Adzesua Mboa horow
Nyame, Nyametsir

Nyame, Nyametsir

Nyimpa ankorankor baasa na wɔwɔ Nyametsir no mu: Nyankopɔn, Onnyiewiei Egya no; Ne Ba, Jesus Christ; nye Sunsum Krɔnkrɔn no. Yɛgye Hɔn mu kor biara dzi (G ho N 1:1). Yesũa fi nda a odzi ekyir nyikyerɛ mu dɛ Egya na Ɔba no wɔ honam na mbiew nyimpadua na dɛ Sunsum Krɔnkrɔn no yɛ sunsum nyimpa-su, onnyi honam na mbiew (N&A 130:22–23). Nyimpa baasa yi yɛ kor wɔ koryɛ a odzi mu mu, wɔ botae na nkyerɛkyerɛ a ɔsaa nyina mu (John 17:21–23; 2 Ne. 31:21; 3 Ne. 11:27, 36).

Nyame Egya

Sɛ yɛkã Egya, anaa Elohim a nna ɔyɛ Nyankopɔn Ne dzin. Wɔfrɛ No Egya osiandɛ ɔyɛ hɛn esunsum egya (Nka. 16:22; 27:16; Mal. 2:10; Matt. 6:9; Eph. 4:6; Heb. 12:9). Nyame Egya yɛ wiadze nyina ne hempɔn. Ɔwɔ tum nyina (Gen. 18:14; Alma 26:35; N&A 19:1–3), Onyim adze nyina (Matt. 6:8; 2 Ne. 2:24), na ɔnam No Sunsum do wɔ mbea nyina (Ndw. 139:7–12; N&A 88:7–13, 41). Adasa nye Nyankopɔn wɔ nkitaho soronko bi dzi a ɔma oyi nyimpa fi abɔdze nkaa no mu dze si nkyɛn: mbanyin na mbaa yɛ Nyankopɔn No sunsum mba (Ndw. 82:6; 1 Jn. 3:1–3; N&A 20:17–18).

Nkyerɛwee kumaabi na ɔwɔ hɔ a ɔkyerɛ dɛ Nyame Egya no eyi Noho edzi akyerɛ nyimpa anaa Ɔrekasa kyerɛ nyimpa. Kyerɛwsɛm kã dɛ Ɔkasaa kyerɛɛ Adam na Eve (Moses 4:14–31) na Oyii Jesus Christ kyerɛɛ mpɛn pii (Matt. 3:17; 17:5; John 12:28–29; 3 Ne. 11:3–7). Oyii noho kyerɛɛ Stephen (Ndwu. 7:55–56) na Joseph Smith (JS—Aba 1:17). Ekyir no Oyii noho kyerɛɛ Joseph Smith na Sidney Rigdon (N&A 76:20, 23). Hɔn a wɔdɔ Nyankopɔn na wɔtsew hɔnho wɔ N’enyim no, ɔtɔ mber bi a Nyankopɔn ma hɔn kwan ma wohu No na hɔnankasa wɔgye to mu dɛ Ɔyɛ Nyame (Matt. 5:8; 3 Ne. 12:8; N&A 76:116–118; 93:1).

Nyame Ɔba no

Nyankopɔn a wonyim no dɛ Ɔyɛ Jehovah no nye Jesus Christ Ɔba no, (Isa. 12:2; 43:11; 49:26; 1 Cor. 10:1–4; 1 Tim. 1:1; Nyi. 1:8; 2 Ne. 22:2). Jesus dzi dwuma wɔ Egya no Ne kwankyerɛ do na Ɔnye No adwen saa. Adasa nyinara yɛ N’enuanom mbanyin na nkyerɛbaa, osiandɛ Ɔno nye Elohim, N’esunsum mba no hɔn mu panyin. Kyerɛwsɛm binom kyerɛ dɛ kasafua Nyankopɔn no gyina hɔ ma Ɔno. Mfatoho bi nye dɛ kyerɛwsɛm no kã dɛ “Nyankopɔn bɔɔ sor nye asaase” (Gen. 1:1), mbom Jesus nye Bɔadze no na Nyame Egya no na Ɔkyerɛɛ no kwan a Ɔmfa do nyɛ (John 1:1–3, 10, 14; Heb. 1:1–2).

Nyame Sunsum Krɔnkrɔn no

Sunsum Krɔnkrɔn no so yɛ Nyame na wɔfrɛ no Sunsum Krɔnkrɔn, Sunsum no, na Nyankopɔn no Sunsum, ɔkã edzin na abɔdzin a ɔtsetse dɛm binom ho. Nyimpa nam Sunsum Krɔnkrɔn no mboa do tum hu Nyame Egya ne pɛ na ohu dɛ Jesus nye Christ no (1 Cor. 12:3).