Te Katooto Raoi Man Ana Boki Aberaam

Tamnei 1. Korobo, e tei ibukin te moan karikibwai, te kabanea ni kaan nakon te tiretio, ke ana maeka te Atua. Te moan n te tautaeka, te kabanea ni kaineti ma aron bairean te tai. Aron baireana ni kaineti ma tain te tiretio, tain te tiretio are e kabotaua teuana te bong ma te mwanokunibai. Teuana te bong i Korobo bon titebo ma teuana te nga te ririki ni kaineti ma aron baireana n te aonaba aei, are e bon aranaki irouia I-Aikubita bwa Ia-o-e.

Tamnei 2. E tei i rarikin Korobo, ae aranaki irouia I-Aikubita bwa Oribiriti, are bon te tautaeka ae kakannato are i mwina n te karikibwai ae te kabanea ni kaan ma te tiretio ke te tabo are e maeka iai te Atua; e taua kiingin te mwaaka naba, ni kaineti ma buraneti ake tabeua; n aron are kaotaki iroun te Atua nakon Aberaam, ngke e anga karea i aon te baonikarea, are e tia ni kateia ibukin te Uea.

Tamnei 3. E karaoaki bwa e na tei ibukin te Atua, are e tekateka i aon ana kaintokanuea, ni kunikaiaki ma te mwaaka ao te kariaia; ma te baunuea ae te oota ae akea tokina i aon atuna; e tei naba bwa Kiingin taeka aika kakannato n te Nakoanibonga ae Tabu, n aron are kaotaki nakon Atam n te Nne n Aroka are Eten, ao nakon naba Teeta, Noa, Merekitereka, Aberaam, ao ni kabane naake e kaotaki nakoia te Nakoanibonga.

Tamnei 4. Are titebo ma te taeka n Ebera ae Raukiang, are kanikinaean annang, ke annang i karawa; manin te ware naba, are titebo ma teuana te nga irouia I-Aikubita; are titebo ma bairean te tai i Oribiriti, are e botau ma Korobo n ana katomimi ao arona ni bairea te tai.

Tamnei 5. E aranaki n te taetae n Aikubita bwa Eniti-ko-aon-toti; aio bon teuana mai buakon buraneti naba are e tautaeka, ao e taekinaki irouia I-Aikubita bwa bon Taai, ao e tangoa ootana man Korobo rinanon Kae-e-wanrati, are bon te Kiing ae kakannato ke, n taekinana teuana, te mwaaka are tautaeka, are tautaekani tebwi ma nimaua buraneti ke itoi aika aki bibitaki nneia, n aron naba Buroiti ke Namwakaina, te Aonaba ao Taai n aia katomimi ni katoa ririki. Te buraneti aio e karekea mwaakana rinanon Kiri-buroti-iti-eti, ke A-ko-kou-bim, itoi ake a kanikinaeaki ni waare aika 22 ao 23, a karekei otaia man ana katomimi Korobo.

Tamnei 6. E tei ibukin te aonaba aei ni mwakorona ake aua.

Tamnei 7. E tei ibukin te Atua ae tekateka i aon ana kaintokanuea, ni kaotii rinanon karawa Kiingin taeka aika kakannato n te Nakoanibonga; n aron naba, te kanikina ibukin te Tamnei ae Raoiroi nakon Aberaam, n rabwatan te taobe.

Tamnei 8. Kanoana bon koroboki aika aki kona ni kaotaki nakon te aonaba; ma e bon kona ni karekeaki n ana Tembora ae Tabu te Atua.

Tamnei 9. E aki riai ni kaotaki n te tai aei.

Tamnei 10. Ngaia naba.

Tamnei 11. Ngaia naba. Ngkana te aonaba e kona ni kunei waare aikai, e riai ngkanne. Amen.