1 Tokanga mai, ʻa kimoutolu, ʻa e kakai ʻo hoku siasí; he ko e moʻoni ʻoku ou pehē kiate kimoutolu naʻe lea ʻaki ʻa e ngaahi meʻá ni kiate kimoutolu koeʻuhí ke ʻaonga kiate kimoutolu pea mou poto ai.

2 Ka neongo ʻa e ngaahi meʻa ʻa ia kuo tohí, kuo tuku maʻu ai pē ia ki he kaumātuʻa ʻo hoku siasí talu ai pē mei he kamataʻangá, pea ʻe fai atu ai pē, ke nau tataki ʻa e ngaahi fakataha kotoa pē ʻo fakatatau ki he tuʻutuʻuni mo hono fakahinohinoʻi ʻa kinautolu ʻe he Laumālie Māʻoniʻoní.

3 Ka neongo iá ʻoku fekauʻi ʻa kimoutolu ke ʻoua naʻa mou kapusi ha taha mei hoʻomou ngaahi fakatahá, ʻa ia ʻoku fai ʻi he ʻao ʻo e māmaní.

4 ʻOku fekau foki kiate kimoutolu ke ʻoua naʻa mou kapusi ki tuʻa mei hoʻomou ngaahi houalotu sākalamēnití ha taha ʻoku kau ki he siasí; ka neongo iá, kapau kuo fai angahala ʻe ha taha, ʻoua naʻá ne kai mo inu kae ʻoua ke ne fai ha fakalelei.

5 Pea ko e tahá ʻoku ou pehē kiate kimoutolu, ʻoua naʻa mou kapusi ha taha mei hoʻomou ngaahi houalotu sākalamēnití ʻa ia ʻoku nau fekumi fakamātoato ki he puleʻangá—ʻoku ou lea ʻaki ʻeni ʻo kau kiate kinautolu ʻoku ʻikai ke kau ki he siasí.

6 Pea ʻoku ou toe lea kiate kimoutolu ʻo fekauʻaki mo hoʻomou ngaahi fakataha fakamaʻu ʻo e kau uluí, kapau ʻe ʻi ai ha niʻihi ʻoku ʻikai ʻo e siasí, ʻa ia ʻoku fekumi fakamātoato ki he puleʻangá, ʻoua naʻa mou kapusi ʻa kinautolu ki tuʻa.

7 Ka ʻoku fekauʻi ʻa kimoutolu ʻi he meʻa kotoa pē ke kole ki he ʻOtuá, ʻa ia ʻokú ne foaki ʻo lahí; pea ko e meʻa ko ia ʻe fakamoʻoniʻi kiate kimoutolu ʻe he Laumālié ʻoku ou loto foki ke mou fai ia ʻi he māʻoniʻoni kakato ʻo e lotó, ʻo ʻaʻeva ʻi he angatonu ʻi hoku ʻaó, pea fakakaukau ki he ikuʻanga ʻo homou fakamoʻuí, pea fai ʻa e meʻa kotoa pē ʻi he lotu mo e fakafetaʻi, koeʻuhí ke ʻoua naʻa kākaaʻi ʻa kimoutolu ʻe ha ngaahi laumālie ʻuli, pe ko e ngaahi tokāteline ʻa e kau tēvoló, pe ko e ngaahi fekau ʻa e tangatá; he ʻoku tupu ʻa e niʻihi mei he tangatá, pea mo e niʻihi mei he kau tēvoló.

8 Ko ia, mou tokanga telia naʻa kākaaʻi ʻa kimoutolu; pea mou kumi fakamātoato ki he ngaahi meʻafoaki lelei tahá koeʻuhí ke ʻoua naʻa kākaaʻi ʻa kimoutolu, ʻo manatuʻi maʻu ai pē hono ʻuhinga ʻoku foaki mai ai iá;

9 He ko e moʻoni ʻoku ou pehē kiate kimoutolu, ʻoku foaki mai iá ke ʻaonga kiate kinautolu ʻoku ʻofa kiate au mo tauhi ʻeku ngaahi fekaú kotoa pē, pea mo ia ʻoku feinga ke fai peheé; koeʻuhí ke ʻaonga ki he kakai kotoa pē ʻoku fekumi pe kole kiate aú, ʻa ia ʻoku nau kole kae ʻikai koeʻuhí ke maʻu ha fakaʻilonga ke nau fakaʻosi ia ʻi heʻenau ngaahi holi fakakakanó.

10 Pea ko e tahá, ko e moʻoni ʻoku ou pehē kiate kimoutolu, ʻoku ou loto ke mou manatuʻi maʻu ai pē, pea tauhi maʻu ai pē ʻi homou ʻatamaí pe ko e hā ʻa e ngaahi meʻafoaki ko iá, ʻa ia ʻoku foaki ki he siasí.

11 He ʻoku ʻikai ke foaki ʻa e meʻafoaki kotoa pē ki he tangata kotoa pē; he ʻoku lahi ʻa e ngaahi meʻafoakí, pea ʻoku foaki ha meʻafoaki ki he tangata taki taha ʻi he Laumālie ʻo e ʻOtuá.

12 ʻOku foaki ki he niʻihi ʻa e meʻafoaki ʻe taha, pea ki he niʻihi ʻa e meʻafoaki kehe, koeʻuhí ke ʻaonga ia ki he kakai kotoa pē.

