Jeje Ko Rekwojarjar
Kadkad In

Kadkad In

Bōōr eo Eļap Wōņāān ej juon kāālet in jerbal ko rejenolo̧k rej kitbuuj elōn̄ m̧wian̄ōn ko an tōmak im katak ko an Kabun̄ eo an Jisōs Kraist im Armej ro Rekwōjarjar ilo Raan ko Āliktata. Jerbal kein rekar ukōt im ekkwaļo̧k in Rikanaan Josep Smith, im enan̄in aolepāer rekar likūti ilo jeje ilo nuujpeba ko an Kabun̄ ilo raan ko an.

Koba in jerbal kein m̧oktata ium̧win taitōl in Bōōr eo Eļap Wōņāān ekar kōm̧m̧an ilo 1851 jān Elder Franklin D. Richards, eo ilo tōre eo eaar juon uwaan Ko̧o̧njeļ eo an Jon̄oulruo im president an British Mijen. Jibadbad eo an ekar n̄an kōm̧m̧an bwe en ļapļo̧k maron̄ tōpari jet ian jeje ko reaorōk im ekar jab kanooj ļap maron̄ in kar kajeededi ilo iien eo an Josep Smith. Eļak kar ļapļo̧k ro uwaan Kabun̄ in iaolepān Europe im Amedka, ekar mennin aikuj n̄an kōm̧m̧an bwe jeje kein ren pojak. Bōōr eo Eļap Wōņāān ekar ļap kōjerbale im tok ālik ekar erom juon jeje ekwōjarjar an Kabun̄ jān em̧m̧akūt an Presidency eo Kein Kajuon im kwelo̧k eo eļap eo ilo Salt Lake City ilo Oktoba 10, 1880.

Jet ekbel ko rekar kōm̧m̧an ilo men ko kobban āinwōt aikuj ko an Kabun̄ in kar kūr n̄an i. Ilo 1878 m̧ōttan ko an bok in Moses rekar jako ilo edition eo m̧oktata rekar kobatok. Ilo 1902 jet m̧ōttan Bōōr eo Eļap Wōņāān im rekar ālijinmen im rekar barāinwōt jeje ilo Katak im Bujen Ko rekar m̧aniļo̧k. Karkan jebta ko im eoon ko, ippān kōmmeļeļe ko ilaļ, ekar kōm̧m̧an ilo 1902. Publication eo m̧oktata ilo peij ko ruo column, ippān laajrak in naan im kōmmeļeļe ko ilo jem̧ļo̧kin, ekar ilo 1921. Eaar ejjeļo̧k bar oktak ko kōm̧m̧ani m̧ae Eprōļ 1976, ke ruo jeje in revelesōn ko kar kobaikitok. Ilo 1979 jeje kein ruo kar kōm̧akūti jān Bōōr eo Eļap Wōņāān im kar likūti ilo Katak im Bujen Ko, ijo rej kiiō waļo̧k āinwōt jekjōn 137 im 138. Ilo edition eo rainin jet oktak rekar kōm̧m̧an bwe jeje ko ren errā ippān document ko m̧oktaļo̧k.

Ijin ilaļ ej juon kadkadin men ko kobban rainin ilo tukaduin:

  1. Kāālet ko jān Bok in Moses. Juon m̧ōttan bōk jān bok in Jenesis jān ukok eo an Josep Smith kōn Baibōļ eo, eo eaar jinoe ilo Juun 1830.

  2. Bok in Ebream. Juon ukok im̧wem̧we jān jetōb jān jeje ko an Ebream. Josep Smith ekar jino ukok eo ilo 1835 eo ālkin an kar bōk jet bok lemlem papyri in Ijipt. Ukok eo kar kajedede ilo lelkan ko ilo Times and Seasons ijjino ilo M̧aaj 1, 1842, ilo Nauvoo, Illinois.

  3. Josep Smith—Matu. Juon m̧ōttan jān naan in kam̧ool eo an Matu ilo ukok eo an Josep Smith kōn Baibōļ eo (lale Katak im Bujen Ko 45:60–61 kōn naan in jiron̄ jān lan̄ n̄an jinoe ukok eo an Kallim̧ur Ekāāl).

  4. Josep Smith—Bwebwenato. M̧ōttan ko bōki jān lukkuun naan in kam̧ool im bwebwenatoin Josep Smith, eo e kab rijeje ro an kar kōpooje ilo 1838–1839 im eo me kar kajeedede ilo lelkan ko ilo Times and Seasons ilo Nauvoo, Illinois, jinoe ilo M̧aaj 15, 1842.

  5. Laajrak in Tōmak Ko an Kabun̄ eo an Jisōs Kraist im Armej ro Rekwōjarjar ilo Raan ko Āliktata. Juon ennaan jān Josep Smith eo kar kajeedede ilo Times and Seasons M̧aaj 1, 1842, ippān tok juon bwebwenato ekadu kōn Kabun̄ in eo ekkā jeļā ke ej Wentworth Lōta.