TJS, Jenèz 9:4–6. Konpare avèk Jenèz 8:20–22
Apre Delij la, Noye mande Senyè a pou l pa modi tè a ankò.
4 Epi Noye te bati yon lotèl pou Senyè a, epi li te pran youn nan chak kalite bèt ki san tach yo, ak volay ki san tach yo, epi li te ofri yo kòm ofrann li boule sou lotèl la; epi li te di Senyè a mèsi, epi li te rejwi nan kè li.
5 Epi Senyè a te pale avèk Noye, epi l te beni li. Epi Noye te pran yon bon sant, epi l te di nan kè l;
6 M pral priye Senyè a, pou l pa modi tè a ankò poutèt sa lòm fè, paske panse ki nan kè lòm pa bon depi nan jenès li; epi pou l pa janm detwi okenn sa ki vivan ankò, jan l te fè a, toutotan tè a egziste;
TJS, Jenèz 9:10–15. Konpare avèk Jenèz 9:4–9
Bondye te tabli lakansyèl la nan syèl la kòm yon siy pou fè sonje alyans Li a avèk Enòk epi avèk Noye. Nan dènye jou yo, asanble jeneral Legliz Premyene a pral rasanble avèk moun ki jis yo sou tè a.
10 Men, san tout chè mwen bay pou moun manje kòm vyann dwe koule nan tè a, ki pran lavi a, epi moun pa dwe manje san.
11 Epi toutbon, san pa dwe koule, eksepte pou vyann, pou sove lavi nou; epi m pral reklame san chak bèt nan men nou.
12 Epi nenpòt moun ki vèsè san lòm, se lòm ki pral vèsè san li tou; paske lòm pa dwe vèsè san lòm.
13 Paske m bay yon kòmandman pou frè chak moun dwe prezève lavi lòt, paske m te kreye lòm nan pwòp imaj pa m.
14 Epi m ban nou yon kòmandman, nou dwe pwodiktif epi miltipliye; peple an abondans sou tè a, epi miltipliye sou tè a.
15 Epi Bondye te pale avèk Noye epi avèk pitit gason li yo, li te di yo konsa, Epi mwen menm, reyèlman, m ap etabli alyans mwen avèk nou, alyans m te fè avèk Enòk, papa nou an la, konsènan desandan nou yo apre nou.
TJS, Jenèz 9:21–25. Konpare avèk Jenèz 9:16–17
Bondye te tabli lakansyèl la nan syèl la kòm yon siy pou fè sonje alyans Li a avèk Enòk epi avèk Noye. Nan dènye jou yo, asanble jeneral Legliz Premyene a pral rasanble avèk moun ki jis yo sou tè a.
21 Epi lakansyèl la pral nan nyaj la; epi m ap gade l pou m kapab sonje alyans etènèl m te fè avèk Enòk, papa w; pou lè lèzòm kenbe tout kòmandman m yo, Siyon kapab vini sou tè a ankò, vil Enòk la m te leve monte avèk mwen an.
22 Epi se alyans etènèl mwen an, pou lè posterite w la anbrase laverite a, epi yo gade anlè, lè sa a Siyon pral gade anba, epi tout syèl yo pral souke avèk kontantman, epi tè a pral tranble avèk lajwa;
23 Epi asanble jeneral legliz premyene a pral desann soti nan syèl la, epi yo pral posede tè a, epi yo pral rete la jistan lafen an rive. Epi se alyans etènèl mwen an, m te fè avèk papa w Enòk.
24 Epi lakansyèl la pral nan nyaj la, epi m pral tabli alyans mwen avèk ou, alyans m te fè ant mwen menm avèk ou a, pou chak kreyati vivan ki gen kò fizik ki pral sou tè a.
25 Epi Bondye te di Noye: Se senbòl alyans la m tabli ant mwen menm avèk ou; pou tout chè ki pral vini sou tè a.