ʻĀtama

Ko e ʻuluaki tangata ia naʻe fakatupu ʻi he māmaní.

Ko ʻĀtama ʻa e tamai mo e pēteliake ʻo e faʻahinga ʻo e tangatá ʻi he māmaní. Naʻe hanga ʻe heʻene maumau-fono ʻi he Ngoue ko ʻĪtení (Sēnesi 3; T&F 29:40–42; Mōsese 4) ʻo fakatupu ʻene “hingá” ʻo ne hoko ai ʻo fakamatelie, ʻa ia ko ha sitepu ia naʻe pau ke hoko koeʻuhí kae lava ai ʻa e faʻahinga ʻo e tangatá ʻo fakalakalaka ʻi he māmani ko ʻení (2 Nīfai 2:14–29; ʻAlamā 12:21–26). ʻOku totonu ai ke fakalāngilangiʻi ʻa ʻĀtama mo ʻIvi ʻi hona fatongia ʻi hono fakaʻatā ke tau tupulaki ʻo taʻengatá. Ko ʻĀtama ʻa e ʻi Muʻa ʻi Muʻa ʻi he Ngaahi ʻAhó pea ʻoku toe ʻiloa foki ia ko Maikeli (Taniela 7; T&F 27:11; 107:53–54; 116; 138:38). Ko ia ʻa e ʻāngelo pulé (T&F 107:54) pea ʻe toe haʻu ki he māmaní ʻi heʻene hoko ko e pēteliake ʻo e fāmili ʻo e faʻahinga ʻo e tangatá (T&F 116).

Naʻe fakatupu ʻe he ʻOtuá ʻa e tangatá ʻi hono tatau ʻoʻoná, Sēnesi 1:26–28 (Mōsese 2:26–28; ʻĒpa. 4:26–28).
Naʻe tuku ʻe he ʻOtuá ki he tangatá ke pule ki he ngaahi meʻa kotoa pē pea fekau kiate ia ke ne fakatokolahi mo fakakakai ʻa e māmaní, Sēnesi 1:28–31 (Mōsese 2:28–31; ʻĒpa. 4:28–31).
Naʻe tuku ʻe he ʻOtuá ʻa ʻĀtama mo ʻIvi ʻi he Ngoue ko ʻĪtení pea tapui ʻa kinaua ke na kai mei he ʻakau ʻo e ʻilo ʻo e leleí mo e koví, Sēnesi 2:7–9, 15–17 (Mōsese 3:7–9, 15–17; ʻĒpa. 5:7–13).
Naʻe fakahingoa ʻe ʻĀtama ʻa e meʻa moʻui kotoa pē, Sēnesi 2:19–20 (Mōsese 3:19–20; ʻĒpa. 5:20–21).
Naʻe fakahoko ʻe he ʻOtuá ʻa ʻĀtama mo ʻIvi ʻi he mali, Sēnesi 2:18–25 (Mōsese 3:18–25; ʻĒpa. 5:14–21).
Naʻe ʻahiʻahiʻi ʻa ʻĀtama mo ʻIvi ʻe Sētane, peá na kai ʻi he fua tapú, pea naʻe kapusi ʻa kinaua ki tuʻa mei he Ngoue ko ʻĪtení, Sēnesi 3 (Mōsese 4).
Naʻe taʻu 930 ʻa ʻĀtama ʻi heʻene pekiá, Sēnesi 5:5 (Mōsese 6:12).