Joseph Smith—Mathais

1 Vim kuv hais rau nej tias, txij no mus nej yuav tsis pom kuv lawm thiab paub hais tias kuv yog tus uas cov yaj saub sau txog, kom txog hnub nej yuav hais tias: Tus uas los nrog tus Tswv lub npe, nyob hauv cov huab saum ntuj, thiab tag nrho cov tim tswv dawb huv nrog nws, tus ntawd tau koob hmoov. Tom qab ntawd nws cov thwj tim to taub hais tias nws yuav rov qab los dua rau hauv lub ntiaj teb, tom qab nws tau yeeb koob thiab ntoo meej mom nyob ntawm Vajtswv sab xis.

2 Thiab Yexus tawm mus, thiab tawm ntawm lub tuam tsev mus; thiab nws cov thwj tim txawm los rau nws, vim lawv xav mloog nws hais, lawv hais tias: Xib Hwb, qhia rau peb ntsig txog txoj kev txhim tsa lub tuam tsev, vim koj tau hais tias—lawv yuav raug muab ua vau tag, thiab tseg tsis muaj neeg nyob haud.

3 Thiab Yexus hais rau lawv tias: Puas yog nej tsis pom tag nrho tej no, thiab puas yog nej tsis to taub txog tej no? Kuv hais tseeb rau nej tias, yuav tsis tshuav ib lub pob zeb dhos ib lub, nyob saum lub tuam tsev no, uas yuav tsis vau tag.

4 Ces Yexus txawm ncaim lawv, thiab mus rau saum Roob Txiv Ntoo Roj lawm. Thiab thaum nws nyob pem lub Roob Txiv Ntoo Roj, cov thwj tim los cuag nws twj ywm, hais tias: Qhia peb thaum twg mam li muaj tej uas koj tau hais ntsig txog txoj kev puas tsuaj ntawm lub tuam tsev, thiab cov Neeg Yudais; thiab saib dab tsi yog lub cim ntawm koj txoj kev los, thiab qhov kawg ntawm lub ntiaj teb, los yog txoj kev puas tsuaj ntawm cov phem, uas yog qhov kawg ntiaj teb?

5 Yexus teb, thiab hais rau lawv tias: Ceev faj tsis pub kom leej twg dag ntxias tau nej;

6 Vim yuav muaj ntau leej los ntawm kuv lub npe, hais tias—Kuv yog Khetos—thiab yuav dag ntxias ntau leej;

7 Thaum ntawd lawv yuav coj nej mus tsim txom, thiab yuav muab nej tua pov tseg, thiab txhua haiv neeg yuav ntxub nej, vim yog kuv lub npe;

8 Thiab thaum ntawd yuav muaj ntau leej tso kev ntseeg tseg, thiab ib leeg yuav ntxeev siab rau ib leeg, thiab ib leeg yuav ntxub ib leeg;

9 Thiab yuav muaj cov yaj saub cuav coob leej, thiab yuav dag ntxias coob leej yuam kev;

10 Thiab vim kev ua phem yuav muaj ntau ntau, coob leej txoj kev hlub yuav tu zuj zus;

11 Tiam sis tus uas yuav nyob khov kho thiab kev phem kov tsis yeej, tus ntawd yuav txais kev cawm dim.

12 Yog li ntawd, thaum nej pom tej kev qias ntawm txoj kev puas tsuaj, uas tus yaj saub Daniyees hais, ntsig txog txoj kev puas tsuaj ntawm Yeluxalees, thaum ntawd nej yuav tsum sawv hauv qhov chaw dawb huv; tus uas nyeem tej no cia li to taub.

13 Thaum ntawd cia cov neeg uas nyob hauv Yudais khiav mus rau pem tej roob;

14 Cia tus uas nyob saum ruv tsev khiav, thiab tsis txhob rov mus nqa ib yam dab tsi tawm hauv nws lub tsev;

15 Thiab txhob cia tus uas nyob tom teb rov mus nqa nws tej khaub ncaws;

16 Thiab kev txom nyem raug cov uas xeeb me nyuam, thiab rau cov uas muaj me nyuam mos noj mis, nyob rau lub sij hawm ntawd;

17 Yog li ntawd, nej cia li thov tus Tswv kom nej tsis txhob khiav thaum lub caij ntuj no, los yog khiav rau Hnub Caiv;

18 Vim lub sij hawm ntawd, cov Neeg Yudais yuav raug txom nyem heev, thiab rau cov neeg nyob hauv Yeluxalees, tej uas yav tas los Vajtswv yeej tsis tau xa los rau Ixayees dua li, txij thaum chiv keeb ntawm lawv lub nceeg vaj los txog lub sij hawm no; yeej tsis tau muaj, thiab yuav tsis rov qab xa dua los rau Ixayees.

