1 Na ɔbaa dɛ Ewuradze kasaa kyerɛɛ Moses, see dɛ: Hwɛ, meda ndzɛmba a ɔfa sor yi, nye dɛm asaase yi edzi kyerɛ wo; kyerɛw nsɛm a merekã yi. Emi nye Ahyɛse na Ewiei no, Otumfo Nyankopɔn no; menam nyia me Woo no Kortoo no no do na mobɔɔ ndzɛmba yinom; nyew, ahyɛse no mobɔɔ sor, nye asaase a igyina do yi.

2 Na asaase da hɔ hun eso pan; na memaa isum bɛkataa bun enyi; na mo Sunsum twuuw faa nsu no enyi; osiandɛ meyɛ Nyame.

3 Na Emi, Nyankopɔn, see dɛ: Ekan mbra; na ekan bae.

4 Na Emi, Nyankopɔn, hun kan no; nna dɛm kan no oye. Na Emi, Nyankopɔn, tseew kan fii sum no ho.

5 Na Emi, Nyankopɔn, frɛɛ ekan no Adzekyee; na isum no, mefrɛɛ no Adzesaa; na menam m’asɛm no tum do yɛɛ iyi, na ɔyɛɛ dɛm ber a mekasaa no; na ewimbir no nye anapa no yɛ da a odzi kan.

6 Na bio, Emi, Nyankopɔn, see dɛ: Wɔmma wimu mbra nsu no finimfin, na ɔyɛɛ hɔ, dɛm ber a mekasae mpo; na mesee dɛ: Wɔmma esu no ntsew no ho mfi esu no ho; na ɔyɛɛ hɔ dɛm;

7 Na Emi, Nyankopɔn, yɛɛ wimu no na metseew esu no mu, nyew, esu akɛse no a ɔhyɛ wimu no ase no fii esu a ɔwɔ wimu no sor, na ɔyɛɛ hɔ dɛ mbrɛ mekãe no mpo.

8 Na Emi, Nyankopɔn, frɛɛ wimu no Ɔsor; na ewimbir no nye anapa no yɛ da a otsia ebien.

9 Na Emi, Nyankopɔn, see dɛ: Wɔmma esu a ɔwɔ ɔsor n’ase no ɔmpra nkɔboa fakor, na ɔyɛɛ dɛm; na Emi, Nyankopɔn, see dɛ: Wɔmma wewewdo nyi noho; na ɔyɛɛ dɛm.

10 Na Emi, Nyankopɔn, frɛɛ wewewdo no Asaase; na esu no mboano no, mefrɛɛ no Epo; Na Emi, Nyankopɔn, hun dɛ ndzɛmba nyinara a mayɛ no oye.

11 Na Emi, Nyankopɔn, see dɛ: Wɔmma asaase mfifir efuw, nhaban a ɔsow aba, ndua a ɔsow eduaba dɛ mbrɛ no su tse; na dua a ɔsow, dza ɔwɔ n’aba wɔ no mu wɔ asaase no do, na ɔyɛɛ hɔ dɛm mpo ber a mekasae no.

12 Na asaase fifiir efuw, haban biara a ɔsow aba dɛ mbrɛ no su tse, na dua ɔsow eduaba, dza ɔwɔ n’aba wɔ no mu, dɛ mbrɛ no su tse; na Emi, Nyankopɔn, hun dɛ ndzɛmba nyinara a mayɛ no oye;

13 Na ewimbir no nye anapa no yɛ da a otsia ebiasa.

14 Na Emi, Nyankopɔn, see dɛ: Nkandzea mbra ɔsor wimu no mu, mbeyi adzekyee mfi adzesaa ho, na ɔnyɛ nsɛnkyerɛdze, na ɔnyɛ hyɛber nye nda nye mfe;

15 Na wɔnyɛ nkandzea wɔ ɔsor wimu no mu ma ɔnhyerɛn asaase do; na ɔyɛɛ hɔ dɛm.

16 Na Emi, Nyankopɔn, yɛɛ nkandzea akɛse ebien; kandzea kɛse no dɛ ɔnhwɛ adzekyee do, na kandzea kakraba no dɛ ɔnhwɛ adzesaa do, na kandzea kɛse no nye ewia, na kandzea kakraba no nye bosoom, na wɔyɛɛ nworaba so dɛ mbrɛ m’asɛm se mpo.

