Tīmoté, Ongo Tohi kia

Naʻe fai ʻe Paula ʻa e ʻuluaki tohí hili hono ʻuluaki tuku pōpula iá. Naʻá ne tuku ʻa Tīmote ʻi ʻEfesō, ʻi heʻene ʻamanaki te ne toe foki atu ki ai (1 Tīm. 3:14). Neongo iá, naʻe ongoʻi ʻe Paula, ʻe kiʻi fuoloa pea toki fokí, ko ia naʻá ne tohi ai kia Tīmote, mahalo mei Masitōnia (1 Tīm. 1:3), ʻo naʻinaʻi kiate ia mo fakalotolahiʻi ia ʻi heʻene fakahoko hono fatongiá.

ʻOku ʻi he vahe 1 ʻa e pōpoaki ʻa Paula mo ʻene ngaahi fakahinohino ʻo kau ki he ngaahi fakakaukau vale ʻoku kamata ke hū atu ki he Siasí. ʻOku ʻoatu ʻi he vahe 2–3 ha ngaahi fakahinohino ʻo kau ki he lotu ʻi he ʻao ʻo e kakaí pea mo e ʻulungaanga mo e anga ʻo e kau faifekaú. ʻOku ʻi he vahe 4–5 hano fakamatalaʻi ʻo e hē mei he moʻoní ʻi he ngaahi ʻaho fakaʻosí mo ha faleʻi kia Tīmote ki he founga ke ne tokoni mo ngāue ai kiate kinautolu ʻokú ne tatakí. ʻOku ʻi he vahe 6 ha naʻinaʻi ke faivelenga pea fakaʻehiʻehi mei he ngaahi koloa ʻo e māmaní.

Naʻe fai ʻe Paula ʻa e tohi hono uá lolotonga hono tuku pōpula ia hono tuʻo uá, ʻi ha kiʻi taimi siʻi pē ki muʻa ʻi hono fakapoongi iá. ʻOku kau ai ʻa e ngaahi lea fakaʻosi ʻa e ʻAposetoló, pea hā mei ai ʻa e fuʻu loto-toʻa fakaofo mo e loto-falala naʻá ne maʻu ʻi heʻene fehangahangai mo e maté.

ʻOku ʻi he vahe 1 ʻa e pōpoaki ʻa Paula mo e fekau naʻe fai kia Tīmote. ʻOku ʻi he vahe 2–3 ha ngaahi fakatokanga kehekehe mo e ngaahi fakahinohino, mo ha tukupā ke ne matuʻuaki ʻa e ngaahi faingataʻa ʻoku hanga mai mei muʻá. Ko e vahe 4 ko ha pōpoaki ia ki he ngaahi kaumeʻa ʻo Paulá, pea ʻoku kau ai ha faleʻi mālohi ʻo kau ki he founga ke fai fekauʻaki mo kinautolu ʻoku mavahe mei he siasí.