John ne Nyikyerɛ

Nwoma a odzi ewiei wɔ Ahyɛmu Fofor no mu, nyikyerɛ a wɔdze maa John Ɔsomafo no wɔ mu. Wɔmaa no kwan ma ohun wiadze n’abakɔsɛm, nkanka mber a odzi ewiei no (Nyi. 1:1–2; 1 Ne. 14:18–27; N&A 77). John ne Nyikyerɛ no so wɔfrɛ no Apocalypse.

John nyaa dɛm nyikyerɛ yi wɔ Ewuradze ne da no mu wɔ Patmos esupruw no do (Nyi. 1:9–10), wɔ Asia mpoano, bea a ɔbɛn Ephesus. Da pɔkyee a onyaa nyikyerɛ no wonnyim.

Nsaafee a wodua do dze tse nwoma no ase no, wɔdze akã 1 Nephi 14:18–27 na Nkyerɛkyerɛ na Ahyɛmudzi 77 (Ether 4:15–16) ho.

Etsir 1–3 no yɛ nwoma no ne nyienyim na nkrataa a wɔkyerɛwee kɛmaa nsɔr esuon a wɔwɔ Asia. John kyerɛɛw nkrataa no dɛ ɔdze rokɔboa Ahotseweefo no ma woeesiesie nsɛm bi. Etsir 4–5 no kã enyido-adzehu bi a John hunii a ɔkyerɛ Nyankopɔn nye Christ hɔn ahentum na tseneneeyɛ tum ho asɛm. Etsir 6–9, 11 mu no, John kyerɛɛw nwoma a ohunii a wɔdze nsɔwano esuon asɔw ano, nsɔwano kor biara gyina hɔ ma wiadze ne mfe apem a ɔwɔ mu mber tsiabaa mu no ho abakɔsɛm. Dɛm etsir yinom hyɛ ase kã ndzɛmba a ɔwɔ nsɔwano esuon no mu ho asɛm (hwɛ Nyi. 8–9; 11:1–15). Tsir 10 kã nwoma no a John dzii no ho asɛm. Nwoma no gyina hɔ ma dwuma a obedzi no ndaamba no. Tsir 12 kã bɔn ho enyido-adzehu no a ɔhyɛɛ ase wɔ sor aber a Satan tseew etua na wɔpaam no no ho asