́ągo bá ályaa, áko áádóó diné saad yee yichʼįʼ hadoodzihígíí deididootsʼį́į́ł.

8 Áádóó dah azkánígíí yikááʼdóó bidineʼé yichʼįʼ yáʼniiłtiʼ; dóó diné tʼóó ahayóígíí biniinaa doo tʼáá átʼé dabidiiztsʼą́ąʼ da; éí bąą saad yee yáłtiʼígíí nááhádzoohgo bá ályaa áádóó diné tʼáadoo binééʼ deidiiztsʼą́ʼígíí nááháasdzooígíí yaa deiyiistsooz, áko éí ałdóʼ bizaad bił béédahodoozįįł biniiyé.

9 Dóó díí saad éí yee yááłtiʼ dóó nááháasdzo, kóníigo: Shikʼisóó danohłíinii, tʼáá ánółtso áłah dasoolį́ʼígíí, díí jį́ shizaad bee nihichʼįʼ hadeesdzihgo daʼdidoohtsʼį́łígíí; háálá saad bee hadeesdzihígíí doo tʼáá ádzaagóó baa ntsídoohkos biniiyé doo wóshdę́ę́ʼ nihidííniid da, ndi hazhóʼó dashíídóołtsʼįįł, dóó nihijaaʼ ąą ádaahłééh áko daʼdidoohtsʼį́į́ł, dóó nihijéí ałdóʼ áko akʼidadiʼdoohtį́į́ł, dóó nihíniʼ ałdóʼ áko Diyin God binaʼnitin tʼah doo bééhoozįįhígíí nihił ííshją́ą́ ádadoolnííł.

10 Shéédadoołdzííł éí doo biniiyé kojįʼ nihookááh nihidííniid da, dóó diné bitsʼíís biláahdi áníshtʼé tʼáadoo dashíínóhʼníní.

11 Ndi tʼáá nihígi áníshtʼé, ląʼída tʼáadoo leʼé shitsʼíís dóó shintsékees doo bee bidziil da; ákondi díí dineʼé shikʼi dadiilniiʼ, dóó shizhéʼé shikʼi sodoolzin, dóó Bóhólníihii shínítáahgo díí diné binantʼaʼí dóó aláahdi binaatʼáanii deeshłeeł biniiyé; dóó beʼadziilii doo yíneelʼáanii yee shaa áhályą́ dóó bee sézį́į ńtʼę́ę́ʼ, binahjįʼ adziilii, dóó ániʼ dóó atsxeʼ tʼáá átʼé Bóhólníihii sheiníláhígíí bee nihíká anáshwoʼ.

12 Ánihidishní nihíká anáshwoʼgo shiiyoołkáałgo shá ályaa, díí jį́įdi ndi nihíká anáshwoʼ, dóó béésh óola dóó béésh łigai dóó tʼáá ałtso daʼílíinii doo nihííníshkeed da;

13 Nááná doo éí awáalyaa anihiishníił da ńtʼę́ę́ʼ, doodao doo éí ahándaahłté bee hoséłʼą́ą da ńtʼę́ę́ʼ, doodao dóó doo éí ndaʼohłtseed da, éí doodago dóó atídaʼahołʼį́, éí doodago daʼnohʼįįh, éí doodago aa daʼdohłéego doo bee nihá hoséłʼą́ą da ńtʼę́ę́ʼ; doodao tʼáá ałtso bąąhági ádaatʼéii doo bee nihá hoséłʼą́ą da ńtʼę́ę́ʼ, dóó Bóhólníihii bibeehazʼáanii bikʼeh dahonołʼį́įgo bee nanihinétą́ą́ʼ, tʼáá ałtso ádadoohłííł nihidííniidígíí bee—

14 Dóó ndi shí, tʼáá shí, shílaʼ bee naashnishgo bee nihíká eeshwod, dóó doo éí ínáóltąʼí bee nihishjizh da ńtʼę́ę́ʼ, dóó tʼáadoo leʼé tʼáadoo ndaazgo nihichʼįʼ ndahwiiłná nihikʼi siláago íishłaa da—dóó díí tʼáá ałtso baa yááłtiʼii, díí jį́ tʼáá nihí nihił béédahoozin.

15 Ákondi, shikʼisóó danohłíinii, díí baa niséyáhígíí doo bee ádaa hashʼniih biniiyé íísdzaa da, doodao nihikʼíhodeeshʼaał éí doo díí biniiyé nihił hashneʼ da; ndi díí jį́įdi Diyin God bidááhdóó doo shiʼdiiłʼáhí da dooleeł biniiyé díí nihił bééhózingo nihił hashneʼ.

16 Jó, ánihidishní éí háálá nihíká anáshwoʼgo hinishná dííniidígíí, doo bee ádaa hashniihgo ádíshníi da, háálá Diyin God tʼéiyá bá naashnish ńtʼę́ę́ʼ.

17 Jó áádóó, díí bee nihił hashneʼ áko hódzą́ nihił béédahodoozįįł; áko bídahwiidoołʼááł diné bíká ańjílwoʼgo Diyin God tʼéiyá bíká ańjílwoʼ lá.

18 Jó, aláahdi nihinaatʼáanii dashidohní; dóó shí, aláahdi nihinaatʼáanii dashidohnínígíí éí, nihíká anáshwoʼgo nihinaashnish, áko doo hanii nihídóʼ ahíłká ańdaahłwoʼgo ndaahłnish da?

19 Jó áádóó ałdóʼ, shígo lá, aláahdi nihinaatʼáanii dashidohnínígíí, nihíká anáshwoʼgo shíiníłką́, dóó ákondi Diyin God bíká eeshwod, áko, ahéheeʼ dashididoohniił, O índa dooládóʼ shį́į́ tʼáá íiyisíí alááh yáʼąąshdi nihiNaatʼáanii ahéheeʼ dabidohníi da ńtʼę́ę́ʼ!

20 Shikʼisóó danohłíinii, ánihidishní, nihitsʼíís dóó nihiyiʼsizíinii tʼáá soozį́į́ ńtʼę́ę́ʼ bee niheʼadziilii tʼáá ałtsoní, Diyin God ánihiilaaígíí bichʼįʼ, ahééh danohsingo, dóó nihaa áhályą́ą́ ńtʼę́ʼígíí, dóó nihił dahózhǫ́, dóó yáʼátʼéehgo hashtʼehodítʼéego ahił kéédahohtʼį́įgo áyiilaa ndi—

21 Ánihidishní hodeeyáádą́ą́ʼ ánihiilaaígíí bíká anáhłwoʼgo, dóó tʼáá ákwíí jį́, níłchʼi bee hidohdziihígíí nihaa yiiléehgo, áko tʼáá nihí íinohsingo hinohnáá dóó nahohnáago ánihiilaaígíí, dóó tʼóó náhodiʼnaah nahohnánígíí yee nihíká análwoʼ—ádíshní, nihitsʼíís dóó nihiyiʼsizíinii tʼáá soozį́į́ ńtʼę́ę́ʼ bíká anáhłwoʼ ákondi doo ałtso bichʼįʼ nináʼdoohdléeł da.

22 Jó áádóó, íiyisíí nihitsʼą́ą́dóó yinízinígíí éiyá bibeehazʼáanii tʼéiyá bikʼeh honołʼį́į dooleeł nihóʼní; áádóó bibeehazʼáanii bikʼeh honołʼíigo éí kéyah bitsʼą́ą́dóó daʼohtʼį́įgo náás doohkah nihiłní; dóó yee haadzíʼígíí doo łahgo ánáyoodlíił da; éí bąą, bibeehazʼáanii bikʼeh dahonołʼį́įgo nihikʼihojídlíi dooleeł dóó binahjįʼ náásgóó daʼohtʼį́į doo.

23 Dóó kʼad, áłtsé éí, ánihiilaa, dóó niheʼiinaʼ niheinílá, áko éí éí bee nihąąh hayííłʼá.

24 Dóó naaki góneʼ, díí ádoohłííł ánihiłnínígíí biʼdoohłííł nihóʼní; áko éí éí biʼoohłaago, tʼáadoo hodinaʼí nihikʼijidlí; dóó éí bąą nihichʼįʼ naʼníláa dooleeł. Dóó tʼahdii nihąąh hayííłʼáa dooleeł; dóó tʼáá ákótʼé, dóó tʼáá ákónóhtʼée dooleeł, ahoolʼá dóó ahoyoolʼáágóó; éí bąą, haʼátʼíísh éí bee ádaa hohniih dooleeł?

25 Dóó kʼad nanihídíshkid, daʼ ádaásh hadoohdzih? Shí ánihidishníigo éí, Ndagaʼ. Nahasdzáán bikáaʼgi łeezhígi áníshtʼé didoohniił ndi doo bíighah da; ákondi nahasdzáán bikááʼ łeezhígíí bitsʼą́ą́dóó ánihiʼdiilyaa; jó ndi, ánihiilaaígíí éí díí tʼáá bí.

