Siuta

Ko e faʻahinga ia naʻe takimuʻa ki ai ʻa Siuta ʻi he hili ʻa hono nofoʻi ʻo Kēnaní. Ko e faʻahinga naʻá ne tuʻu fehangahangai lahi taha mo iá ko e faʻahinga ʻo ʻIfalemí. Naʻe tāpuakiʻi ʻe Mōsese ʻa e faʻahinga ʻo Siutá (Teut. 33:7). Naʻe hili ʻa e pule ʻa Solomoné, pea hoko leva ʻa e faʻahinga ʻo Siutá ko e puleʻanga ʻo Siutá.

Lolotonga ʻa e pule ʻa Lehopoamé naʻe vahevahe ʻa e puleʻanga ʻo Solomoné ki ha puleʻanga mavahevahe ʻe ua, tuʻunga ʻi he femehekaʻaki ʻi he vahaʻa ʻo e faʻahinga ʻo ʻIfalemí mo e faʻahinga ʻo Siutá. Naʻe kau ʻi he puleʻanga mei he tongá, pe puleʻanga ʻo Siutá ʻa e faʻahinga ʻo Siutá pea mo e konga lahi ange ʻo e faʻahinga ʻo Penisimaní. Naʻe hoko ʻa Selusalema ko hono kolomuʻá. Naʻe nofo maʻu hono fakalūkufua ʻo e puleʻanga ko iá ʻi he lotu kia Sihova ʻo kehe ia mei he puleʻanga ʻi he tokelaú. Naʻe siʻisiʻi ange hono ʻohofi ʻo Siuta mei he tokelaú mo e hahaké, pea naʻe tauhi maʻu ai ʻa e pule aoniu ki he puleʻangá ʻi he nima ʻo e fāmili ʻo Tēvitá ʻo aʻu mai ki hono taki pōpula ʻa kinautolu ʻe he kau Pāpiloné. Naʻe lava ʻe he puleʻanga ʻo Siutá ʻo kei tuʻu pē ʻi ha taʻu ʻe 135 hili ʻa e tō ʻa e puleʻanga tokolahi mo mālohi ange ʻo ʻIsilelí.

ʻOku ʻuhinga ʻeni ki he Tohi Tapú ʻi heʻene hoko ko ha lekooti ʻo e fale ʻo Siutá (ʻIsikeli 37:15–19). Ko e taimi ko ia ʻe tānaki mai ai ʻi he ngaahi ʻaho fakaʻosí ʻa e ngaahi vaʻa kehekehe ʻo e fale ʻo ʻIsilelí, ʻe tānaki fakataha foki mo ʻenau ngaahi lekooti toputapú. ʻOku fepoupouʻaki ʻa e ngaahi lekooti fakatohitapu ko ʻení pea nau hoko ko ha fakamoʻoni pē taha, ko Sīsū ʻa e Kalaisí, ko e ʻOtua ʻo ʻIsilelí pea ko e ʻOtua foki ʻo e māmaní kotoa (LSS, Sēnesi 50:24–36 [Fakalahi]; 2 Nīfai 3; 29).