Juon Lukkuun Malen Jān Bok In Ebream

Annan̄ 1. Kolob, ej kakōļļeen kōm̧anm̧an eo kein kajuon, epaakļo̧k tata n̄an selestial, ak jikin jokwe eo an Anij. Kein kajuon ilo kien, eo āliktata ej kake jon̄jon̄ an iien. Jon̄jon̄ eo ekkar n̄an iien an selestial, selestial eo me iien ej meļeļein juon raan n̄an juon kubit. Juon raan in Kolob ej āinwōt juon to̧ujin iiō ekkar n̄an jon̄jon̄ eo an laļ in, eo kar ņa etan jān riIjipt Jah-oh-eh.

Annan̄ 2. Jutak iturin Kolob, etan jān riIjipt ro Oliblish, eo ej kōm̧anm̧an eo eļap epaakļo̧k n̄an selestial ak jikin eo Anij ej jokwe ie; ej kabwijere ki eo kiin kajoor barāinwōt, kake planet ko jet; āinwōt kar kwaļo̧k jān Anij n̄an Ebream, ke eaar ajeļo̧k katok eo ioon lokatok eo, eo e eaar kalōk e n̄an Irooj.

Annan̄ 3. Kar kōm̧m̧ane n̄an bōk jikin Anij, ej jijet ioon tūroon eo An, Ej nuknuk kōn kajoor im maron̄; kōn juon kūrawūn in meram ejjeļo̧k jem̧ļo̧kin ioon bōran; ej bōk jikin barāinwōt Naan ko rej Ki ko reļļap an Priesthood eo Ekwōjarjar, āinwōt kar kwaļo̧ki n̄an Adam ilo Jikin Kallib in Iden, āinwōt kar barāinwōt n̄an Set, Noa, Melkizedek, Ebream, im aolep ro im kar kwaļo̧k Priesthood eo n̄an er.

Annan̄ 4. Uwaak ko n̄an naan in Hibru eo Raukeeyang, eo ej bōk jikin depakpak eo, ak mejatoto in lan̄ ko; barāinwōt juon annan̄ eo ilo bōnbōn, ilo kajin Ijipt ej bōk jikin juon to̧ujin; im uwaak eo n̄an jon̄jon̄ in iien an Oliblish, eo ej jon̄an wōt Kolob ilo erro̧o̧lo̧l ko an im ilo an jon̄jon̄ iien.

Annan̄ 5. Etan ilo kajin Ijipt ej Enish-go-on-dosh; En̄in ej juon ian planet ko rej tōl barāinwōt, im riIjipt rej ba kake ke ej Al, im n̄an en bōk meram eo an jān Kolob kōn wāween eo Kae-e-vanrash, eo ej juon Ki eļap, ak, ilo bar jet naan ko, kajoor in tōl eo, eo ej peek jon̄oulļalem bar jet planet ko retōt ak iju ko retōt, āinwōt Floeese ak Allōn̄, Laļ in im aļ ilo erro̧o̧lo̧l ko aer kajjojo iiō. Planet in ej bōk an kajoor kōn wāween in Kil-flos-is-es, ak Hah-ko-kau-beam, iju ko rej bōk jikier kōn bōnbōn kein 22 im 23, im rej bōk meram jān erro̧o̧lo̧l ko an Kolob.

Annan̄ 6. Ej bōk jikin laļ in ilo kuwōta ko emān an.

Annan̄ 7. Ej bōk jikin Anij ej jijet ioon An tūroon, ej kwaļo̧k kōn lan̄ ko Naan ko rej Ki ko reļļap an Priesthood eo; āinwōt, barāinwōt, kakōļļe eo an Jetōb Kwōjarjar n̄an Ebream, ilo jekjekin juon m̧uļe.

Annan̄ 8. Ewōr ie jeje ko ban maron̄ kwaļo̧ki n̄an laļ; a remaron̄ bōki ilo Tampeļ eo Ekwōjarjar an Anij.

Annan̄ 9. Eaikuj jab kwaļo̧ke ilo iien in.

Annan̄ 10. Barāinwōt.

Annan̄ 11. Barāinwōt. Eļan̄n̄e laļ emaron̄ lo meļeļein bōnbōn kein, innām kōtļo̧ke. Amen.