Hēlota

Ko ha fāmili ia ʻo e kau pule ʻi Siutea ofi ki he taimi ʻo Sīsū Kalaisí. Ko e kakai mahuʻinga kinautolu ʻi ha ngaahi meʻa lahi naʻe hoko ʻi he Fuakava Foʻoú. Naʻe kamata ʻa e fāmilí ʻia Hēlota ko e Lahi, ʻa ia naʻá ne manavahē ʻi hono ʻaloʻi ʻo e Fakamoʻuí (Mātiu 2:3) peá ne tuʻutuʻuni ke tāmateʻi ʻa e pēpē valevale kotoa pē ʻi Pētelihema. Naʻe kau ʻi hono ngaahi fohá ʻa ʻAlisitolopulo; Hēlota Filipe (Mātiu 14:3; Maʻake 6:17); Hēlota ʻAnitipasi, ko e tuʻi (Mātiu 14:1; Luke 9:7; ʻa ia ʻoku toe ʻiloa ko e Tuʻi ko Hēlotá, Maʻake 6:14); ʻAkileosi (Mātiu 2:22); mo Filipe, ko e tuʻi ʻo ʻAituliá (Luke 3:1). Ko Hēlota ʻAkilipa Ⅰ (Ngāue 12:1–23) mo hono tuofefine ko Helotiasí (Mātiu 14:3; Maʻake 6:17) ko e fānau ia ʻa ʻAlisitolopulo. Naʻe hā ha niʻihi ʻo e fānau ʻa Hēlota ʻAkilipa Ⅰ ʻi he Fuakava Foʻoú, ʻo kau ai ʻa Hēlota ʻAkilipa Ⅱ (Ngāue 25:13), Pelenaisi (Ngāue 25:13), mo Telusila, ko e ʻunoho ʻo Filiké (Ngāue 24:24).