1 Sa sinugdanan ang ebanghelyo gisangyaw pinaagi sa Anak. Ug ang ebanghelyo mao ang pulong, ug ang pulong diha sa Anak, ug ang Anak uban sa Dios, ug ang Anak gikan sa Dios.

2 Ang mao sama diha sa sinugdanan sa Dios.

3 Ang tanan nga mga butang gihimo pinaagi kaniya; ug kon wala siya walay butang nga gihimo nga nahimo.

4 Diha kaniya mao ang ebanghelyo, ug ang ebanghelyo mao ang kinabuhi, ug ang kinabuhi mao ang kahayag sa mga tawo;

5 Ug ang kahayag nagdan-ag sa kalibutan, ug ang kalibutan wala makasabut niini.

6 Dihay usa ka tawo nga pinadala gikan sa Dios, kansang ngalan mao si Juan.

7 Ang mao mianhi sa kalibutan alang sa usa ka saksi, aron sa pagsaksi sa kahayag, aron sa pagsaksi sa ebanghelyo pinaagi sa Anak, ngadto sa tanan, nga pinaagi kaniya ang mga tawo unta motuo.

8 Siya dili mao ang kahayag, apan miabut aron sa pagsaksi niana nga kahayag,

9 Diin mao ang tinuod nga kahayag, nga nagdan-ag sa matag tawo nga moabut dinhi sa kalibutan;

10 Gani ang Anak sa Dios. Siya kinsa ania sa kalibutan, ug ang kalibutan gihimo pinaagi kaniya, ug ang kalibutan wala makaila kaniya.

11 Siya mianhi sa iyang kaugalingon nga mga tawo, ug ang iyang kaugalingon nga mga tawo wala modawat kaniya.

12 Apan kutob sa modawat kaniya, ngadto kanila siya mihatag og gahum aron mahimo nga mga anak sa Dios; ngadto kanila lamang kinsa motuo sa iyang ngalan.

13 Siya natawo, dili sa dugo, ni sa kabubut-on sa unod, ni sa kabubut-on sa tawo, apan sa Dios.

14 Ug ang mao nga pulong nahimo nga unod, ug mipuyo uban kanato, ug kita nakasud-ong sa iyang himaya, ang himaya ingon sa Bugtong Anak sa Amahan, puno sa grasya ug kamatuoran.

15 Si Juan nagsaksi kaniya, ug nagsangyaw, nag-ingon, Kini mao siya kang kinsa ako namulong; Siya kinsa moabut sunod kanako, gipili una kanako; kay siya una pa kanako.

16 Kay diha sa sinugdanan mao ang Pulong, gani ang Anak, kinsa nahimo nga unod, ug gipadala ngari kanato pinaagi sa kabubut-on sa Amahan. Ug kutob sa motuo sa iyang ngalan makadawat sa iyang kahingpitan. Ug sa iyang kahingpitan kitang tanan makadawat, bisan ang pagka-imortal ug sa kinabuhing dayon, pinaagi sa iyang grasya.

17 Kay ang balaod gihatag pinaagi ni Moises, apan ang kinabuhi ug kamatuoran miabut pinaagi ni Jesukristo.

18 Kay ang balaod subay sa usa ka kalibutanon nga sugo, ngadto sa pagpangalagad sa kamatayon; apan ang ebanghelyo subay sa gahum sa usa ka walay katapusan nga kinabuhi, pinaagi ni Jesukristo, ang Bugtong Anak, kinsa anaa sa sabakan sa Amahan.

19 Ug walay tawo nga nakakita sa Ginoo sa bisan unsa nga higayon, gawas kon siya nagpamatuod sa Anak; kay gawas kon kini pinaagi kaniya walay tawo nga maluwas.

20 Ug kini mao ang talaan ni Juan, sa diha nga ang mga Judeo mipadala og mga pari ug mga Levite gikan sa Jerusalem, sa pagpangutana kaniya; Kinsa ikaw?

21 Ug siya nagpaila, ug wala molimud nga siya mao si Elias; apan mikumpisal, nag-ingon; Ako dili mao ang Kristo.

22 Ug sila nangutana kaniya, nag-ingon; Sa unsa nga paagi ikaw nahimo nga Elias? Ug siya miingon, Ako dili mao kana nga Elias kinsa mopahiuli sa tanan nga mga butang. Ug sila nangutana kaniya, nag-ingon, Ikaw ba kana nga propeta? Ug siya mitubag, Dili.

23 Unya miingon sila ngadto kaniya, Kinsa ikaw? nga kami makahatag og usa ka tubag ngadto kanila nga mipadala kanamo. Unsa ang imong ikasulti sa imong kaugalingon?

24 Siya miingon, Ako mao ang tingog sa usa nga nagsangyaw diha sa kamingawan, Himoa nga tul-id ang agianan sa Ginoo, ingon sa gisulti sa propeta nga si Esaias.

25 Ug sila nga gipadala gikan sa mga Pariseo.

26 Ug sila nangutana kaniya, ug miingon ngadto kaniya; Kon mao ngano nga ikaw namunyag, kon ikaw dili mao ang Kristo, ni si Elias kinsa mao ang magpahiuli sa tanan nga mga butang, ni kana nga propeta?

27 Si Juan mitubag kanila, nag-ingon; Ako nagbunyag uban sa tubig, apan adunay usa nga nagbarug taliwala kaninyo, kinsa kamo wala makaila;

28 Siya kini mao kang kinsa ako nagpamatuod. Siya mao kana ang propeta, gani si Elias, kinsa, moabut sunod kanako, gipili una kanako, kansang liston sa sapatos ako dili takus sa paghubad, o kansang dapit ako dili makahimo sa pagpuli; kay siya mobunyag, dili lamang uban sa tubig, apan uban sa kalayo, ug uban sa Espiritu Santo.

29 Sa sunod nga adlaw si Juan nakakita nga si Jesus nagpaingon nganha kaniya, ug nag-ingon; Tan-awa ang Kordero sa Dios, kinsa nagkuha sa sala sa kalibutan!

30 Ug si Juan mipamatuod kaniya ngadto sa mga katawhan, nag-ingon, Kini mao siya kang kinsa ako miingon; Sunod kanako usa ka tawo moabut kinsa pinili una kanako; kay siya una kanako, ug ako nakaila kaniya, ug nga siya kinahanglan nga ipaila ngadto sa Israel; busa ako mianhi nga magbunyag uban sa tubig.

31 Ug si Juan mipamatuod, nag-ingon; Sa diha nga siya akong gibunyagan, ako nakakita sa Espiritu nga mikunsad gikan sa langit sama sa usa ka salampati, ug kini nagpabilin diha kaniya.

32 Ug ako nakaila kaniya; kay siya kinsa mipadala kanako aron magbunyag uban sa tubig, ang sama miingon ngari kanako; Diha kang kinsa ikaw makakita sa Espiritu nga nagkunsad, ug nagpabilin kaniya, siya mao ang magbunyag uban sa Espiritu Santo.

33 Ug ako nakakita, ug mipamatuod nga kini mao ang Anak sa Dios.

34 Kini nga mga butang nahitabo didto sa Bethabara, unahan sa Jordan, diin si Juan nagbunyag.

42 Ug siya midala kaniya ngadto ni Jesus. Ug sa diha nga si Jesus nakakita kaniya, siya miingon, Ikaw si Simon, ang anak ni Jona, ikaw pagatawgon og Cefas, diin mao, pinaagi sa paghubad, usa ka manalagna, o usa ka bato. Ug sila mga mananagat. Ug sila diha dayon mibiya sa tanan, ug misunod kang Jesus.