Mōsese

Ko ha palōfita ʻi he Fuakava Motuʻá ʻa ia naʻá ne tataki atu ʻa e kakai ʻIsilelí mei he nofo pōpula ʻi ʻIsipité, peá ne foaki kiate kinautolu ha ngaahi fono fakalotu, fakasōsiale, pea ʻi he ngaahi meʻa ke kai foki ʻa ia naʻe fakahā mai ʻe he ʻOtuá.

Naʻe ʻikai ke ngata ʻa e ngāue fakafaifekau ʻa Mōsesé ʻi heʻene moʻui fakamatelié pē. Naʻe ako ʻaki ʻe Siosefa Sāmita ʻo pehē naʻá ne haʻu mo ʻIlaisiā ki he Moʻunga ʻo e Liliú ʻo foaki mai ʻa e ngaahi kī ʻo e lakanga fakataulaʻeikí kia Pita, Sēmisi, mo Sione (Mātiu 17:3–4; Maʻake 9:4–9; Luke 9:30; T&F 63:21).

Naʻe hā mai ʻa Mōsese kia Siosefa Sāmita mo ʻŌliva Kautele ʻi he ʻaho 3 ʻo ʻEpeleli 1836 ʻi he temipale ʻi Ketilani, ʻi ʻOhaioó, ʻo foaki mai kiate kinaua ʻa e ngaahi kī ki hono tānaki ʻo ʻIsilelí (T&F 110:11).

ʻOku lahi ha ngaahi fakamatala ʻa e ngaahi fakahā ʻi he ngaahi ʻaho ki mui ní ʻo kau kia Mōsese. ʻOku lahi ʻaupito ʻa e fakamatala ʻo kau kiate ia ʻi he Tohi ʻa Molomoná, pea ʻoku tau ako mei he Tokāteline mo e Ngaahi Fuakavá ʻo kau ki heʻene ngāue fakafaifekaú (T&F 84:20–26) pea naʻá ne maʻu ʻa e lakanga fakataulaʻeikí mei heʻene tamai ʻi he fono ko Seteloó (T&F 84:6).

ʻOku toe hanga foki ʻe he ngaahi fakahā ʻi he ngaahi ʻaho ki mui ní ʻo fakapapauʻi mai ʻa e fakamatala ʻi he folofolá ʻo kau ki heʻene ngāue fakafaifekau ʻi he fānau ʻo ʻIsilelí, pea toe fakapapauʻi mai mo ʻene hanga ʻo tohi ʻa e ngaahi tohi ko ia ʻe nima ʻoku kamata ʻaki ʻa e Fuakava Motuʻá (1 Nīfai 5:11; Mōsese 1:40–41).

Ko hono fakahaofi ʻo Mōsese ʻe he ʻofefine ʻo Feló, ʻEke. 2:1–10.
Ko ʻene hola ki Mitiané, ʻEke. 2:11–22.
Naʻe hā mai ha ʻāngelo ʻa e ʻEikí kiate ia ʻi ha vao ʻakau vela, ʻEke. 3:1–15.
Fakahā ʻa e ngaahi fakamamahi ʻe hoko ki ʻIsipité, ʻEke. 7–11.
Ko hono fokotuʻu ʻe he ʻEikí ʻa e Laka Atú, ʻEke. 12:1–30.
Taki atu ʻa e fānau ʻa ʻIsilelí ʻi he Tahi Kulokulá, ʻEke. 14:5–31.
Naʻe fekauʻi hifo ʻe he ʻEikí ha mana ʻi he toafá, ʻEke. 16.
Taaʻi ʻa e maka ʻo Hōlepí pea puna mei ai ʻa e vai, ʻEke. 17:1–7.
Naʻe puke hake ʻe ʻĒlone mo Hua ʻa hono ongo nimá kae lava ke ikunaʻi ʻe Sosiua ʻa ʻAmaleki, ʻEke. 17:8–16.
ʻOku faleʻi ia ʻe Setelō, ʻEke. 18:13–26.
Teuteuʻi ʻa e kakaí ki he hāʻele mai ʻa e ʻEikí ʻi he moʻunga Sainaí, ʻEke. 19.
Naʻe fakahā mai ʻe he ʻEikí ʻa e Fekau ʻe Hongofulú kiate ia, ʻEke. 20:1–17.
Naʻá ne mamata fakataha mo e kaumātuʻa ʻe toko fitungofulu ki he ʻOtuá, ʻEke. 24:9–11.
Maumauʻi ʻa e ngaahi maka ʻo e fakamoʻoni pea fakaʻauha ʻa e fakatātā ʻo e ʻuhikiʻi pulu koulá, ʻEke. 32:19–20.
Fefolofolai mo e ʻOtuá ko e mata ki he mata, ʻEke. 33:9–11.

Ko e tohi ʻa Mōsesé

Ko ha tohi ʻi he Mataʻitofe Mahuʻingá ʻa ia ʻoku ʻi ai ʻa e liliu ʻo e ʻuluaki vahe ʻe fitu ʻo e tohi Sēnesí naʻe fakahinohinoʻi fakalaumālie ʻa Siosefa Sāmita ke ne faí.

ʻOku tohi ʻi he vahe 1 ha lekooti ʻo ha meʻa-hā-mai naʻe mamata ai ʻa Mōsese ki he ʻOtuá, ʻa ia naʻá ne fakahā mai kiate ia ʻa e palani ʻo e fakamoʻuí kotoa. Ko e vahe 2–5 ko ha fakamatala ia ki he Fakatupú mo e Hinga ʻa e tangatá. ʻOku ʻi he vahe 6–7 ha meʻa-hā-mai ʻoku kau kia ʻĪnoke mo ʻene ngāue fakafaifekau ʻi he māmaní. ʻOku ʻi he vahe 8 ha meʻa-hā-mai ʻoku kau kia Noa mo e fuʻu Lōmakí.

Ko e tohi ʻe nima ʻa Mōsesé

ʻOku ui ʻa e ngaahi ʻuluaki tohi ʻo e Fuakava Motuʻá ko e ngaahi tohi ʻa Mōsesé. Naʻe kau ʻi he ngaahi peleti palasa naʻe ʻave ʻe Nīfai meia Lēpaní ʻa e ngaahi tohi ʻa Mōsesé (1 Nīfai 5:11).