1 Im ālikin men kein Irooj ar kōnono n̄an Moses, im ba: Lo, Ij kwaļo̧k n̄an eok kōn lan̄ in, im laļ in; jeje naan ko me Ij kōnono. N̄aij Jinoin im Jem̧ļo̧kin, Anij Ekajoor Bōtata; jān Nejū Iaar Make Keotake Iaar kōm̧anm̧ani men kein; aaet, ilo jinoin Iaar kōm̧anm̧an lan̄ eo, im laļ eo me ioon kwōj jutak.

2 Im laļ eaar ejjeļo̧k jekjekin, im ejjeļo̧k kobban; im Iaar kōm̧m̧an bwe marok en itok ioon mejān m̧wilaļ ko; im Aō Jetōb eaar em̧m̧akūt ioon mejān dān ko; bwe N̄aij Anij.

3 Im N̄a, Anij, iaar ba: En wōr meram; im eaar wōr meram.

4 Im N̄a, Anij Iaar lo meram eo; im bwe meram eo eaar em̧m̧an. Im N̄a, Anij, Iaar ajeje meram eo jān marok eo.

5 Im N̄a, Anij, Iaar ņa etan meram eo Raan; im marok eo, Iaar ņa etan Bon̄; im men in Iaar kōm̧m̧ane jān naan eo in Aō kajoor, im eaar waļo̧k āinwōt Iaar ba; im jo̧teen eo im jibbon̄ōn eo rekar raan eo kein kajuon.

6 Im bar juon alen, N̄a, Anij, Iaar ba: En wōr juon mejatoto ilubwiljin dān eo, im ekar āindein, em̧ool āinwōt Iaar kōnono; im Iaar ba: En ajej dān ko jān dān ko; im eaar waļo̧k;

7 Im N̄a, Anij, Iaar kōm̧m̧an mejatoto eo im ajeji dān ko, aaet, dān ko reļļap ium̧win mejatoto eo jān dān ko me rekar itulōn̄in mejatoto eo, im ekar āindein em̧ool āinwōt Iaar kōnono.

8 Im N̄a, Anij, Iaar ņa etan mejatoto eo Lan̄; im jo̧teen eo im jibbon̄ōn eo rekar raan eo kein karuo.

9 Im N̄a, Anij, Iaar ba: Dān ko ium̧win lan̄ ren kuktok ippān doon n̄an juon jikin, im ekar āindein; im N̄a, Anij, Iaar ba: En wōr āne em̧ōrā; im ekar āindein.

10 Im N̄a, Anij, Iaar ņa etan āne em̧ōrā Aelōn̄; im kuktok ippān doon an dān ko, Iaar ņa etan Lo̧jet; im N̄a, Anij, Iaar lo bwe aolep men kein me Iaar kōm̧m̧ani rekar em̧m̧an.

11 Im N̄a, Anij, Iaar ba: Laļ en jebar kōn ujooj, mar en kwaļo̧k ine, wōjke in kalle en kwaļo̧k leen, ālikin jekjek eo an, im wōjke in kalle eo, eo ineen aikuj in pād ioon laļ, im ekar āindein em̧ool āinwōt Iaar kōnono.

12 Im laļ ar kōjebar ujooj, aolep mar ar kwaļo̧k ine ilo̧kan jekjek eo an, im wōjke in kalle, eo ineen eaikuj in pād ilo e make, ilo̧kan jekjek eo an; im N̄a, Anij, Iaar lo bwe aolep men ko me Iaar kōm̧m̧ani rekar em̧m̧an;

13 Im jo̧teen eo im jibbon̄ōn eo rekar raan eo kein kajilu.

14 Im N̄a, Anij, Iaar ba: En wōr meram ko ilo mejatoto in lan̄ eo, n̄an ajeje raan eo jān bon̄ eo, im er ren n̄an kakōļļe ko, im n̄an tōre ko, im n̄an raan ko, im n̄an iiō ko;

15 Im er ren n̄an meram ko ilo mejatoto in lan̄ eo n̄an leļo̧k meram ioon laļ; im ekar āindein.

16 Im N̄a, Anij, Iaar kōm̧m̧ane ruo meram ko reļļap; meram eo eļapļo̧k n̄an peek raan eo, im meram eo edikļo̧k n̄an peek bon̄, im meram eo eļapļo̧k eaar al, im meram eo edikļo̧k eaar allōn̄; im iju ko barāinwōt rekar kōm̧m̧an em̧ool ekkar n̄an Aō innaan.