19 Txhua yam uas lawv raug ntshe tsuas yog qhov pib ntawm tej kev tu siab uas yuav los rau lawv xwb.

20 Thiab tsuas yog muab tej hnub tej nyoog ntawd txiav kom luv xwb, tsis li ces yuav tsis muaj ib tug neeg dim li; tiam sis rau cov uas tau xaiv tseg lawm, raws li txoj kev khi lus, yuav ua kom tej hnub nyoog ntawd luv tuaj.

21 Saib seb, kuv tau hais tej no ntsig txog cov Neeg Yudais rau nej; thiab ntxiv, tom qab tej kev txom nyem thaum lub sij hawm ntawd uas yuav los rau Yeluxalees, yog leej twg hais rau nej hais tias, Xyuas seb, tus Khetos nyob ntawm no, los sis hais tias nyob tod, tsis txhob ntseeg nws;

22 Vim lub sij hawm ntawd kuj yuav muaj tej Khetos cuav, thiab tej yaj saub cuav, thiab yuav ua tej txuj ci loj thiab tej txuj ci uas xav tsis thoob, npaum li uas, yog ua tau, lawv yuav dag ntxias kiag cov uas tau xaiv tseg lawm, cov uas tau xaiv tseg raws li txoj kev khi lus.

23 Saib seb, kuv hais tej yam no rau nej kom pab cov uas tau xaiv tseg lawm; thiab nej kuj yuav hnov txog kev ua rog thiab lus paj lus cua txog tej kev ua rog; tiam sis nej tsis txhob nyuaj siab, vim tag nrho tej uas kuv tau qhia rau nej yeej yuav tsum muaj los; tiam sis qhov kawg tseem tsis tau txog.

24 Saib seb, kuv twb qhia rau nej ua ntej lawm;

25 Yog li ntawd, yog lawv hais rau nej tias: Saib seb, nws nyob tom roob moj sab qhua; nej tsis txhob mus saib: Saib seb, nws nyob hauv tej chav zais ntsiag to; nej tsis txhob ntseeg;

26 Rau qhov zoo li lub teeb tuaj thaum sawv ntxov ci tim sab hnub tuaj, thiab ci mus txog ntua sab hnub poob, thiab thoob plaws lub ntiaj teb tag nrho, ces hnub Neeg Leej Tub los yuav zoo ib yam li ntawd.

27 Thiab nim no kuv qhia ib zaj lus piv txwv rau nej. Saib seb, lub cev neeg tuag nyob qhov twg, dav npoj yuav sau nthwv los rau qhov ntawd; ces zoo ib yam li ntawd kuv cov neeg uas tau xaiv tseg lawm yuav sau nthwv tim plaub ceg kaum ntuj los ua ke.

28 Thiab lawv yuav hnov txog kev ua rog thiab lus paj lus cua txog tej kev ua rog.

29 Saib seb kuv hais lus kom pab kuv cov neeg uas tau xaiv tseg lawm; vim ib haiv neeg yuav sawv tawm tsam ib haiv neeg, thiab nceeg vaj tawm tsam nceeg vaj; yuav muaj tej kev tshaib nqhis, thiab tej kab mob phem, thiab tej av qeeg, hauv ntau qhov chaw.

30 Thiab ntxiv, vim kev ua phem yuav muaj ntau ntau, neeg txoj kev hlub yuav tu zuj zus; tiam sis tus uas niag dab phem kov tsis yeej, tus ntawd yuav txais kev cawm dim.

31 Thiab ntxiv, yuav tshaj tawm txoj Moo Zoo ntawm lub Nceeg Vaj no mus thoob ntiaj teb, ua tim khawv rau txhua haiv neeg, thaum ntawd qhov kawg yuav los, los sis txoj kev puas tsuaj ntawm cov neeg phem;

32 Thiab ntxiv tej kev qias ntawm txoj kev puas tsuaj, uas tus yaj saub Daniyees tau hais, yuav muaj raws li ntawd.

33 Thiab tom qab kiag tej kev txom nyem ntawm lub sij hawm ntawd, lub hnub yuav tsaus nti, lub hli yuav tsis ci, cov hnub qub saum ntuj yuav poob los, thiab txhua yam muaj hwj chim nyob saum nruab ntug yuav ua zog koog.

34 Kuv qhia tseeb rau nej tias, cov neeg tiam no, uas yuav muab tej yam no rau pom, yuav tuag tsis tau tas, mus txog thaum muaj raws li tag nrho tej uas kuv tau qhia rau nej tso.

35 Txawm hais tias, lub sij hawm yuav los, uas lub ntuj thiab lub ntiaj teb yuav dhau mus; txawm li los kuv tej lus yuav tsis dhau mus, tiam sis yuav muaj raws li hais txhua lo.

