Fuakava Motuʻá

Ko e ngaahi tohi ʻa e kau palōfita ʻi he kuonga muʻá ʻa ia naʻa nau ngāue ʻo fakatatau ki hono fakahinohinoʻi ʻa kinautolu ʻe he Laumālie Māʻoniʻoní pea naʻa nau fakamoʻoni ʻi ha ngaahi senituli lahi ʻo kau kia Kalaisi mo ʻEne ngāue fakafaifekau ʻi he kahaʻú. ʻOku ʻi ai foki mo ha lekooti ʻo e hisitōlia ʻo ʻĒpalahame mo hono ngaahi hakó, ʻo kamata meia ʻĒpalahame, mo e fuakavá, pe fakamoʻoni, ʻa ia naʻe fai ʻe he ʻEikí mo ʻĒpalahame mo hono hakó.

Naʻe tohi ʻe Mōsese ʻa e ʻuluaki tohi ʻe nima ʻo e Fuakava Motuʻá. Ko e tohi Sēnesí, ʻEkesōtosí, Levitikó, Nōmipá, mo e Teutalōnomé ia. ʻOku ʻuhinga ʻa e Sēnesí ki he kamataʻanga ʻo e māmaní, faʻahinga ʻo e tangatá, ngaahi leá, ngaahi faʻahinga kakaí, mo e kamataʻanga ʻo e fale ʻo ʻIsilelí.

ʻOku fakamatala ʻa e ngaahi tohi fakahisitōliá ki he ngaahi meʻa naʻe hoko ʻi ʻIsileli. ʻOku kau ki he ngaahi tohi ko iá ʻa e tohi ʻa Sosiuá, Kau Fakamāú, Lute, 1 mo e 2 Samuela, 1 mo e 2 Ngaahi Tuʻi, 1 mo e 2 Fakamatala Meʻa Hokohoko, ʻĒsela, Nehemaia, mo e ʻĒseta.

ʻOku tohi ʻi he ngaahi tohi fakapunaké ha niʻihi ʻo e poto mo e ngaahi tohi ʻa e kau palōfitá. ʻOku kau ki he ngaahi tohi ko iá ʻa e tohi ʻa Siopé, Ngaahi Sāmé, Lea Fakatātaá, Tangata Malangá, Hiva ʻa Solomoné, mo e Tangilāulaú.

Naʻe fakatokanga ʻe he kau palōfitá ki ʻIsileli ʻo kau ki heʻene ngaahi angahalá pea nau fakamoʻoni ki he ngaahi tāpuaki ʻoku maʻu ʻi he talangofuá. Naʻa nau kikite ʻo kau ki he hāʻele mai ʻa Kalaisí, ʻa ia te ne fai ʻa e fakalelei ki he ngaahi angahala ʻa kinautolu ʻoku fakatomalá, mo maʻu ʻa e ngaahi ouaú, pea moʻui ʻaki ʻa e ongoongoleleí. ʻOku kau ki he ngaahi tohi ʻa e kau palōfitá ʻa e tohi ʻa ʻĪsaiá, Selemaiá, ʻIsikelí, Tanielá, Hōseá, Sioelí, ʻĀmosí, ʻOpataiá, Sioná, Maiká, Nēhumí, Hapakukí, Sēfanaiá, Hakeaí, Sākalaiá, mo e Malakaí.

Naʻe tohi ʻa e konga lahi ʻo e ngaahi tohi ʻi he Fuakava Motuʻá ʻi he lea faka-Hepeluú. ʻOku ʻi ai ha ngaahi tohi siʻi naʻe fai ia ʻi he lea faka-Alameá, pe ngaahi lea tatau mo ia.