5 Xb’aan naq jo’q’e naq toj wanko chaq sa’ li tz’ejwalej, li reek’asihom li maak, li moko jo’ ta li chaq’rab’, kik’anjelak sa’ li qacha’al re taa’uuchinq choq’ re li kamk.

6 A’b’an anajwan kolb’ilo chaq chiru li chaq’rab’ li koowan wi’ chi chapcho, chi kamenaqo chik chiru li chaq’rab’, re naq took’anjelaq rik’in rak’il li musiq’ej, moko rik’in ta xnajteril li tz’iib’.

7 K’a’ru b’i’ taqaye? Ma maak li chaq’rab’? Maajo’q’e b’i’an. Ink’a’ b’an, moko xinnaw ta raj ru li maak, wi ta maawa’ xb’aan li chaq’rab’; xb’aan naq ink’a’ raj kinnaw ru li rahink-u, wi ta ink’a’ kixye li chaq’rab’, Matrahink-u.

8 A’b’anan li maak, li kixtaw xwankil xb’aan li taqlahom, kixk’anjela wik’in li jar paay chi atawank. Xb’aan naq chi maak’a’ li chaq’rab’, kamenaq li maak.

9 Xb’aan naq junxil yo’yookin chaq chi moko q’etb’il ta li chaq’rab’, a’b’an naq kichal lix taqlahom li Kristo, li maak kichal xyu’am, ut laa’in kinkam.

10 Ut naq ink’a’ kinpaab’ lix taqlahom li Kristo li kichal, li k’ojob’anb’il choq’ re li yu’amej, kintaw naq kixteneb’ li kamk sa’ inb’een.

11 Xb’aan naq li maak, naq kixtaw xwankil, kixtz’eqtaana li taqlahom, ut kinixb’alaq’i, ut kinkamsiik xb’aan.

12 A’b’anan, kintaw naq li chaq’rab’ sant, ut li taqlahom sant, ut tiik ru, ut us.

13 Ma k’eeb’il chi jo’kan li k’a’ru us choq’ kamk chiwu? Maajo’q’e b’i’an. Li maak b’an, re naq taak’utunq choq’ maak rik’in naq li k’a’ru chaab’il kixk’anjela li kamk wik’in; re naq li maak, xb’aan li taqlahom, taaruuq chi wank chi q’axal aj maak.

14 Xb’aan naq naqanaw naq li taqlahom a’an re musiq’ej; a’b’an naq kinwan rub’el li chaq’rab’, toj wankin chaq sa’ li tz’ejwalej, k’ayinb’ilin chaq rub’el li maak.

15 A’b’an anajwan wankin sa’ musiq’ejil; xb’aan naq li k’a’ru taqlanb’ilin chixb’aanunkil, ninb’aanu, ut li k’a’ru taqlanb’il naq ink’a’ tinkanab’ chi uxmank, ink’a’ ninkanab’ chi uxmank.

16 Xb’aan naq li k’a’ru ninnaw naq moko tiik ta, ink’a’ nawaj xb’aanunkil; xb’aan naq li k’a’ru maak, xik’ nawil.

17 Wi ut ink’a’ ninb’aanu li k’a’ru ink’a’ nawaj xkanab’ankil chi uxmank, nink’ulub’a li chaq’rab’, naq chaab’il, ut moko wankin ta rub’el tojb’a-maak.

18 Anajwan ut, moko laa’in ta chik li ninmaakob’; ninsik’ b’an xkub’sinkil li maak a’an li nawan wik’in.

19 Xb’aan naq ninnaw naq wik’in laa’in, malaj ut rik’in lin tib’el, maajun k’a’ru us nawan; xb’aan naq li ajok wan sa’ inch’ool, a’b’anan li b’aanunk re li k’a’ru us moko nintaw ta, ka’ajwi’ rik’in li Kristo.

20 Xb’aan naq li us li kinb’aanu raj naq kinwan rub’el li chaq’rab’, nintaw naq moko us ta, jo’kan naq ink’a’ ninb’aanu.

21 A’ut li ink’a’ us li ink’a’ raj kinb’aanu rub’el li chaq’rab’, nintaw naq us; a’an ninb’aanu.

22 Anajwan wi ninb’aanu, chi tenq’anb’il xb’aan li Kristo, li k’a’ru ink’a’ raj kinb’aanu rub’el li chaq’rab’, moko wankin ta rub’el li chaq’rab’; ut maawa’ chik naq ninsik’ xb’aanunkil li ink’a’ us; ninsik’ b’an xkub’sinkil li maak li nawan wik’in.

23 Nintaw ut naq rub’el chaq li chaq’rab’, naq kiwaj xb’aanunkil li us, kiwan li ink’a’ us wik’in; xb’aan naq ninsaho’ rik’in lix chaq’rab’ li Dios sa’ inch’ool sa’ waam.

24 Ut anajwan nawil jun chik li chaq’rab’, a’an ajwi’ lix taqlahom li Kristo, ut a’an wan chi tz’iib’anb’il sa’ ink’a’uxl.

25 A’b’an lix cha’al intib’el wankeb’ chi pleetik rik’in lix chaq’rab’il ink’a’uxl, ut chink’amb’al chi preexil sa’ lix chaq’rab’il li maak li wan sa’ xcha’al intib’el.

26 Ut wi ink’a’ ninkub’si li maak li wan wik’in, wi b’an rik’in li tz’ejwalej nink’anjelak chiru lix chaq’rab’il li maak; q’axal rahil winqin! ani taakoloq we chiru li tz’ejwalej re li kamk a’in?

27 Ninb’antioxi chiru li Dios sa’ xk’ab’a’ li Jesukristo laj Eechal qe, chi jo’kan, naq rik’in ink’a’uxl laa’in nink’anjelak chiru lix chaq’rab’ li Dios.