17 Na Emi, Nyankopɔn, dze hɔn sisii ɔsor wimu no mu dɛ wɔnhyerɛn asaase do,

18 Dɛ ewia nhwɛ adzekyee do, na bosoom nhwɛ adzesaa do, na onyi kan mfi sum ho; na Emi, Nyankopɔn, hun dɛ ndzɛmba nyinara a mayɛ no oye;

19 Na ewimbir no nye anapa no yɛ da a otsia anan.

20 Na Emi, Nyankopɔn, see dɛ: Wɔmma esu no ndɔ mbowa a wɔkekã hɔnho a nkwa wɔ hɔn mu menyamenya, na ntumbowa nkyin asaase do wɔ ɔsor wi enyi.

21 Na Emi, Nyankopɔn, bɔɔ esumbowa akɛse, na esu mbowa a nkwa wɔ hɔn mu a wɔkekã hɔnho a esu no dɔɔ hɔn menyamenya, dɛ mbrɛ hɔn su tsetsee, na ntumbowa nyinara dɛ mbrɛ hɔn su tsetsee, na Emi, Nyankopɔn, hun dɛ ndzɛmba nyinara a mayɛ no oye.

22 Na Emi, Nyankopɔn, hyiraa hɔn se dɛ: Hom nwo, na wɔndɔr, na wɔnhyɛ po mu esu mu mã; na ntumbowa ndɔr wɔ asaase do;

23 Na ewimbir no nye anapa no yɛ da a otsia enum.

24 Na Emi, Nyankopɔn, see dɛ: Wɔmma asaase nwo mbowa a nkwa wɔ hɔn mu dɛ mbrɛ hɔn su tsetsee, anantwi, na mbowa a wɔtsen nye asaase mbowadoma dɛ mbrɛ hɔn su tsetsee, na ɔyɛɛ dɛm;

25 Na Emi, Nyankopɔn, yɛɛ asaase mbowadoma dɛ mbrɛ hɔn su tsetsee, na anantwi dɛ mbrɛ hɔn su tsetsee, na mbowa a wɔtsen famu nyinara dɛ mbrɛ hɔn su tsetsee; na Emi, Nyankopɔn, hun dɛ dɛm ndzɛmba yinom nyina oye.

26 Na Emi, Nyankopɔn, see nyia me Woo no Kortoo no no a ɔnye me wɔ hɔ fi ahyɛse no dɛ: Wɔmma yɛnyɛ nyimpa wɔ hɛn su do wɔ hɛn saso do; na ɔyɛɛ hɔ dɛm. Na Emi, Nyankopɔn, see dɛ: Ma wonya tum wɔ po mu nam do, nye wimu ntumbowa do, nye anantwi do, nye asaase nyinara, nye nketsebowa a wɔtsen asaase do nyinara do.

27 Na Emi, Nyankopɔn, bɔɔ nyimpa wɔ mankasa mo su do, wɔ nyia me Woo no Kortoo no no no su do na mobɔɔ no; ɔbanyin nye ɔbaa na mobɔɔ hɔn.

28 Na Emi, Nyankopɔn, hyiraa hɔn na mesee hɔn dɛ: Hom nwo na wɔndɔr, na wɔnhyɛ asaase mã, na wɔnhom do, na hom nnya tum wɔ po mu nam do, nye wimu ntumbowa do, nye biribiara a nkwa wɔ hɔn mu a wɔkekã hɔnho wɔ asaase do nyinara do.

29 Na Emi, Nyankopɔn, see nyimpa dɛ: Hwɛ maama hom ahaban biara a ɔsow aba a ɔwɔ asaase nyinara enyi, nye ndua biara a ɔsow eduaba a n’aba wɔ no mu; ɔnyɛ edziban mma hom.

30 Na asaase mbowadoma biara, nye wimu ntumbowa biara, nye adze biara a ɔtsen wɔ asaase do a maama no nkwa, na mfunoma biara a ho tsew no wondzi; na ɔyɛɛ dɛm, ber a mekaẽ no mpo.

31 Na Emi, Nyankopɔn, hun adze biara a mayɛ, na hwɛ, ndzɛmba nyinara a mayɛ no oye papa; na adzesaa nye adzekyee yɛ da a otsĩa esia.