1 Ma o lenei, ua manatu le tupu o Peniamina o se mea ua tatau, ina ua uma ona tautala atu o ia i le nuu, e ao ona ia faamaumau igoa o i latou uma o e na osi feagaiga ma le Atua e tausi i ana poloaiga.

2 Ma sa oo ina sa leai se tagata e toatasi o i latou, vagana ai fanau laiti, sa lei osi feagaiga ma latou ave i o latou luga le suafa o Keriso.

3 O lenei foi, sa oo ina ua uma ona faaiu e le tupu o Peniamina nei mea uma, ma ua faapaiaina lona atalii o Mosaea e avea ma pule ma se tupu i lona nuu, ma ua tuuina atu ia te ia o faatonuga uma e uiga i le malo, ma ua tofiaina foi faitaulaga e aoaoina le nuu, ina ia mafai ona latou faalogo ma iloa poloaiga a le Atua, ma uuna’i i latou ia manatua le tautoga ua latou faia, sa auina atu e ia le motu o tagata, ma sa latou foi atu, o tagata taitoatasi, e tusa ma o latou aiga, i o latou lava fale.

4 Ma sa amata ona nofotupu Mosaea e sui i lona tamā. Ma sa amata ona nofotupu o ia i le tolu sefulu o ona tausaga, o le atoa ai lea, o le tusa o le fa selau ma le fitu sefulu ma le ono o tausaga mai le taimi na tuua ai Ierusalema e Liae.

5 Ma sa soifua le tupu o Peniamina i le tolu tausaga ona maliu ai lea o ia.

6 Ma sa oo ina savali le tupu o Mosaea i ala o le Alii, ma sa tausi e ia ana faamasinoga ma ana tulafono, ma sa tausi e ia ana poloaiga i soo se mea lava o mea uma na poloaiina ai e ia o ia.

7 Ma sa faatonu e le tupu o Mosaea lona nuu ia latou galueaiina le eleele. Ma o ia foi, sa galueaiina e ia lava le eleele, ina ia mafai ona lē avea o ia ma avega mamafa i lona nuu, ina ia mafai ona faia e ia e tusa ma mea uma na faia e lona tamā. Ma sa leai se finauga i totonu o lona nuu atoa mo le va o tausaga e tolu.