Iotebwa Timiti—Mataio

1 Bwa I taku nakoimi, bwa kam na aki noorai man te tai aei ao n ataia bwa boni Ngai teuare e koreaki taekana irouia burabeti, ni karokoa kam na kangai: E na kakabwaiaaki teuare e roko n aran te Uea, n nangin karawa, ao ni kabane anera aika tabu ma ngaia. Ngkanne a ataia ana reirei bwa e na manga oki nako aon te aonaba, i mwin are e tia ni kamimitongaki ao ni baunaki i angatain te Atua.

2 Ao Iesu e otinako, ao e kitana te tembora; ao a roko ana reirei nakoina, bwa a na ongora irouna, ni kangai: Te mataniwi, kaota nakoira ni kaineti ma kateitei n te tembora, n aron are ko a tia n taekinna—A na uruakaki, ao n tiku iroumi n akea kaaina.

3 Ao Iesu e taku nakoia: Kam aki noori baikai ni kabane, ao kam aki mataata iai naba? E koaua ae I taekinna nakoimi, e na bon akea ae na tiku ikai, i aon te tembora aei, te atibu teuana i aon teuana ae na aki kabwakaaki.

4 Ao e kitannia Iesu, ao e nako aon te Maunga are Oriweta. Ao ngke e tekateka i aon te Maunga are Oriweta, ana reirei a nakoina n ti ngaiia, ni kangai: Tuangira te tai are a na riki baikai ake ko a tia n taekinna ni kaineti ma uruakan te tembora, ao I-Iutaia; ao tera kanikinaean rokom, ao tokin te aonaba, ke kamaunakiia ake a buakaka, are bon tokin te aonaba?

5 Ao e kaeka Iesu, ao e taku nakoia: Taratarai ngkami bwa e na akea te aomata ae na mwamwanai ngkami.

6 Bwa a mwaiti aika a na roko n arau, ni kangai—Ngai te Kristo—ao a na mwamwanaia aika mwaiti;

7 Ngkanne a na uoti ngkami bwa kam na karawawataaki, ao a na kamatei ngkami, ao kam na ribaki irouia botanaomata ni kabaneia, ibukin arau.

8 Ao ngkanne a na mwaiti aika a na un, ao a na kamwamwane imarenaia, ao a na kairiribai i marenaia;

9 Ao a mwaiti burabeti ni kewe aika a na teirake, ao a na mwamwanaia aika mwaiti;

10 Ao ibukina bwa e na korakora te buakaka, aia tangira aika mwaiti e na tabe ni mauna;

11 Ma ane e tiku n teimatoa ao e aki konaaki, te aomata anne e na kamaiuaki.

12 Ngaia are, ngkana ko noora ribakin te urubwai, are e taekinaki iroun Taniera te burabeti, ni kaineti ma uruakan Ierutarem, ngkanne ko na tei n te tabo ae tabu; ane e warekia e riai n ata nanona.

13 Ngkanne a riai nake i Iutea ni birinako nakon maunga;

14 E riai are e mena i taubukin te auti ni birinako, ao n aki oki n anaa te bwai teuana man ana auti;

15 Ke ane n te tawana tai oki rikaaki n anai ana kunnikai;

16 Ao te kananoanga nakoia ake a bikoukou, ao nakoia ake a kammama ni boong akekei.

17 Ngaia are, tataro ngkami nakon te Uea bwa birinakomi tiaki n tain te kamwaitoro, ke n te Tabati;

18 Bwa ngkanne, ni boong akekei, e na korakora te kangaanga i aoia I-Iutaia, ao i aoia kaain Ierutarem, ae tuai man kanakoaki mai mwaaina nako aon Iteraera, iroun te Atua, man moan tein ueaia ni karokoa te tai aei; akea, ke a na aki manga kanakoaki nako aon Iteraera.

19 Bwaai ni kabane ake a tia ni bwakaria bon tii moan taian kananokaawaki ake a na roko nako aoia.

20 Ma ti ngkana a kakimototoaki boong akekei, bon akea aia aomata ae na kamaiuaki; ma bon tii ibukiia naake a rineaki ni kaineti ma te berita ae tabu, boong akekei a na kakimototoaki.

21 Nooria, bwaai aikai I a tia n taekini nakoimi ni kaineti ma I-Iutaia; ao, teuana riki, i mwin kangaanga ni boong akekei, ake a na roko nako aon Ierutarem, ngkana iai te aomata ae na kangai nakoimi, Noria, ikai te Kristo, ke ikekei, tai kakoauaa;

22 Bwa ni boong akekei a na teirake naba Kristo ni kewe, ao burabeti ni kewe, ao a na kaoti kanikina aika korakora ao bwaai aika kamiimi, n te aro, are, ngkana a kona, a na burebureia naba ake a rineaki, ake a rineaki ni kaineti ma te berita ae tabu.

23 Nooria, I taekini baikai nakoimi bon ibukiia ake a rineaki; ao ngkami naba kam na ongo taekani buaka, ao tanuani buaka; taraia bwa kam na aki raraoma, bwa ni kabane ake I a tia ni tuangkami a na bon koro bukiia; ma e tuai roko te toki.

24 Nooria, I a tia n tuangkami mai mwaaina;

25 Mangaia are, ngkana a na taekinna nakoimi: Nooria, e mena n te rereua; tai nako iai: Nooria, e mena i nanon ruu aika raba; tai kakoauaa;

26 Bwa n ai aron ootan te ingabong ae roko mai mainiku, ao e oota naba nako maeao, ao n rabuna te aonaba ae bwanin, ai bon aron naba rokon Natin te Aomata.

