Sioeli
Ko ha palōfita ia ʻi he fonua ʻo Siutá ʻi he Fuakava Motuʻá. ʻOku ʻikai fakapapauʻi ʻa e taimi naʻá ne moʻui aí—kae mahalo naʻa ne moʻui ʻi he vahaʻa ʻo e taimi naʻe pule ai ʻa Soasí, ki muʻa ʻi he taʻu 850 K.M., mo e foki mai ʻa e faʻahinga ʻo Siutá mei he nofo pōpula ʻi Pāpiloné.
Ko e tohi ʻa Sioelí
ʻOku fakatefito ʻa e tohí ki ha kikite naʻe fai ʻe Sioeli hili hono taaʻi ʻa Siuta ʻaki ha fuʻu laʻalaʻā lahi mo e fanga heʻe (Sioeli 1:4–20). Naʻe fakapapauʻi ʻe Sioeli ki he kakaí kapau te nau fakatomala te nau toe maʻu ʻa e ngaahi tāpuaki ʻa e ʻOtuá (Sioeli 2:12–14).
Ko e vahe 1 ko ha ui ia ke fai ha fakataha molumalu ʻi he fale ʻo e ʻEikí. ʻOku fakamatala ʻa e vahe 2 ki he tau mo e fakaʻauha ki muʻa ʻi he Nofo Tuʻí. ʻOku fakamatala ʻa e vahe 3 ki he ngaahi ʻaho fakaʻosí pea fakapapauʻi mai ai ʻe fetauʻaki ʻa e ngaahi puleʻanga kotoa pē, ka ʻe hāʻele mai ʻa e ʻEikí ʻo ʻafio ʻi Saione.
Naʻe lau ʻe Pita mei he kikite ʻa Sioeli ki he huaʻi hifo ʻo e Laumālié ʻi he ʻaho ʻo e Penitekosí (Sioeli 2:28–32; Ngāue 2:16–21). Naʻe toe lau foki ʻe he ʻāngelo ko Molonaí ʻa e potufolofola tatau kia Siosefa Sāmita (SS—H 1:41).