Taukaé (ki he ʻOtuá)

Ko e lea taʻe-fakaʻapaʻapa pe taʻe-ʻapasia ki he ʻOtuá pe ngaahi meʻa ʻoku toputapú.

Naʻe tuʻo lahi hono tukuakiʻi ʻo Sīsū ʻe he kau Siú ʻokú Ne lea fie ʻOtua koeʻuhi ko ʻEne pehē ʻokú ne maʻu ʻa e totonu ke fakamolemoleʻi ʻa e ngaahi angahalá (Mātiu 9:2–3; Luke 5:20–21), pea koeʻuhi ko ʻEne ui Ia ko e ʻAlo ʻo e ʻOtuá (Sione 10:22–36; 19:7), pea koeʻuhi ko ʻEne pehē te nau mamata kiate Ia ʻokú Ne nofo ʻi he nima toʻomataʻu ʻo e mālohí pea te Ne hāʻele mai ʻi he ngaahi ʻao ʻo e langí (Mātiu 26:64–65). Naʻe mei moʻoni ʻa e ngaahi tukuakiʻi ko ʻení kapau naʻe ʻikai moʻoni ʻa e ngaahi meʻa kotoa pē naʻá Ne fakahā ʻo kau kiate Iá. Naʻe tukuakiʻi Ia ʻe he kau fakamoʻoni loí ʻi hono fakamāuʻi ʻe he Sanitaliné (Mātiu 26:59–61) ko ʻEne lea fie ʻotua ʻo kau ki he temipale ʻo e ʻOtuá. Ko e taukae ki he Laumālie Māʻoniʻoní, ʻa ia ko hono fakaʻikaiʻi taʻe-fakakounaʻi ia ʻo Kalaisi hili hano maʻu ha ʻilo haohaoa kiate Iá, ko e angahala ia ʻoku ʻikai faʻa fakamolemoleá (Mātiu 12:31–32; Maʻake 3:28–29; T&F 132:27).