27 Ao ngkai N na kaota nakoimi te taetae ni kaikonaki. Nooria, ike e mena iai te rabwata ae mate, ane a na ikotaki iai taian ikare; bon ti te arona ma ikotakiia au aomata aika rineaki man mwakoron te aonaba ake aua.

28 Ao a na ongo taekani buaka, ao tanuani buaka.

29 Nooria I taetae bon ibukiia ake I rineia; bwa e na teirake te botanaomata n ekanako te botanaomata, ao uean temanna n ekanako uean temanna; a na roko rongo, ao aoraki aika kamamate, ao mwaeiein te aba, n taabo aika mwaiti.

30 Ao teuana riki, ibukina bwa e na korakora te buakaka, aia tangira aomata e na tabe ni mauna; ma ane e aki konaaki, te aomata anne e na kamaiuaki.

31 Ao teuana riki, te Euangkerio n te Abanuea aei e na tataekinaki n te aonaba ni kabane, bwa te kakoaua nakoia botanaomata ni kabaneia, ao ngkanne e na roko te toki, ke kamaunakiia aika buakaka.

32 Ao teuana riki ribakin te urubwai, are e taekinaki iroun Taniera te burabeti, e na koro bukina.

33 Ao n te tai naba arei i mwin te karawawata ni boong akekei, e na karooaki taai, ao namwakaina e na aki anga otana, ao taian itoi a na bwaka mai karawa, ao mwaakan karawa a na ioioaki.

34 E koaua, ae I taku nakoimi, te roro aei, ike a na kaotaki iai bwaai aikai, e na aki mauna nako ni karokoa ae bwaai ni kabane ake I tuangkami a na koro bukiia.

35 E ngae ngke, a na roko boong, are e na mauna iai karawa ma aonaba; ma au taeka a na bon aki mauna, ma a na bane ni koro bukiia.

36 Ao, n aron are I taekinna mai mwaina, i mwin kangaanga ni boong akekei, ao mwaakan karawa a na ioioaki, ngkanne e na kaoti kanikinaean Natin te Aomata i karawa, ao ngkanne a na bane baronga n te aonaba n tang n nanokawaki; ao a na noora Natin te Aomata n roko n nangin karawa, ma te mwaaka ao te mimitong ae korakora;

37 Ao ane e kawakina au taeka, e na aki burebureaki, bwa e na roko Natin te Aomata, ao e na kanakomaia ana anera i mwaaina ma tangin te buu ae korakora, ao a na botiia nikiraia ake e rineia man aang ake aua, mai tabo karawa are tueana nakon tabona are teuana.

38 Ngkai reiakina te taetae ni kaikonaki i aon te kai ae te biiku—Ngkana a raa mwangana, ao e moanna ni kariki baana, ko ataia bwa e a kaan tain te kabuebue;

39 Ai aroia naba, ake I rineia, ngkana a na noori bwaai aikai ni kabane, a na ataia bwa e a kaan roko, i bon rarikin mataroa;

40 Ni kaineti ma te bong arei, ao te aoa, akea ae e taia; akea, a aki ataia ana anera te Atua i karawa, ma tii Tamau.

41 Ma n aron are n ana bong Noa, ai bon arona naba n rokon Natin te Aomata;

42 Bwa e na bon titebo aroia, ma aron boong ake i mwaain te ieka; bwa ni karokoa te bong are e rin iai Noa i nanon te ake a bon amwamwarake ao a momoi, a mareaki ao a anga nako n te mare;

43 Ao a aki ataia ni karokoa e roko te ieka, ao e bane ni uotia nako; ai bon aron naba rokon Natin te Aomata.

44 Ngkanne e na kakoroaki nanon are e koreaki, bwa ni boong aika kaitira, uoman a na mena n te tawaana, temanna e na uotaki nako, ao are temanna e na katukaki.

45 Uoman a na ii n te atibu n ii, temanna e na uotaki nako, ao are temanna e na katukaki.

46 Ao te bwai are I taekinna nakon temanna, I taekinna nakoia aomata ni kabane; ngaia are, tarataraia, bwa kam aki ata te aoa are e na roko iai te Uea.

47 Ma ata aio, ngkana mataniwin te auti e a kaman ata te tei are e na roko iai te tia ira, e na kaman tarataraia, ao e na bon aki kariaia ana auti bwa e na uruakaki, ma e na kaman katauroia.

48 Ngaia are kam na tauraoi naba, bwa n te aoa are kam taku i nanomi bwa e na aki, e na roko Natin te Aomata.

49 Antai, ngkanne, te toro ae kakaonimaki ma ni wanawana, ae na karikia ana uea bwa e na tautaeka i aoia kaain batana, n anganiia kanaia n taina ae riai?

50 E na kakabwaiaaki te toro anne are ana uea, ngkana e roko, e na kunea ni karaoa aei; ao e koaua ae I taekinna nakoimi, e na karikia bwa te mataniwi i aon ana bwai ni kabane.

51 Ma ngkana te toro ae buakaka anne e na kangai i nanona: E kairemwea rokona au Uea,

52 Ao e na moanna ni batiboia raona n toro, ao n amwarake ao ni moi ma ake a manging,

53 Ana uea te toro anne e na roko n te bong are e aki kaantaningaia iai, ao n te aoa are e aki ataia.

54 Ao e na rangi ni korakora katuaeana, ao n anganna tibwangana irarikiia bwaritaio; ike iai te tang ma te kangengei wii iai.

55 Ao n te aro aio e a roko tokiia ake a buakaka, ni kaineti ma ana taeka ni burabeti Mote, are kangai: A na kaokoroaki mai buakoia aomata; ma tokin te aonaba e tuai moa n roko, ma e a kaan.