Ai Vakatakarakara mai na iVola i Eparaama

iYaloyalo 1. Ko Kolobo, na ulumatua ni ka sa buli, ka sa voleka duadua ki na silesitieli, se na itikotiko ni Kalou. Sa liu ena veiliutaki, sa berabera duadua na toso ni kena gauna. Na kena ivakarau e vaka na gauna vakasilesitieli, ia na gauna vakasilesitieli, sa tautauvata na dua na siga ki na dua na kiupiti. E dua na siga mai Kolobo sa tautauvata kei na dua na udolu na yabaki ena ivakarau ni gauna ena vuravura oqo, ka ra dau vakatoka na kai Ijipita ko Ja-o-e.

iYaloyalo 2. E tu volekati Kolobo, era vakatoka na kai Ijipita ko Olivilisi, oqo na ikarua ni ka buli liu ka volekata yani na silesitieli se na vanua e tiko kina na Kalou; sa tu kina na dodonu ni vakatulewa e baleta na veivuravura tale eso; me vaka sa vakatakila na Kalou vei Eparaama, ena nona vakacabo isoro ena dua na icabocabo ni soro, ka a tara ko koya vua na Turaga.

iYaloyalo 3. Sa buli me ivakatakarakara ni Kalou, ni dabe tiko ena nona idabedabe vakaturaga, a sa vakaisulu ena kaukauwa kei na lewa; a sa tokara na isala ni rarama tawamudu e uluna; sa ivakaraitaki tale ga ni veivosa Bibi ni Matabete Tabu, me vaka sa vakatakilai vei Atama ena Were ko Iteni; io vei Seci tale ga kei Noa, kei Melikiseteki kei Eparaama, kei ira kecega sa vakatakilai vei ira na Matabete.

iYaloyalo 4. E tautauvata kei na vosa vaka-Iperiu na Raukiana, se na maliwa lala, se na maliwa lala ni lomalagi; e dua talega na matanivika, ena vosa vaka-Ijipita oya na dua na udolu; ka tautauvata kei na ivakarau ni gauna mai Olivilisi ka sa tautauvata na cowiri ni gauna mai Kolobo.

iYaloyalo 5. A yacana vaka-Ijipita na Inisi-qo-oni-dosi; oqo e dua tale ga na vuravura veiliutaki, ka ra kaya na kai Ijipita ni oya na Matanisiga, ia sa rawata na nona rarama mai Kolobo ena Kai-e-vanarasi sai koya na Kaukauwa levu, se, ena dua tale na kena itukutukuni, na kaukauwa ni veiliutaki, ka liutaki ira e tinikalima tale na vuravura tudei se kalokalo, me vakatalega kina na Foloese se na Vula, na Vuravura oqo kei na Matanisiga ena kedra cowiri e veiyabaki. Ia na vuravura oqo sa rawata na nona kaukauwa ena Kili-folosi-isi-esi, se A-ko-kau-vini na kalokalo e rua ka vakaraitaki ena naba 22 kei na 23; ia erau sa rawata na nodrau rarama mai na cowiri nei Kolobo.

iYaloyalo 6. Ai vakaraitaki ni vuravura oqo kei na kena iwasewase e va.

iYaloyalo 7. Sa vakaraitaka na Kalou ni dabe tiko ena nona idabedabe vakaturaga; sa vakatakila kina mai lomalagi na veivosa Bibi ni Matabete; me vakatalega kina, na ivakatakilakila ni Yalo Tabu a soli vei Eparaama, ia sa vaka na ruve.

iYaloyalo 8. Sa tu kina na volavola eso ka na sega ni rawa ni vakatakilai ki vuravura; ia ena tu ga ena Valetabu ni Kalou.

iYaloyalo 9. Me na kakua mada ni vakatakilai ena gauna oqo.

iYaloyalo 10. Tautauvata kei na 9.

iYaloyalo 11. E vakakina. Ia ke sa rawa me ra kunea na iwiliwili oqo na kai vuravura, sa daumaka sara. Emeni.