Ebususɛm, Ebususɛm ne Kã

Erekã kasa a ɔnnyɛ enyidzi anaa obu nnyi mu wɔ Nyame anaa ndzɛmba a ɔyɛ krɔnkrɔn ho.

Jewfo no bɔɔ Jesus sombo mpɛn pii dɛ Ɔkã ebususɛm osiandɛ Ɔkã dɛ otum dze bɔn kyɛ (Matt. 9:2–3; Luke 5:20–21), osiandɛ Ɔfrɛɛ Noho Nyankopɔn Ba (John 10:22–36; 19:7), na osiandɛ Ɔkãa dɛ wobohu No dɛ Ɔtse tum abanyimfa, na Ɔreba wɔ sor nsuwusiw do (Matt. 26:64–65). Sɛ dza Ɔkãe nyina no nntse dɛm a, nkyɛ dɛm sombo yinom nyina bɛyɛ nokwar. Sombo a adasetorfo no bɛgyee ho dase dze tsiaa No wɔ Sanhedrinfo enyim (Matt. 26:59–61) no nye ebususɛm a Ɔkã dze tsia temple no. Ebususɛm a otsia Sunsum Krɔnkrɔn no, dza ɔma epow Christ wɔ ber a enya No ho nyimdzee a odzi mu ekyir no, yɛ bɔn a wɔnnkɛfa akyɛ (Matt. 12:31–32; Mark 3:28–29; N&A 132:27).