26 Dóó shí, azhą́ shí, aláahdi nihinaatʼáanii dashidohníi ndi, doo nihilááh áníshtʼée da; háálá shí ałdóʼ łeezh bitsʼą́ą́dóó hosélį́į́ʼ. Dóó dashinółʼį́ są́ biih yíyá, dóó kʼadę́ę díí shitsʼíís nahasdzáán amá nilíinii bichʼįʼ ánáshdlééh.

27 Éí bąą, nihíká eeshwod nihidííniid, doo haitʼáo da shíniʼ biʼdiiʼáago Diyin God bidááhdóó yisháał da, azhą́ ákótʼée ndi áłah wohłeeh nihidííniid, áko doo shikʼíhodootʼah da, nihibąąhági átʼéii doo shikʼijįʼ siláa da dooleeł, Diyin God beʼánihwiitʼaahdi sézį́įgo bee bindíílnish shiłnínę́ę yaa yáłtiʼgo.

28 Áłah wohłeeh nihidishní áko nihibąąhági ádaatʼéii doo shąąh siláa da dooleeł biniiyé, kʼadę́ę shitsʼíís náádiilyéego, áko kʼé hólǫ́ǫgo nááshidiʼdoolyééł, dóó shiiʼsizíinii doo daatsaahii wódahdi dahataałii bił Diyin God tʼáá ákogo aʼiiléí bichʼįʼ dahwiitaał dooleeł.

29 Dóó ałdóʼ nááná, nihinaʼnitiní, dóó aláahdi nihinaatʼáanii doo nishłį́į da dooleeł, nihidideeshniił biniiyé áłah wohłeeh nihidííniid;

30 Háálá azhą́ kʼad ndi, tʼáá íiyisíí shitah hoditłidgo nihichʼįʼ yáshtiʼ; ndi Bóhólníihii Diyin God shíká eelwod; dóó bíniʼ nihichʼįʼ hadeesdzihgo shá áyiilaa, dóó, shiyeʼ Mosiah, aláahdi nihinaatʼáanii dóó nihá nahaʼáanii nilį́į dooleeł, shiłníigo díí jį́ shichʼįʼ haadzííʼ.

31 Dóó kʼad, shikʼisóó danohłíinii, nagháídę́ę́ʼ dóó kojįʼ ádaʼoohłaaígíí tʼahdii tʼáá ádaołʼį́į doo dooleeł. Shibeehazʼáanii dóó shizhéʼé bibeehazʼáanii ałdóʼ bikʼeh dahonołʼį́į́ ńtʼę́ę́ʼ, dóó bee náásnoohkai, dóó éí bee tʼáadoo niheʼenaʼí danihisił da, áko shiyeʼ bibeehazʼáanii, éí doodago Diyin God bibeehazʼáanii, tʼáá bí nihaidooléełii bikʼeh dahonołʼį́įgo, kéyah bikááʼgóó náásdoohkah, dóó niheʼenaʼí doo nihilááhgóó bidziil da dooleeł.

32 Ndi, O shidineʼé danohłíinii, tʼáadoo ałchʼįʼ nihá dahachįʼí, dóó tʼáadoo iiʼsizį́ beʼiiníziinii bikʼeh honołʼíní; éí ałkʼidą́ą́ʼ shizhéʼé Mosiah yaa yááłtiʼ.

33 Jó áko, tʼáá háiida éí iiʼsizíinii yikʼeh hółʼį́į́shį́į́ tʼáá íiyisíí atíbidiʼdoolnííł; háálá éí yikʼeh hółʼį́įgo, dóó tʼáá ákótʼéego dóó bąąhági átʼéii tʼáadoo nahjįʼ áyiilaago ádin silį́įʼgo, tʼáá bí tíʼádiilyaa dooleeł; háálá yaa naayáhígíí biniinaa hoolʼáágóó tiʼhooʼnííh baa doolyééł, Diyin God bibeehazʼáanii kʼíinítiʼ, azhą́ bił bééhózin ndi.

