1 Ena ivakatekivu sa vunautaki na kosipeli ena vukuna na Luvena. Ia na kosipeli sai koya na vosa, ia na vosa sa tiko vata kei na Luvena, ia na Luvena sa tiko vata kei na Kalou, ia na Luvena sa mai vua na Kalou.

2 Ko koya vata oqo sa tiko ena ivakatekivu vata kei na Kalou.

3 Na veika kecega sa caka mai vua; ia mai na veika kecega sa caka, sa sega ni dua na ka sa caka me sega ni cakava ko koya.

4 Sa tu vua na kosipeli, ia na kosipeli sai koya na bula, ia na bula sai koya na rarama ni tamata;

5 Ka sa cilava na vuravura na rarama, ia na vuravura sa sega ni kunea.

6 Sa dua na tamata sa talai mai vua na Kalou, na yacana ko Joni.

7 Ko koya vata oqo sa lako mai ki vuravura me ivakadinadina, me vakadinadinataka na rarama, me kauta voli na kosipeli ena vukuna na Luvena, vei ira na tamata kecega, me vakabauta na tamata ena vukuna.

8 O koya e sega ni rarama ko ya, ia sa lako mai me vakadinadinataka na rarama ko ya,

9 Ko koya na rarama dina, sa vakararamataka na tamata kecega sa lako mai ki vuravura;

10 Io na Luve ni Kalou. Sai koya ka a tu e vuravura, ka a bulia ko koya na vuravura, ia a sega ni kilai koya ko vuravura.

11 A sa lako mai vei ira na nona, ia era sa sega ni ciqomi koya ko ira na nona.

12 Ia ko ira kecega sa ciqomi koya, sa solia vei ira ko koya na kaukauwa me ra yaco me Luve ni Kalou; io ko ira ga era sa vakabauta na yacana.

13 A sucu ko koya, segai ena vuku ni dra, se na lewa ni yago, se ena lewa vakatamata, ia sa mai vua na Kalou.

14 Ia ena vosa vata ga oqo sa caka kina na yago, ka tiko vata kei keda, eda sa raica na nona lagilagi, na lagilagi sa vaka na nona na Le Duabau ga nei Tamana, sa sinai ena loloma soli wale kei na dina.

15 Sa vakadinadinataki koya ko Joni, ka kaya, sai koya oqo kau sa vosa kina; ko Koya sa muri mai vei au, sa vinakati cake mai vei au; ni a sa tu e liu vei au.

16 Ni a sa tu ena ivakatekivu ko koya na Vosa, io na Luvena, ko koya sa caka ena lewe, ka sa talai mai vei keda ena lewa nei Tamana. Ia ko ira kecega sa vakabauta na yacana era na rawata na nona taucoko. Ia eda sa rawata na nona taucoko mai na ka sa sinai tu vua, io na tawa mate rawa kei na bula tawamudu ena nona loloma soli wale.

17 Ni sa soli na lawa mai vei Mosese, ia na bula kei na dina sa lako mai vei Jisu Karisito.

18 Ni sa yavutaki na lawa ena dua na ivakaro vakayago, ka sa yaco kina na lewa nei mate; ia na kosipeli sa yavutaki ena dua na bula tawacava, ena vukui Jisu Karisito, na Le Duabau ga nei Tamana, ko koya sa tiko ena lomaserei Tamana.

19 Ia sa sega ni dua na tamata sa raica na Kalou ena dua na gauna, kevaka e sa bera mada ni kila na Luvena; ni na sega sara ni vakabulai rawa e dua na tamata kevaka e sega ko koya.

20 Sai koya oqo na itukutuku kei Joni, ena gauna era sa tala mai kina na bete kei na Livai mai Jerusalemi ko ira na Jiu.

21 A sega ni vakatusa ka se talega ni cakitaka ni sai koya ko Iliesa; ia sa vakatusa, ka kaya, E sega ni koi au na Karisito.

22 Era sa tarogi koya, ka kaya; Se cava tale ko iko li ko Iliesa? Sa qai kaya ko koya, E sega ni koi au na Iliesa o koya me vakalesuya mai na veika kece. Era sa tarogi koya ka kaya, Ko iko beka na parofita ko ya? A sa kaya ko koya, e segai.

23 Era sa qai tukuna vei koya, Ko cei beka ko iko? Me keitou na laki tukuna vei ira era a talai keitou mai. Na cava ko tukuna me baleti iko?

24 Sa kaya ko koya, koi au na domona e dua sa kacikaci ena loma ni lekutu, dou vakadodonutaka na nona sala na Turaga, me vaka sa tukuna na parofita ko Aisea.

25 Ia ko ira sa talai mai era sa lako mai vei ira na Farisi.

26 Era sa qai tarogi koya, ka kaya vua; A cava ko sa veipapitaisotaki kina, kevaka ko sega ni Karisito, ka sega talega ni ko Iliesa ko koya me vakalesuya mai na ka kecega, ka sega talega ni o koya na parofita ko ya?

27 Sa qai sauma vei ira ko Joni, ka kaya; au sa veipapitaisotaki ena wai, ia sa tu ena kemudou maliwa e dua, ko dou sa sega ni kilai koya;

28 Sai koya au sa kauta voli na kena itukutuku. Sai koya na parofita ko ya, io ko Iliesa, ko koya, sa muri mai vei au, ka sa vinakati cake mai vei au, na wa ni nona ivava sa sega ni kilikili meu sereka, se na nona itikotiko sa sega ni rawa meu vakatawa; ni na veipapitaisotaki, sega walega ena wai, ia ena bukawaqa, kei na Yalo Tabu talega.

29 Ena siga ka tarava sa raici Jisu ko Joni ni sa lako mai vua, ka kaya; Raica na Lami ni Kalou, ko koya sa kauta tani na ivalavala ca ni vuravura!

30 Sa tukuni koya ko Joni vei ira na tamata ka kaya, Sai koya oqo au sa kaya kina; sa muri mai vei au e dua na tamata sa vinakati vakalevu cake mai vei au; ni sa tu e liu vei au ko koya, kau sa kilai koya, ka ni sa dodonu me vakatakilai ki Isireli; o koya au sa lako mai kina me veipapitaisotaki ena wai.

31 Sa vakadinadinataka ko Joni, ka kaya; Ni sa papitaisotaki mai vei au, Au a raica na Yalo ni sa lako sobu mai Lomalagi me vaka na ruve, ka mai ro toka vua.

32 Ia au sa kilai koya; ni ko koya a talai au mai meu veipapitaisotaki ena wai, sa kaya vei au ko koya oqo; ko koya ko na raica na Yalo ni siro sobu mai, ka mai toka vua, sai koya oqori ena veipapitaisotaki ena Yalo Tabu.

33 Ia kau sa raica, ka vakadinadinataka ni sai koya oqo na Luve ni Kalou.

34 A yaco na veika oqo mai Pecipara, ena tai kadua ni Joritani, ena vanua sa veipapitaisotaki kina ko Joni.

42 Ka sa kauti koya mai ki vei Jisu. Ia ni sa raici koya ko Jisu, sa kaya, O iko ko Saimoni na luvei Jona, ko na vakatokai ko Kifa, sai koya, na kena ivakadewa, a daurairai, se na vatu. Ia era sa gonedau. Ka ra sa biuta sara na ka kecega, ka muri Jisu.