5 Kay sa panahon nga kita diha sa unod, ang kalihokan sa sala, diin dili pinasubay sa balaod, naglihok diha sa atong mga sakop aron sa pagdala og bunga ngadto sa kamatayon.

6 Apan karon kita giluwas gikan sa balaod diin kita gigunitan, ingon nga patay ngadto sa balaod, nga kita kinahanglan moalagad diha sa pagkabag-o sa espiritu, ug dili diha sa pagkadaan sa kalig-unan.

7 Unya unsa ang atong isulti? Sala ba ang balaod? Ang Dios nagdili. Dili, ako wala makaila og sala, apan pinaagi sa balaod; kay ako wala makaila og kahigal, gawas sa balaod nga nag-ingon, Ikaw dili mangibug.

8 Apan ang sala, nakakita og higayon pinaagi sa sugo, mihimo ngari kanako sa tanan nga matang sa kaulag. Kay kon wala ang balaod ang sala patay.

9 Kay sa makausa ako nabuhi nga walay kalapasan sa balaod, apan sa diha nga ang sugo ni Kristo miabut, ang sala nabuhi, ug ako namatay.

10 Ug sa diha nga ako wala motuo sa sugo ni Kristo nga miabut, diin gi-orden ngadto sa kinabuhi, ako nasayud niini nga maghukom kanako ngadto sa kamatayon.

11 Kay ang sala, nakakita og higayon, milimud sa sugo, ug milimbong kanako; ug pinaagi niini ako gipatay.

12 Bisan pa niana, ako nakakita sa balaod nga balaan, ug sa sugo nga balaan, ug makiangayon, ug maayo.

13 Unya mao ba kana nga hain ang maayo nagdala og kamatayon ngari kanako? Kana dili mahimo. Apan ang sala, nga kini mahimo nga makita nga sala pinaagi niana hain ang maayo nagdala og kamatayon ngari kanako; kana nga sala, pinaagi sa sugo, unta mahimo nga hilabihan sa pagkasala.

14 Kay kita nasayud nga ang sugo espirituhanon; apan sa diha nga ako ubos sa balaod, ako usa pa ka kalibutanon, nakabig ubos sa sala.

15 Apan karon ako espirituhanon; kay kana diin ako gisugo sa pagbuhat, ako nagbuhat; ug kana nga ako gisugo sa dili pagtugot, ako wala motugot.

16 Kay unsa nga ako nahibalo nga dili matarung, ako dili mobuhat, kay kana diin sala, ako nagdumot.

17 Kon unya ako dili mobuhat niana diin ako wala motugot, Ako nag-uyon ngadto sa balaod, nga kini maayo; ug ako dili pagahukman.

18 Unya karon, kini dili na ako ang nagbuhat og sala; apan ako nagtinguha sa pagbuntog niana nga sala diin nagpuyo dinhi kanako.

19 Kay ako nasayud nga dinhi kanako, nga sa ato pa, diha sa akong unod, nagpuyo ang dili maayo nga butang; kay ang pagbuhat sa kabubut-on uban kanako, apan ang paghimo niana diin maayo ako wala makakaplag, diha lamang ni Kristo.

20 Kay ang maayo nga ako unta nga mabuhat sa diha nga ubos sa balaod, akong nakita nga dili maayo; busa, ako dili mobuhat niini.

21 Apan ang dautan nga ako dili mobuhat ubos sa balaod, ako nakakita nga maayo; kana, ako mobuhat.

22 Karon kon ako mobuhat niana, pinaagi sa panabang ni Kristo, ako dili mobuhat ubos sa balaod, ako dili ubos sa balaod; ug ako wala na maninguha sa pagbuhat og sayop, apan sa pagbuntog sa sala nga nagpuyo dinhi kanako.

23 Ako busa nakakita nga ubos sa balaod, nga kon ako magbuhat og maayo ang dautan nag-uban kanako; kay ako nahimuot diha sa balaod sa Dios sumala sa kalag sa tawo.

24 Ug karon ako nakakita og lain nga balaod, gani ang sugo ni Kristo, ug kini napatik sa akong hunahuna.

25 Apan ang mga bahin sa akong lawas nakig-away batok sa balaod sa akong hunahuna, ug nagdala kanako ngadto sa pagkabihag sa balaod sa sala diin anaa sa bahin akong lawas.

26 Ug kon Ako dili makabuntog sa sala nga ania kanako, apan sa unod moalagad sa balaod sa sala; O dautan nga tawo nga ako! kinsa ang moluwas kanako gikan sa lawas niini nga kamatayon?

27 Ako nagpasalamat sa Dios pinaagi ni Jesukristo nga atong Ginoo, sa ingon, aron uban sa hunahuna ako sa akong kaugalingon moalagad sa balaod sa Dios.