Kalētiá, Tohi ki he Kakai

Ko ha tohi ʻi he Fuakava Foʻoú. Naʻe ʻuluaki hoko ia ko ha tohi naʻe fai ʻe he ʻAposetolo ko Paulá ki he Kāingalotu naʻa nau nofo ʻi Kalētiá. Ko e kaveinga mahuʻinga ʻo ʻene tohí, ʻoku maʻu ʻa e tauʻatāina moʻoní ʻi hono moʻui ʻaki ʻo e ongoongolelei ʻa Sīsū Kalaisí. Kapau ʻe tauhi ʻe he Kāingalotú ʻa e ngaahi akonaki ʻa e kau Kalisitiane Siú ʻa ia naʻa nau fakamamafaʻi hono tauhi ʻa e fono ʻa Mōsesé, te nau hanga ai ʻo fakangatangata pe fakaʻauha ʻa e tauʻatāina kuo nau maʻu ʻia Kalaisí. Naʻe hanga ʻe Paula ʻi heʻene tohí ʻo fakapapauʻi hono tuʻunga ʻi heʻene hoko ko ha ʻAposetoló, peá ne fakamatalaʻi ʻa e tokāteline ʻo e māʻoniʻoni ʻi he tuí, pea fakapapauʻi mo hono mahuʻinga ʻo ha tui fakalotu fakalaumālié.

Naʻe fakahā ʻe Paula ʻi he vahe 1 mo e 2 ʻa ʻene mamahi ʻi he ongoongo naʻá ne maʻu ʻoku ʻi ai ha hē mei he moʻoní ʻi he kau Kalētiá, peá ne fakamahinoʻi ai mo hono tuʻunga ʻi he kau ʻAposetoló. ʻOku fakamatala ʻa e vahe 3 mo e 4 ki he ngaahi tokāteline ʻo e tuí mo e ngaahi ngāué. ʻOku kau ʻi he vahe 5 mo e 6 ha malanga ʻo kau ki he ngaahi ngāue ʻoku hā mai tuʻunga ʻi he tokāteline ʻo e tuí.