13 ʻOku foaki ki he niʻihi ʻi he Laumālie Māʻoniʻoní ke nau ʻiloʻi ko Sīsū Kalaisí ko e ʻAlo ia ʻo e ʻOtuá, pea naʻe kalusefai ia koeʻuhi ko e ngaahi angahala ʻa e māmaní.

14 ʻOku foaki ki he niʻihi kehe ke nau tui ki heʻenau ngaahi leá, koeʻuhí ke nau lava foki ʻo maʻu ʻa e moʻui taʻengatá ʻo kapau te nau fai atu ai pē ʻi he faivelengá.

15 Pea ko e tahá, ʻoku foaki ki he niʻihi ʻi he Laumālie Māʻoniʻoní ke ʻiloʻi ʻa e ngaahi faikehekehe ʻi he pulé, ʻo hangē ko ia ʻe fakafiemālie ki he ʻEiki pē ko iá, ʻo fakatatau ki he finangalo ʻo e ʻEikí, ʻo fakafeʻungaʻi ʻene ngaahi ʻaloʻofá ʻo fakatatau ki he ngaahi tuʻunga kehekehe ʻo e fānau ʻa e tangatá.

16 Pea ko e tahá, ʻoku foaki ki he niʻihi ʻi he Laumālie Māʻoniʻoní ke ʻiloʻi ʻa e ngaahi faikehekehe ʻo e ngaahi ngāué pe ʻoku tupu ia mei he ʻOtuá, koeʻuhí ke foaki ʻa e ngaahi fakahā ʻa e Laumālié ki he tangata taki taha ke ʻaonga kiate ia.

17 Pea ko e tahá, ko e moʻoni ʻoku ou pehē kiate kimoutolu, ʻoku foaki ki he niʻihi ʻi he Laumālie ʻo e ʻOtuá ʻa e lea ʻo e potó.

18 ʻOku foaki ki he tokotaha kehe ʻa e lea ʻo e ʻiló, koeʻuhí ke lava ʻo akoʻi ʻa e tangata kotoa pē ke poto pea maʻu ʻa e ʻiló.

19 Pea ko e tahá, ʻoku foaki ki he niʻihi ke nau maʻu ʻa e tui ke fakamoʻui ʻa kinautolú;

20 Pea ʻoku foaki ki he niʻihi kehe ke nau maʻu ʻa e tui ke fakamoʻui.

21 Pea ko e tahá, ʻoku foaki ki he niʻihi ke fai ʻa e ngaahi mana;

22 Pea ʻoku foaki ki he niʻihi kehe ke nau kikite;

23 Pea ki he niʻihi kehe ʻa hono ʻiloʻi ʻo e ngaahi laumālié.

24 Pea ko e tahá, ʻoku foaki ki he niʻihi ke lea ʻi he ngaahi lea kehekehé;

25 Pea ʻoku foaki ki he tokotaha kehe hono fakamatalaʻi ʻo e ngaahi lea kehekehé.

26 Pea ʻoku tupu ʻa e ngaahi meʻafoakí ni kotoa pē mei he ʻOtuá, koeʻuhí ke ʻaonga ki he fānau ʻa e ʻOtuá.

27 Pea ki he pīsope ʻo e siasí pea kiate kinautolu ʻe fili mo fakanofo ʻe he ʻOtuá ke leʻohi ʻa e siasí pea hoko ko e kaumātuʻa ki he siasí, ʻe foaki kiate kinautolu ke ʻiloʻi ʻa e ngaahi meʻafoaki ko iá kotoa pē telia naʻa ʻi ai ha niʻihi ʻiate kimoutolu ʻe lau ʻoku nau maʻu ka ʻoku ʻikai te nau maʻu mei he ʻOtuá.

28 Pea ʻe hoko ʻo pehē ko ia te ne kole ʻi he Laumālié te ne maʻu ʻi he Laumālié;

29 Koeʻuhi ke foaki ki he niʻihi ke nau maʻu ʻa e ngaahi meʻafoaki ko iá kotoa pē, koeʻuhí ke ʻi ai ha ʻulu koeʻuhi ke ʻaonga ki he kāingalotú kotoa pē.

30 Ko ia ia ʻokú ne kole ʻi he Laumālié, ʻokú ne kole ʻo fakatatau ki he finangalo ʻo e ʻOtuá; ko ia ʻoku fai ʻo hangē ko ʻene kolé.

31 Pea ko e tahá, ʻoku ou pehē kiate kimoutolu, ʻoku totonu ke fai ʻa e ngaahi meʻa kotoa pē ʻi he huafa ʻo Kalaisí, ʻa e meʻa kotoa pē ʻoku mou fai ʻi he Laumālié;

32 Pea ʻoku totonu ke mou ʻoatu ʻa e fakafetaʻi ki he ʻOtuá ʻi he Laumālie koeʻuhí ko e tāpuaki kotoa pē ʻe tāpuakiʻi ʻaki ʻa kimoutolú.

33 Pea ʻoku totonu ke mou ako ke ngāue ʻaki ʻa e angamaʻá mo e anga-māʻoniʻoní ʻi hoku ʻaó maʻu ai pē. ʻE pehē. ʻĒmeni.