17 Im N̄a, Anij, Iaar likūt er ilo mejatoto in lan̄ eo n̄an leļo̧k meram ioon laļ,

18 Im aļ n̄an pepe ioon raan eo, im allōn̄ n̄an pepe ioon bon̄, im n̄an ajeje meram eo jān marok eo; im N̄a, Anij, Iaar lo bwe aolep men ko me Iaar kōm̧m̧ani rekar em̧m̧an;

19 Im jo̧teen eo im jibbon̄ōn eo rekar raan eo kein kāāmen.

20 Im N̄a, Anij, Iaar ba: Dān ko ren jebartok kōn kanooj ļap mennin mour m̧akūtkūt ko ewōr aer mour, im bao in mejatoto eo emaron̄ ekkāke ilōn̄in laļ ilo peļļo̧k eo in mejatoto in lan̄.

21 Im N̄a, Anij, Iaar kōm̧anm̧ani raj eļap ko, im aolep mennin mour ej m̧akūtkūt, ko dān ko rekar jebartok ilo kanooj ļap, ilo̧kan jekjek ko aer, im aolep bao ewōr pein ilo̧kan jekjek eo an; im N̄a, Anij, Iaar lo bwe aolep men ko Iaar kōm̧anm̧ani rekar em̧m̧an.

22 Im N̄a, Anij, Iaar kōjeraam̧m̧an er, im ba: Kom̧in timoon, im wōrļo̧k, im koobrak dān ko ilo lo̧jet; im bao ko ren wōrļo̧k ilo laļ;

23 Im jo̧teen eo im jibbon̄ōn eo rekar raan eo kein kaļalem.

24 Im N̄a, Anij, Iaar ba: Laļ en jebartok mennin mour eo ilo̧kan jekjek eo an, kattle, im mennin tōbalbal ko, im mennin mour in laļ ilo̧kan jekjek eo an, im ekar āindein;

25 Im N̄a, Anij, Iaar kōm̧m̧ani mennin mour ko in laļ ilo̧kan jekjek ko aer, im kattle ilo̧kan jekjek ko aer, im men otemjej ko rej tōbalbal ioon laļ ilo̧kan jekjek eo an; im N̄a, Anij, iaar lo bwe aolep men kein rekar em̧m̧an.

26 Im N̄a, Anij, Iaar ba n̄an Nejū Iaar Make Keotake, eo Eaar pād Ippa jān jinoin: Jen kōm̧m̧an armej ilo nememeed, ilo wōt jekjekid; im ekar āindein. Im N̄a, Anij, Iaar ba: Armej ren irooj ioon ek in lo̧jet, im ioon bao in mejatoto, im ioon kattle ko, im ioon aolepān laļ, im ioon mennin tōbalbal otemjej ej tōbalbal ioon laļ.

27 Im N̄a, Anij, Iaar kōm̧anm̧an armej ilo wōt Nemāmeō, ilo nememen Nejū Iaar Make Keotake Iaar kōm̧anm̧an e; m̧aan im kōrā Iaar kōm̧anm̧an er.

28 Im N̄a, Anij, Iaar kōjeraam̧m̧ane er, im ba n̄an er: Kom̧in timoon, im wōrļo̧k, im koobrak laļ, im kajoor jān e, im irooj ioon ek in lo̧jet, im ioon bao in mejatoto, im ioon mennin mour otemjej rej m̧akūtkūt ioon laļ.

29 Im N̄a, Anij, Iaar ba n̄an armej: Lo, Iaar lewōj n̄an kom̧ mar otemjeļo̧k ej jebar kōn ine, eo ej pād ioon mejān aolepān laļ, im aolep wōjke eo me enaaj wōjke in kwaļo̧k ine; n̄an kom̧ enaaj n̄an m̧ōn̄ā.

30 Im n̄an aolep mennin mour in laļ, im n̄an aolep bao in mejatoto, im n̄an aolep men otemjej ej tōbalbal ioon laļ, ijo Ij leļo̧k mour, ijo naaj leļo̧k mar erreo otemjej n̄an m̧ōn̄ā; im ekar āindein, em̧ool āinwōt Iaar kōnono.

31 Im N̄a, Anij, Iaar lo bwe men otemjej Iaar kōm̧m̧ane, im, lo, aolep men ko otemjeļo̧k Iaar kōm̧m̧ani rekar kanooj em̧m̧an; im jo̧teen eo im jibbon̄ōn eo rekar raan eo kein kajiljino.