34 Ánihidishní, doo éí łaʼ nihitah, tʼáadoo díí bee nabidiʼneestą́ąʼ da, tʼáá hazhóʼó nihaʼáłchíní yázhí tʼéiyá tʼáadoo nabidiʼneestą́ąʼ da, ndi nihiTaaʼ Yáʼąąshdi Hólóonii éí hoolʼáágóó nihąąh hayííłʼá, tʼáá ałtso bee hadinohtʼéhígíí dóó nihee hólóonii bichʼįʼ kóohłaa; dóó ndaʼasdzo Diyin God yá dahalneʼii ayóó náásgóígíí yaa dahalneʼ ałdóʼ bee ndanihidiʼneestą́ą́ʼ, tʼáá ńléí nihizhéʼé, Lehi, Jerusalemdę́ę́ʼ dah diiyáádę́ę́ʼ ndi.

35 Dóó danihizhéʼé yę́ę tʼáá ałtso kojįʼ yee hadahasdzíʼígííʼ ałdóʼ. Jó áádóó, Bóhólníihii ábidííniidígíí ałdóʼ, yee hadahasdzííʼ; éí bąą, éí éiyá tʼáá aaníí dóó tʼáá ákogi ádaatʼé.

36 Dóó kʼad, shí ánihidishní, shikʼisóó danohłíinii, díí tʼáá ałtso nihił béédahózin dóó bee ndanihidiʼneestą́ąʼgo, asoosiih dóó beehaʼoodzíiʼii bitsʼą́ą́jí soolį́įʼgo, Bóhólníihii biiʼSizíinii bitsʼą́ąjįʼ kódzaa dooleeł, áko ééhózingo nihiʼdoodlósę́ę nihiyiʼ ádin dooleeł áko nihikʼihojídlí, dóó náás doohááł dóó, nihaa áháyą́ą dooleełę́ę ádin dooleeł—

37 Ánihidishní, tʼáá háiida díí yeʼełʼínígíí, éí tʼáá bahatʼaadí Diyin God yikʼijįʼ nilį́; éí bąą iiʼsizį́ beʼiiníziinii éí yikʼeh hółʼį́, dóó tʼáá ałtsoní tʼáá ákogi ádaatʼéii yeʼanaʼí dooleeł; éí bąą, Bóhólníihii éí doo biiʼ hólǫ́ǫ da doo, háálá diné doo yáʼádaatʼéehii éí doo yiiʼ hólǫ́ǫ da.

38 Éí bąą diné beʼiinaʼ doo łahgo ánéídlééhgóó, dóó tʼáá Diyin God yeʼenaʼí nilį́įgo ádin silį́įʼgo, tʼáá ákogi átʼéego ánihwiitʼaah ayóó átʼéii hoolʼáágóó biyiʼsizíinii dóó bitsʼíís asiihígíí yaa ákonízingo chʼéébidoosił, éí Bóhólníihii doo yidáahjįʼ bíniʼgo ábidoolííł, dóó yínííł hwiinidzin, dóó neezgai, dóó yéigo achʼįʼ nahwiiʼná, kǫʼ doo nitséesii dóó hoolʼáágóó dookʼą́ąłii nahalingo biyiʼ hólǫ́ǫ dooleeł.

39 Dóó kʼad ánihidishní, éí hastiin éí ajoobaʼ doo bíká adoolwoł da; éí bąą tiʼhooʼnííh doo ninítʼiʼii bikʼijįʼ siláago akéeʼdi bee bá nihodootʼááł.

40 O, tʼáá ánółtso hastóí dasoolį́įʼii, dóó tsíłkéí ałdóʼ, dóó áłchíní yázhí shizaad bikʼi dadootʼą́ʼígíí áko bikʼidadiʼdoohtį́į́ł biniiyé doo nanitłʼahgóó nihichʼįʼ haasdzííʼ, diné doo yáʼátʼééh daazlį́ʼígíí béédadoohłnihgo chʼéédadoohdził biniiyé sodiszin.

41 Dóó ałdóʼ nááná, Diyin God bibeehazʼáanii yikʼeh dahółʼį́įgo bikʼidahojisdliʼ dóó bił dahóózhǫǫdígíí baa ntsídaahkees dooleeł. Jó áko, atsʼíís dóó iiʼsizíiniikʼehjí, tʼáá ałtsoní bee hootʼááłjí diyingo bikʼihojisdliʼ; dóó ádin daazlį́įʼjįʼ tʼah daʼoodlą́ągo yáʼąąsh góneʼ yah ahidookah, áko áadi ił hózhǫ́ doo ninítʼiʼii biyiʼ Diyin God yił kéédahatʼį́į dooleeł. O béédaohłniih, dóó béédaohłniih díí éí tʼáá aaníí ádaatʼé; háálá Bóhólníihii Diyin God éí yee haadzííʼ.