5. Ko e Feituʻu Mīsuli, ʻIlinoisi, mo ʻAiouā ʻo e USA

Tauʻatāina Naʻe fakahā mai ko e tuʻunga moʻoni ia ʻo Saioné (vakai ki he T&F 57:3). Naʻe tāpuakiʻi ʻa e kelekele ke tuʻu ai ʻa e temipale ʻi he ʻaho 3 ʻo ʻAokosi 1831. Naʻe tuli ʻa e Kāingalotú mei he Vahefonua Siakisoní ʻi he 1833.

Vaitafe Taumātaʻú Naʻe fononga mai ʻa Siosefa Sāmita mo e ʻApitanga ʻo Saioné mei Ketilani, ʻi ʻOhaiō, ki Mīsuli ʻi he 1834 ke toe fakafoki ʻa e Kāingalotu ʻi he Vahefonua Siakisoní ki honau kelekelé. Naʻe fakahā mai ʻa e T&F 105 ʻi he kauvai ʻo e vaitafe ko ʻení.

Hihifo Mamaʻo Ko e kolo lahi taha ʻeni ʻo e kau Māmongá ʻi Mīsuli. Naʻe tāpuakiʻi ʻa e kelekele ke langa ai ha temipale ʻi he feituʻu ko ʻení (vakai ki he T&F 115). Naʻe maʻu ʻe he Kau ʻAposetolo ʻe Toko Hongofulu-Mā-Uá ha ui mei he ʻEikí ʻi heni he ʻaho 8 ʻo Siulai 1838 ke nau ʻalu ʻo ngāue fakafaifekau ki he ʻOtu Motu Pilitāniá (vakai ki he T&F 118).

ʻĀtama-ʻonitai-ʻĀmani Naʻe fakahā mai ʻe he ʻEikí ʻa e feituʻu ko ʻení ʻa ia ʻoku tuʻu ʻi he faʻahi ki ʻolunga ʻo Mīsulí, ko e feituʻu fakatahaʻanga lahi ia ʻi he kahaʻú ʻa ia ʻe hāʻele mai ki ai ʻa Sīsū Kalaisi ke feʻiloaki mo ʻĀtama mo hono hako māʻoniʻoní (vakai ki he T&F 78:15; 107:53–57; 116).

Fale Fakapōpula Lipetī Naʻe tuku pōpula halaʻi heni ʻa Siosefa Sāmita mo ha niʻihi kehe mei Tīsema 1838 ki ʻEpeleli 1839. Ko e taimi ʻeni naʻe lahi ai ʻa e ngaahi faingataʻaʻia ʻo e Siasí, ko ia naʻe tautapa ai ʻa Siosefa ki he ʻEikí ke maʻu ha fakahinohino peá ne maʻu ai ʻa e T&F 121–123.

Nāvū ʻOku tuʻu ia ʻi he Vaitafe Misisipí, pea naʻe hoko ʻa e feituʻu ko ʻení ko e tānakiʻanga ia ʻo e Kāingalotú mei he 1839 ki he 1846. Naʻe langa heni ha temipale, pea naʻe kamata heni ʻa e ngaahi ouau hangē ko e papitaiso ki he maté, ko e ʻenitaumení, mo e fakamaʻu ʻo e ngaahi hoa malí. Naʻe fokotuʻu heni ʻa e Fineʻofá ʻi he 1842. ʻOku kau ʻa e ngaahi fakahā ko ʻení ʻi he ngaahi fakahā naʻe maʻu ʻi aí T&F 124–129.

Kātesi Naʻe fakapoongi heni ʻa e Palōfita ko Siosefa Sāmitá mo hono tokoua ko Hailamé ʻi he ʻaho 27 ʻo Sune 1844 (vakai ki he T&F 135).

Nofoʻanga Fakafaʻahitaʻu Momokó Naʻe hoko ʻeni ko e feituʻu fakataimi lahi taha ke nofo ai ʻa e Kāingalotú (1846–1848) ʻi heʻenau fononga ki he Teleʻa Sōlekí. Naʻe fokotuʻu ʻa e ʻApitanga ʻo ʻIsilelí ke nau fononga fakahihifó (vakai ki he T&F 136).

Kauniseli Palafi (Kanesivili) Naʻe fokotuʻu heni ʻa e Kau Palesitenisī ʻUluakí ke poupouʻi ʻe he Kāingalotú ʻi he ʻaho 27 ʻo Tīsema 1847, pea hoko ʻa Pilikihami ʻIongi ko e Palesitení.