Levitiko

Ko ha tohi ʻi he Fuakava Motuʻá ʻa ia ʻoku fakamatala ki he ngaahi fatongia fakataulaʻeiki ʻi ʻIsilelí. ʻOku fakamamafaʻi ai ʻa e māʻoniʻoni ʻa e ʻOtuá mo e ngaahi fono ʻa ia ʻe moʻui ʻa Hono kakaí ʻo fakatatau ki ai koeʻuhi ke nau māʻoniʻoni. Ko ʻene taumuʻá ke akoʻi ʻa e ngaahi fakakaukau fakaeangamaʻa mo e ngaahi moʻoni fakalotu ʻo e fono ʻa Mōsesé ʻi hono fakahoko ʻo e ngaahi ouau. Naʻe tohi ʻe Mōsese ʻa e tohi Levitikó.

ʻOku fakamatala ʻa e vahe 1–7 ki he ngaahi ouau ʻo e feilaulaú. ʻOku fakamatalaʻi ʻi he vahe 8–10 ʻa e ngaahi ouau ʻoku fakahoko ʻo fekauʻaki mo e kau taulaʻeikí. ʻOku hanga ʻe he vahe 11 ʻo fakamatalaʻi ʻa e meʻa ʻe lava pe ʻikai lava ʻo kai pea mo e meʻa ʻoku maʻá mo e meʻa ʻoku taʻemaʻá. ʻOku fakamatala ʻa e vahe 12 ki he kakai fefiné hili ʻenau fanauʻi ʻenau fānaú. Ko e ngaahi fono ʻa e vahe 13–15 ʻoku fekauʻaki mo e meʻa ʻoku taʻemaʻa ki he ngaahi ouaú. ʻOku ʻi he vahe 16 ʻa e ngaahi ouau ke fakahoko ʻi he ʻAho ʻo e Fakaleleí. ʻOku ʻi he vahe 17–26 ʻa e ngaahi fono ʻoku kau ki he ngaahi meʻa fakalotu mo e feohi fakasōsiale ke tauhí. ʻOku fakamatala ʻa e vahe 27 ʻo kau ki he meʻa naʻe fekau ʻe he ʻEikí ki ʻIsileli ke nau fakatapui ki he ʻEikí ʻi he fua ʻo ʻenau ngoué, ngaahi takanga monumanu īkí, mo e ngaahi takanga monumanu lalahí.