Līhai, Tamai ʻa Nīfaí
Ko ha palōfita Hepelū ia ʻi he Tohi ʻa Molomoná ʻa ia naʻá ne tataki hono fāmilí mo kinautolu naʻe muimui kiate iá mei Selusalema ki ha fonua ʻo e talaʻofá ʻi he hemisifia hihifó ʻi he taʻu 600 K.M. nai. Ko Līhai ʻa e ʻuluaki palōfita ʻi hono kakaí ʻi he Tohi ʻa Molomoná.
Naʻe hola ʻa Līhai mo hono fāmilí mei Selusalema ʻi ha fekau ʻe he ʻEikí (1 Nīfai 2:1–4). Ko ha hako ia ʻo Siosefa, ʻa ia naʻe fakatau ki ʻIsipité (1 Nīfai 5:14). Naʻe fakahā ʻe he ʻEikí kiate ia ha meʻa-hā-mai ʻo kau ki he ʻakau ʻo e moʻuí (1 Nīfai 8:2–35). Naʻe hanga ʻe Līhai mo hono ngaahi fohá ʻo foʻu ha vaka pea nau folau ai ki he hemisifia hihifó (1 Nīfai 17–18). Naʻá ne fokotuʻu maʻu ia mo hono hakó ʻi he fonua foʻoú (1 Nīfai 18:23–25). Naʻe hanga ʻe Līhai ʻo tāpuakiʻi hono ngaahi fohá ki muʻa peá ne pekia, peá ne akoʻi ʻa kinautolu ʻo kau kia Kalaisi pea mo hono ʻomi ʻo e Tohi ʻa Molomoná ʻi he ngaahi ʻaho fakaʻosí (2 Nīfai 1:1–4:12).
Ko e tohi ʻa Līhaí
Naʻe kamata ʻe Siosefa Sāmita hono liliu ʻo e Tohi ʻa Molomoná ʻi he tohi ʻa Līhaí. Ko ha lekooti ia naʻe fakanounouʻi ʻe Molomona mei he ngaahi peleti ʻa Līhaí. Naʻe hili ʻene liliu ha peesi ʻe 116 mei he tohí, naʻe ʻoange ai ʻe Siosefa ʻa e ngaahi peesi ko iá kia Māteni Hālisi, ʻa ia naʻe hoko ʻi ha kiʻi taimi nounou ko e tangata tohi ʻa Siosefa ʻi hono liliu ʻo e Tohi ʻa Molomoná. Naʻe mole ʻa e ngaahi peesi ko iá. Naʻe ʻikai toe liliu ʻe Siosefa Sāmita ʻa e tohi ʻa Līhaí ke fetongi ʻa e ngaahi peesi naʻe molé, ka naʻa ne liliu ha ngaahi fakamatala kehe tatau mo ia mei he ngaahi peleti koulá (vakai ki he talateu ki he T&F 3; 10). ʻOku hoko ʻa e ngaahi fakamatala kehe ko ia he taimí ni ko e ʻuluaki tohi ʻe ono ʻo e Tohi ʻa Molomoná.