Lakanga Taulaʻeiki Faka-ʻĒloné

Ko e lakanga fakataulaʻeiki siʻi angé (Hepelū 7:11–12; T&F 107:13–14). Ko hono ngaahi lakangá ko e pīsopé, taulaʻeikí, akonakí, mo e tīkoní (T&F 84:30; 107:10, 14–15, 87–88). Fakatatau ki he fono ʻa Mōsesé, ʻi he kuonga muʻá, naʻe ʻi ai ʻa e kau taulaʻeiki lahi, kau taulaʻeiki, mo e kau Līvai. Koeʻuhí ko e angatuʻu ʻa e kau ʻIsileli ʻo e kuonga muʻá ki he ʻOtuá, naʻe ʻave ʻa Mōsese mo e lakanga fakataulaʻeiki toputapú meiate kinautolu kae hokohoko atu ʻa e lakanga fakataulaʻeiki māʻulalo angé. Naʻa nau fakafisi ke fakamāʻoniʻoniʻi ʻa kinautolu pea maʻu ʻa e Lakanga Taulaʻeiki Faka-Melekisētekí mo hono ngaahi ouaú. (Vakai, T&F 84:23–26.) ʻOku ngāue ʻa e Lakanga Taulaʻeiki Faka-ʻĒloné ki he ngaahi ouau fakamāmani mo fakatuʻasino ʻo e fonó mo e ongoongoleleí (1 Fkmtl. 23:27–32; T&F 84:26–27; 107:20). ʻOkú ne maʻu ʻa e ngaahi kī ʻo e tauhi mai ʻa e kau ʻāngeló, ongoongolelei ʻo e fakatomalá, mo e papitaisó (T&F 13). Naʻe fakafoki mai ʻa e Lakanga Taulaʻeiki Faka-ʻĒloné ki he māmaní ʻi he kuonga ko ʻení ʻi he ʻaho 15 ʻo Mē 1829. Naʻe foaki ia ʻe Sione ko e Papitaisó kia Siosefa Sāmita mo ʻŌliva Kautele ofi ki Hāmoni, ʻi Penisilivēnia (T&F 13; SS—H 1:68–73).