1 Ka sa basika e dua na ivakatakilakila levu mai lomalagi, sa tautauvata kei na veika e vuravura; e dua na yalewa sa vakaisulu ena matanisiga, ka sa tu e ruku ni yavana na vula, ia e uluna na isala ka tinikarua na kena kalokalo.

2 Ia na yalewa ni sa tiko vua na gone, sa qolou, sa rarawa ni sa sucu, ka mosi ni sa via vakasucu.

3 Ia ni sa biuta mai e dua na gonetagane, o koya me na liutaka na veimatanitu kecega ena dua na ititoko kaukamea; ia na luvena sa kau cake vua na Kalou ena nona itikotiko vakaturaga.

4 Ka sa basika tale e dua na ivakatakilakila mai lomalagi; ka raica, sa dua na drekoni damudamu levu, sa vitu na uluna ka tini na kena ileu, ka vitu na isala vakatui e uluna. Ia na buina sa tuya voli e dua na ikatolu ni kalokalo ni lomalagi, ka sa viritaka sobu mai ki vuravura. Sa tu na drekoni e yasana na yalewa sa qai vakarau vakasucu, ka vakarau tu me kania na luvena ni sa sucu mai.

5 A sa dro na yalewa ki na lekutu, sa vakarautaka tu kina na Kalou e dua na vanua me baleti koya, me ra na vakani koya mai kea ena duanaudolu ruanadrau ka tolusagavulu na yabaki.

6 Ka sa yaco na ivalu mai lomalagi; era sa veivala vata kei na drekoni ko Maikeli vata kei ira na nona agilosi; era sa veivala vata kei ko Maikeli na drekoni vata kei ira na nona agilosi;

7 Sa sega kina ni qaqa vei Maikeli na drekoni, ka sega talega vua na gone se na yalewa sai koya na lotu ni Kalou, o koya sa sereki mai na nona mosi, ka kauta mai na matanitu ni Kalou kei na nona Karisito.

8 Sa sega talega ni kune mai lomalagi e dua na tikina me baleta na drekoni levu, ka a vakasavi tani; na gata makawa ko ya sa vakatokai na tevoro, ka sa vakatokai talega ko Setani, ko koya sa veretaka na vuravura taucoko; sa vakasavi tani mai ki vuravura; ka ra vakasavi tani vata kei koya na nona agilosi.

9 Ka’u sa rogoca e dua na domo levu sa kaya mai lomalagi, sa lako mai oqo na veivakabulai, kei na kaukauwa, kei na matanitu ni Kalou, kei na kaukauwa ni nona Karisito;

10 Ni sa vakasavi sobu na nona dauveibeitaki na tacida, ko koya sa dau beitaki ira ena mata ni Kalou ena siga kei na bogi.

11 Ni ra sa vakadrukai koya ena nona dra na Lami, ia ena vosa ni nodra ivakadinadina; ni ra sa sega ni lomana na nodra bula, ia era sa maroroya dei toka na nodra ivakadinadina io me yacova na mate. O koya me reki kina na lomalagi kei ira era sa tiko kina.

12 Ia ni sa oti na veika oqo au sa rogoca tale e dua na domo sa kaya, Ena ca vei ira sa vakatawai vuravura, io, kei ira era sa tiko ena veiyanuyanu ni wasawasa! ni sa lako mai vei iko na tevoro, ena cudru levu, baleta ni kila ni sa lekaleka na nona gauna.

13 Ni sa raica na drekoni ni sa vakasavi tani ki vuravura, sa vakacacani koya na yalewa sa vakasucuma mai na gonetagane.

14 O koya sa soli kina vua na yalewa e rua na taba ni dua na ikeli levu, me dro yani kina ki na lekutu, ki na nona tikina, ena vanua sa laki maroroi toka kina me dua na gauna, ena veigauna, kei na veimama ni dua na gauna, mai na mata ni gata.

15 Sa qai kaburaka mai gusuna na gata na wai me vaka na ualuvu me muria na yalewa, me rawa ni kuitaki tani yani kina ena ualuvu.

16 Sa vukea na yalewa na vuravura, ka sa dolava na gusuna na vuravura, ka tiloma na waluvu sa kaburaka mai gusuna na drekoni.

17 O koya sa cudru kina vua na yalewa na drekoni, ka lako me veivala kei ira na ivovo ni nona kawa na yalewa, ko ira era sa muria tiko na ivakaro ni Kalou, ka tu vei ira na ivakadinadina kei Jisu Karisito.