1 Ut anajwan, kik’ulman naq chirix naq li rey aj Benjamin kiraatinaheb’ lix tenamit chi jo’kan, kixtaqla sa’ xyanqeb’, ut kiraj xnawb’al rik’in lix tenamit ma neke’xpaab’ li aatin li kixye chaq reheb’.

2 Ut chixjunileb’ ke’xjap re chi junajeb’ xyaab’ xk’ux, chixyeeb’al: Yaal, naqapaab’ chixjunil li aatin li xaye qe; ut jo’kan ajwi’, naqanaw chirix lix tz’aqalil re ru ut lix yaalalil, xb’aan lix Musiq’ li Qaawa’ Q’axal Nim Xwankil, li xk’anjela jun li nimla jalok qe, malaj re li qach’ool, jo’kan naq maak’a’ chik li qajom re xb’aanunkil li maa’usilal; re b’an xb’aanunkil rajlal li chaab’ilal.

3 Ut laa’o ajwi’ qajunes, sa’ xk’ab’a’ lix chaab’ilal li Dios li maak’a’ roso’jik, ut lix k’utb’esihom lix Musiq’, nim ru li qilom chirix li k’a’ru taachalq; ut wi ta taa’ajmanq ru, tooruuq raj chi aatinak jo’ profeet chirix chixjunil li k’a’aq re ru.

4 Ut a’an li paab’aal li wanjenaq qik’in chirix li k’a’aq re ru kixye qe li qarey li xk’amok qe chixnawb’al li xnimal ru na’leb’ a’in, li nasaho’ wi’ qach’ool rik’in a’ sahil ch’oolejil a’in li q’axal nim.

5 Ut wan qach’ool chi ok sa’ jun li sumwank rik’in li qaDios re xb’aanunkil li naraj a’an, ut re ab’ink chiru lix taqlahom sa’ chixjunil li k’a’aq re ru tooxtaqla wi’, chiru chixjunil li rela’ li qakutan, re naq ink’a’ taqak’am sa’ qab’een jun li rahilal li maajo’q’e na’oso’, jo’ chanru yeeb’il xb’aan li anjel, re naq ink’a’ too’uk’aq chire li sek’ re lix josq’il li Dios.

6 Ut anajwan, a’ineb’ li aatin kiraj li rey aj Benjamin rik’ineb’, ut chi jo’kan kixye reheb’: Xeye li aatin li kiwaj; ut li sumwank li kek’uub’ a’an jun li sumwank tiik.

7 Ut anajwan, sa’ xk’ab’a’ li sumwank li kek’uub’, laa’ex ralal xk’ajol li Kristo taayehe’q eere, li ralal, ut lix rab’in; xb’aan naq k’ehomaq reetal, sa’ li kutan a’in xexrala sa’ musiq’ejil, xb’aan naq nekeye naq jalb’il lee ch’ool xb’aan xpaab’ankil lix k’ab’a’; jo’kan naq yo’lajenaqex rik’in a’an, ut okenaqex choq’ ralal ut xrab’in.

8 Ut rub’el li jolomej a’in ach’ab’anb’ilex, ut maajun chik jolomej wan naru tex’ach’ab’aaq wi’. Maajun chik k’ab’a’ej k’eeb’il nachal wi’ li kolb’a-ib’; jo’kan ut, nawaj raj naq chek’ul sa’ eeb’een lix k’ab’a’ li Kristo, chejunilex li xex’ok sa’ li sumwank rik’in li Dios naq tex’ab’inq chiru toj sa’ roso’jik lee yu’am.

9 Ut taak’ulmanq naq ani nab’aanunk re a’in taatawe’q sa’ xnim uq’ li Dios, xb’aan naq tixnaw li k’ab’a’ej li b’oqb’il wi’; xb’aan naq taab’oqe’q rik’in lix k’ab’a’ li Kristo.

10 Ut anajwan taak’ulmanq, naq ani ink’a’ tixk’ul sa’ xb’een lix k’ab’a’ li Kristo, tento taab’oqe’q rik’in jalan chik k’ab’a’ej; jo’kan naq naxtaw rib’ sa’ xtz’e uq’ li Dios.

11 Ut tinwaj raj naq chijultiko’q ajwi’ eere, naq a’in li k’ab’a’ej li kinye naq tink’e eere li maajo’q’e taasachmanq reetalil, ka’ajwi’ xb’aan q’etok aatin; jo’kan ut, ilomaq eerib’ re naq ink’a’ texq’etoq aatin, re naq ink’a’ taasachmanq reetalil li k’ab’a’ej sa’ lee ch’ool.

12 Ninye eere, tinwaj raj naq chijultiko’q eere naq junelik chek’uula chi tz’iib’anb’il li k’ab’a’ej sa’ lee ch’ool, re naq moko tawb’ilaqex ta sa’ xtz’e uq’ li Dios, re b’an teerab’i ut teenaw ru lix yaab’ kuxej li texb’oqe’q wi’, ut jo’kan ajwi’ li k’ab’a’ej li texxb’oq wi’.

13 Xb’aan naq chan ta wi’ ru naq junaq winq tixnaw ru laj eechal k’anjel li moko xk’anjelak ta wi’ chiru, ut li moko nawb’il ta ru xb’aan, ut li najt wan rik’in lix k’oxlahom ut li rajom lix ch’ool?

14 Ut jo’kan wi’chik, ma naxchap tab’i’ junaq winq lix b’uur li rech kab’al, ut naxkanab’ chi wank rik’in? Ink’a’ b’an, moko tixkanab’ ta chi tzekank sa’ xyanqeb’ lix ketomq; taaralinasi b’an, ut taarisi chaq. Ninye eere, naq jo’kan ajwi’ taa’uxq sa’ eeyanq laa’ex wi ink’a’ nekenaw li k’ab’a’ej li b’oqb’ilex wi’.

15 Jo’kan ut, tinwaj raj naq junelik xaqxooqex ut ink’a’ chex’eek’anq, junelik chinumtaq eerik’in li chaab’il k’anjel, re naq li Kristo, li Qaawa’ Dios Q’axal Nim Xwankil, texxtz’ap choq’ reechanihom, re naq k’amb’ilaqex sa’ choxa, re naq taawanq eekolb’al li junelik nakana, ut eeyu’am chi junelik, sa’ xk’ab’a’ lix chaab’ilal xna’leb’, ut lix wankilal, ut lix tiikal ru xna’leb’, ut li ruxtaan a’an li kiyo’ob’tesink re chixjunil li k’a’aq re ru, sa’ choxa ut sa’ ch’och’, li wan choq’ Dios sa’ xb’een chixjunil. Amen.