Ko ha meʻa ʻoku hoko ʻa ia ʻoku lau ʻe he kakaí ko e fakaʻilonga pe fakamoʻoniʻi ʻo ha meʻa. Ko e fakaʻilongá, ko ha fakahā fakaofo maʻu pē ia mei he ʻOtuá. ʻOku maʻu foki ʻe Sētane ʻa e mālohi ke fakahā ha ngaahi fakaʻilonga ʻi he ngaahi tuʻunga tatau. ʻOku totonu ke fekumi ʻa e kāingalotú ki he ngaahi foaki ʻo e laumālié kae ʻoua naʻa kumi ki ha ngaahi fakaʻilonga ke fakafiemālieʻi ʻaki haʻanau fie ʻilo pe ke fakamālohia ai ha tui. Ka ʻe fakahā mai ʻe he ʻEikí ha ngaahi fakaʻilonga ʻo ka Ne ka ʻafioʻi ʻe ʻaonga ia kiate kinautolu ʻoku tuí (T&F 58:64).