Vahe 13
Ko ha toʻo ʻeni mei he fakamatalaʻi ʻe he hisitōlia ʻa Siosefa Sāmitá ʻokú ne fakamatalaʻi e fakanofo ʻo e Palōfitá mo ʻŌliva Kautele ki he Lakanga Taulaʻeiki Faka-ʻĒloné ofi ki Hāmoni, Penisilivēnia, ʻi he ʻaho 15 Mē 1829. Naʻe fai ʻa e fakanofó ʻi he nima ʻo e ʻāngelo ʻa ia naʻá ne pehē ko Sione ia, ʻa ia naʻe ui ko Sione ko e Papitaiso ʻi he Fuakava Foʻoú. Naʻe fakahā ange ʻe he ʻāngeló ʻokú ne ngāue mai ʻo fakatatau ki he tuʻutuʻuni ʻa Pita, Sēmisi, mo Sione, ʻa ia ko e kau ʻAposetolo ʻo e kuonga muʻá, ʻoku nau maʻu ʻa e ngaahi kī ʻo e lakanga fakataulaʻeiki māʻolunga angé, ʻa ia naʻe ui ko e Lakanga Fakataulaʻeiki ʻo Melekisētekí. Naʻe fai ʻa e talaʻofa kia Siosefa mo ʻŌliva ʻe hokosia ʻa e taimi ʻe foaki ai ʻa e lakanga fakataulaʻeiki māʻolunga ange ko ʻení kiate kinaua. (Vakai ki he vahe 27:7–8, 12.)
ʻOku fakamatalaʻi mai ʻa e ngaahi kī mo e ngaahi mālohi ʻo e Lakanga Taulaʻeiki Faka-ʻĒloné.
1 ʻI he huafa ʻo e Mīsaiá, ʻoku ou foaki kiate kimoua ʻa hoku ongo kaungā-tamaioʻeiki, ʻa e Lakanga Fakataulaʻeiki ʻo ʻĒloné, ʻa ia ʻokú ne maʻu ʻa e ngaahi kī ʻo e tauhi mai ʻa e kau ʻāngeló, pea mo e ongoongolelei ʻo e fakatomalá, pea mo e papitaiso ʻi he fakaukú ke fakamolemole ʻa e ngaahi angahalá; pea ʻe ʻikai pē toe ʻave ʻeni mei māmani ʻo aʻu ki hono toe fai ʻe he ngaahi foha ʻo Līvaí ha feilaulau ki he ʻEikí ʻi he māʻoniʻoni.