Hepeluú, Tohi ki he Kakai

Ko ha tohi ʻi he Fuakava Foʻoú. Naʻe fai ʻe Paula ʻa e tohi ko ʻení ki he kāingalotu Siu ʻo e Siasí, ke fakalotoʻi kinautolu ke nau tui ki he ngaahi konga mahuʻinga ʻo e fono ʻa Mōsesé, ʻa ia kuo fakahoko ʻia Kalaisi pea kuo hanga ʻe he fono māʻolunga ange ʻo e ongoongolelei ʻa Kalaisí ʻo fetongi ia. ʻI he foki mai ʻa Paula ki Selusalema ʻi he ngataʻanga ʻo ʻene ngāue fakafaifekaú hono tuʻo tolú (ʻi he taʻu T.S. 60 nai), naʻá ne ʻiloʻi ai ʻoku kei ʻi ai ha kāingalotu Siu tokolahi ʻoku nau kei taukaveʻi pē hono tauhi ʻo e fono ʻa Mōsesé (Ngāue 21:20). Ko ha taʻu nai ʻeni ʻe hongofulu mei ha konifelenisi ʻa e Siasí ʻa ia naʻe fai ʻi Selusalema, ʻo nau pehē ai ʻoku ʻi ai ha ngaahi ouau ʻo e fono ʻa Mōsesé ʻoku ʻikai kei ʻaonga ia ki hono fakamoʻui ʻo e kau Kalisitiane senitailé. Naʻe ʻikai ke fuoloa mei he taimi ko iá mo e fai ʻe Paula ha tohi ki he kakai Hepeluú ʻo fakahā kiate kinautolu ʻi heʻenau ngaahi tohi tapú pea ʻi he ngaahi ʻuhinga lelei ʻa e ʻuhinga ʻoku ʻikai totonu ke nau kei tauhi ai ʻa e fono ʻa Mōsesé.

ʻOku fakamatalaʻi ʻe he vahe 1 mo e 2 ʻoku māʻolunga ange ʻa Sīsū ʻi he kau ʻāngelo. ʻOku hanga ʻe he vahe 3–7 ʻo fakafehoanaki ʻa Sīsū kia Mōsese pea ki he fono ʻa Mōsesé mo fakamoʻoniʻi ʻoku māʻolunga ange Ia ʻia Mōsese mo ʻEne fonó. ʻOku nau toe akoʻi foki ʻoku māʻolunga ange ʻa e Lakanga Taulaʻeiki Faka-Melekisētekí ʻi he Lakanga Taulaʻeiki Faka-ʻĒloné. ʻOku hanga ʻe he vahe 8–9 ʻo fakamatalaʻi ʻa e founga ne hanga ai ʻe he ngaahi ouau faka-Mōsesé ʻo teuteuʻi ʻa e kakaí ki he ngāue fakafaifekau ʻa Sīsuú mo e founga ʻoku hoko ai ʻa Kalaisi ko e taukapo ʻo e fuakava foʻoú (ʻAlamā 37:38–45; T&F 84:21–24). ʻOku hoko ʻa e vahe 10 ko ha naʻinaʻi ke faivelenga mo tui mateaki. Ko e vahe 11 ko e malanga ia ʻo kau ki he tuí. ʻOku ʻomi ʻi he vahe 12 ha ngaahi naʻinaʻi mo e ngaahi talomonū. ʻOku hanga ʻe he vahe 13 ʻo fakafekauʻaki ʻa e tuʻunga lāngilangi ʻo e malí mo hono mahuʻinga ʻo e talangofuá.