¶ 1 BEA nae folofola a Jihova kia Mosese, o behe,

2 Kabau e fai agahala e ha toko taha, o fai ha mea hala kia Jihova, bea loi ki hono kaugaabi i ha mea nae tuku kiate ia ke tauhi, be i ha fakatau, be i ha mea kuo ave fakamalohi, be i he kākā‘i hono kaugaabi;

3 Be kuo ne ilo ha mea nae mole, bea oku loi ki ai, o fuakava loi, oka fai hala ae tagata i ha taha oe gaahi mea ni:

4 Bea e behe, koe mea i he ene agahala, bea kuo ne halaia, e toe atu eia aia naa ne ave fakamalohi, be koe mea kuo ne ma‘u fakakākā be koe mea nae atu kiate ia ke tauhi, be koe mea nae mole aia naa ne ilo‘i,

5 Be koe mea koia kotoabe kuo ne fuakava loi ki ai; e toe atu ia i hono tatau totonu, bea ke fakalahi aki eia hono nima oe vahe, o atu kiate ia aia oku totonu ke ma‘u, i he aho o ene feilaulau ma ae agahala.

6 Bea te ne omi eia ene feilaulau ma ae agahala kia Jihova, koe sibi tagata tae hono mele mei he faga sibi, o tatau mo hoo lau, koe feilaulau ma ae agahala, ki he taulaeiki:

7 Bea e fai e he taulaeiki ae fakalelei maana i he ao o Jihova: bea e fakamolemole kiate ia i he mea kotoabe koia kuo ne fai hala ai.

¶ 8 Bea nae folofola a Jihova kia Mosese, o behe,

9 Fekau kia Elone mo hono gaahi foha, o behe, Ko eni ae fono oe feilaulau tutu: Koe feilaulau tutu ia, koe mea i he ene vela i he bo kotoa o a‘u ki he bogibogi i he fuga feilaulauaga, bea koe afi oe feilaulauaga e moui be i ai.

10 Bea e ai e he taulaeiki hono kofu tubenu tuovalevale, bea ai mo hono kofuva‘e tubenu tuovalevale ki hono jino, bea te ne hiki ae efuefu kuo vela e he afi moe feilaulau tutu i he feilaulauaga, bea e liligi eia ia i he tafaaki oe feilaulauaga.

11 Bea e vete eia hono gaahi kofu o tuku, kae ai ae kofu kehe, bea te ne fetuku ae efuefu ki he botu maa i tuaa i he abitaga.

12 Bea e moui mau ai be ae afi i he feilaulauaga; e ikai tamate‘i: bea e tutu ae fefie ki ai e he taulaeiki i he bogibogi kotoabe, bea hilifaki lelei be ki ai ae feilaulau tutu: bea e tutu eia ki ai ae gako oe gaahi feilaulau fakamelino.

13 E moui mau ai be ae afi i he feilaulauaga; e ikai mate ia o taegata.

¶ 14 Bea koe fono eni oe feilaulau meakai: e atu ia e he gaahi foha o Elone i he ao o Jihova, i he mu‘a feilaulauaga.

15 Bea e too eia ae faluku e taha oe mahoaa oe feilaulau meakai, bea mo hono lolo o ia, moe laibeno kotoabe aia oku i he feilaulau meakai, o tutu ia ki he fuga oe feilaulauaga, io, ko hono fakamanatu o ia, kia Jihova.

16 Bea ko hono toe e kai e Elone mo hono gaahi foha: e kai ia moe ma tae fakalevani i he botu maonioni; te nau kai ia i he lotoa oe fale fehikitaki oe kakai.

17 Oua naa ta‘o ia moe levani. Kuou tuku ia ko ho nau inaji i he gaahi feilaulau tutu kiate au: oku fugani maonioni ia, o hage koe feilaulau ma ae agahala, bea hage koe feilaulau ma ae fai hala.

18 E kai la e he fānau tagata kotoabe i he fānau a Elone. Koe fekau fai mau be la o taegata i ho mou gaahi toutagata ki he gaahi feilaulau tutu a Jihova: koia kotoabe e ala ki ai e tabu ia.

¶ 19 Bea nae folofola a Jihova kia Mosese, o behe,

20 Koe feilaulau eni a Elone mo hono gaahi foha, aia te nau atu kia Jihova i he aho oku fakanofo ai ia; ko hono hogofulu oe vahe oe efa oe mahoaa lelei koe feilaulau meakai fai mau be, ko hono vahe e taha i he bogibogi, mo hono vahe e taha i he efiafi.

21 E gaohi ia i he fakabaku aki ae lolo: bea hili a hono fakabaku, te ke omi ia ki loto: bea koe gaahi koga oe feilaulau meakai kuo fakabaku ke ke atu ia koe mea namu kakala kia Jihova.

22 Bea koe taulaeiki i hono gaahi foha aia kuo fakanofo ko hono togia e atu eia ia; koe fekau fai mau ia o taegata kia Jihova; e tutu ke vela a hono katoa o ia.

23 He koe feilaulau meakai kotoabe ki he taulaeiki e tutu hono kotoa o ia; e ikai kai ia.

¶ 24 Bea nae folofola a Jihova kia Mosese, o behe,

25 Lea kia Elone bea ki hono gaahi foha, o behe, Ko eni ae fono oe feilaulau ma ae agahala; i he botu koia oku tamate‘i ai ae feilaulau tutu e tamate‘i i ai ae feilaulau ma ae agahala i he ao o Jihova: oku fugani maonioni ia.

26 Koe taulaeiki oku ne atu ia ma ae agahala e kai eia ia: e kai ia i he botu tabu i he lotoa oe fale fehikitaki oe kakai.

27 Koia kotoabe e ala ki hono kakano e tabu ai ia: bea ka luluku aki ae toto o ia ki ha kofu, te ke fo aia nae luluku i he botu tabu.

28 Ka koe kulo umea nae haka ai ia e foa ia: bea kabau nae haka i he kulo balasa, bea e olo ia, bea fufulu aki ae vai.

29 Koe fānau tagata kotoabe i he kau taulaeiki e kai ia: oku fugani maonioni ia.

30 Bea e ikai kai ae feilaulau ma ae agahala, aia kuo omi a hono toto ki he fale fehikitaki oe kakai ke fai aki ae fakalelei, i he botu maonioni: e tutu ia i he afi.