36 Thiab, ib yam li kuv twb hais lawm, tom qab tej kev txom nyem lub sij hawm ntawd, thiab txhua yam muaj hwj chim nyob saum nruab ntug yuav ua zog koog, thaum ntawd nej yuav pom lub cim tshwm saum nruab ntug qhia tias Neeg Leej Tub yuav los, ces thaum ntawd txhua haiv neeg hauv ntiaj teb no yuav quaj ntsuag qees; ces lawv yuav pom Neeg Leej Tub los saum ntuj los, nrog hwj chim thiab yeeb koob loj;

37 Thiab tus uas khaws kuv txoj lus cia, yuav tsis raug dag ntxias, vim Neeg Leej Tub yuav los, thiab nws yuav txib nws cov tim tswv ntawm nws xub ntiag los tshuab tej raj hlau nrov nrov, thiab lawv yuav mus sau cov tseem tshuav ntawm nws cov neeg uas tau xaiv tseg lawm los ntawm plaub ceg kaum ntuj, ntawm ib sab ntuj mus txog lwm sab, los ua ke.

38 Nim no kawm ib zaj lus piv txwv txog tsob ntoo cev—Thaum tsob ntoo cev tej ceg tseem mos, thiab pib hlav nplooj tuaj, nej paub hais tias twb yuav txog lub caij ntuj sov lawm;

39 Ib yam nkaus li ntawd, kuv cov neeg uas tau xaiv tseg lawm, thaum lawv pom tag nrho tej yam no, lawv yuav paub hais tias Neeg Leej Tub twb ze lawm, twb txog ntawm taw rooj lawm;

40 Tiam sis hnub ntawd, thiab lub sij hawm ntawd, tsis muaj leej twg paub; txawm yog Vajtswv cov tim tswv ceeb tsheej los twb tsis paub, tsuas yog kuv Txiv tib leeg xwb.

41 Tiam sis zoo ib yam li thaum Nau-as ua neej nyob, nws kuj yuav zoo li ntawd thiab thaum Neeg Leej Tub los;

42 Vim yuav zoo li ntawd rau lawv, ib yam li lub sij hawm ua ntej dej nyab lub ntiaj teb; sawv daws ua noj ua haus, muab neeg sib txis thiab sib yuav, mus txog hnub uas Nau-as nce mus rau hauv lub nkoj;

43 Thiab lawv tsis paub txog thaum dej los nyab thiab thiab kuav lawv mus tas huv tib si li cas, ces thaum Neeg Leej Tub los yuav zoo ib yam li ntawd.

44 Thaum ntawd yuav muaj raws li tau sau cia tias, nyob rau hnub nyoog kawg, muaj ob tug txiv neej ua hauj lwm ua ke tom teb, yuav coj ib tug mus, thiab tseg ib tug cia;

45 Muaj ob tug zom zeb ua ke, yuav coj ib tug mus, thiab tseg ib tug cia;

46 Thiab kuv hais dab tsi rau ib tug, ces kuv hais rau sawv daws; yog li ntawd cia li xyuas, rau qhov nej tsis paub lub sij hawm nej tus Tswv yuav los.

47 Tiam sis paub li no, yog tus tswv tsev zoo xub paub hais tias thaum twg tub sab yuav tuaj, nws yeej yuav zov tos tsis pub tub sab tsoo los tau rau hauv nws tsev, tiam sis yuav npaj txhij tos.

48 Yog li ntawd nej yuav tsum npaj kom txhij tos thiab, rau qhov thaum lub sij hawm zoo li ntawd uas nej tsis xav txog, Neeg Leej Tub yuav los.

49 Yog li ntawd, leej twg yog tus tub qhe rau siab ntseeg thiab muaj tswv yim, tus uas nws tus tswv yuav tsa ua tus kav tus tswv tsev neeg, thaum txog sij hawm noj, nws yuav ua tus faib zaub faib mov rau lawv noj?

50 Tus tub qhe uas thaum nws tus tswv los es tseem pom nws ua tej hauj lwm no, tus ntawd yuav tau koob hmoov; thiab kuv hais tseeb rau nej tias, tus tswv yuav muab nws ua tus kav tag nrho tej uas tus tswv muaj.

51 Tiam sis yog tus tub qhe muaj siab phem ntawd hais nyob hauv nws lub siab tias: Kuv tus tswv ncua nws txoj kev los,

52 Thiab txawm pib muab nws cov tub qhe ntaus, thiab mus nrog cov neeg qaug cawv noj haus ua ke,

53 Tus tub qhe ntawd tus tswv yuav los lub sij hawm uas nws tsis ceev faj tos tus tswv, thiab los lub sij hawm uas nws tsis paub,

54 Thiab yuav muab tus tub qhe ntawd hlais ua tej daim, thiab muab nws pov mus nrog cov neeg siab dag nyob; yuav muaj kev quaj thiab kev tom hniav qees.

55 Thiab qhov kawg ntawm cov neeg phem los zoo li ntawd, raws li tej uas Mauxes qhia tias yuav muaj los yav tom ntej, hais tias: Lawv yuav raug muab txiav tawm ntawm cov neeg mus; tiam sis tseem tsis tau txog qhov kawg ntawm lub ntiaj teb, tiam sis tshuav tsis ntev.