Elijah

Ahyɛmu Dadaw mu nkɔnhyɛnyi bi a ɔsaan n’ekyir wɔ nda a odzi ekyir no mu dze nsɔwano tum nsaafee brɛɛ Joseph Smith na Oliver Cowdery. N’aber do no, Elijah yɛɛ no somdwuma no wɔ Israel Ahenman a ɔwɔ Etsifi no mu (1 Ahem. 17–22; 2 Ahem. 1–2). Onyaa gyedzi kɛse wɔ Ewuradze mu na ɔyɛɛ anwanwadze pii. N’ebisadze ho ntsi Nyame siiw kwan ma nsu anntɔ mfe ebiasa-na-fã mu. Onyaan aberantsɛba bi fii ewufo mu na ɔfrɛɛ ogya fi sor bae (1 Ahem. 17–18). Jewfo da ho rotweɔn Elijah ma ɔasan aba, dɛ mbrɛ Malachi hyɛɛ nkɔm dɛ ɔbɛba no (Mal. 4:5). Jewfo Apaho Afe biara mu no, hɔn enyi da no kwan dɛ ɔbɛba dɛ ɔhɔho, ntsi wobue abow na wogya egua pan to hɔ ma no aber biara.

Nkɔnhyɛnyi Joseph Smith see dɛ Elijah na okitsa Melchizedek Asɔfodzi nsɔwano tum no na ɔno nye nkɔnhyɛnyi a odzi ewiei a obekitsa ansaana Jesus Christ ne ber aso. Ɔnye Moses puee wɔ Nsakyeree Bepɔw no do na ɔdze asɔfodzi nsaafee no maa Peter, James na John, (Matt. 17:3). Ɔnye Moses na binom so puee Kirtland Temple a ɔwɔ Ohio mu Ebɔwbira 3, 1836 na ɔdze dɛm nsaafee no maa Joseph Smith na Oliver Cowdery (N&A 110:13–16). Iyi nyinara wɔdze reyɛ mboaboaho ama Ewuradze Ne Mbae a Otsĩa Ebien no, dɛ mbrɛ wɔakã ho asɛm wɔ Malachi 4:5–6 no.

Elijah no tum no nye asɔfodzi nsɔwano tum no a wɔnam do kyekyer anaa wosian ndzɛmba wɔ asaase do anaa wɔkyekyer na wosian wɔ ɔsor no (N&A 128:8–18). Ewuradze no nkowaa a wɔwɔ asaase do ndɛ so wɔ dɛm nsɔwano tum yi na wɔdze asɛmpa no nkwagye ayɛdze ma atseasefo nye ewufo (N&A 128:8).