¶ 1 BEA nae folofola a Jihova kia Mosese, o behe,

2 Lea ki he fānau a Isileli, o behe, Kabau oku feitama ha fefine, bea faele‘i ae tama tagata: bea e tae maa ia i he aho e fitu; e tae maa ia o fakatatau ki he gaahi aho fakamavahe i hono mahaki.

3 Bea i hono valu oe aho e kamu ae mua kili o hono botu  oe tama tagata.

4 Bea e nofo be  ae fefine i he toto o hono fakamaa i he aho e tolugofulu ma tolu; e ikai te ne ala ki ha mea tabu, be hu ki he fale tabu, kae oua ke kakato ae gaahi aho o hono fakamaa.

5 Bea kabau te ne faele‘i ha taahine, e tae maa ai ia i he uike e ua, o hage ko hono mavahe: bea te ne nofo i he aho e onogofulu ma ono koeuhi koe toto mo hono fakamaa.

6 Bea ka kakato ae gaahi aho o hono fakamaa, koeuhi koe tama, be koe taahine, te ne omi eia ha lami oe uluaki ta‘u ki he feilaulau tutu, moe lube mui, be ha kulukulu, koe feilaulau ma ae agahala, ki he taulaeiki i he mataba oe fale fehikitaki oe kakai:

7 Aia te ne atu ia i he ao o Jihova, o ne fai ae fakalelei maana; bea e fakamaa ai ia mei he au o hono toto. Ko eni ae fono kiate ia kuo ne faele‘i ae tama be koe taahine.

8 Bea kabau oku ikai faa omi eia ha lami, te ne toki omi eia ha kulukulu e ua, be koe lube mui e ua; koe taha ki he feilaulau tutu, bea koe taha ki he feilaulau ma ae agahala: bea e fai e he taulaeiki ae fakalelei maana, bea e maa ai ia.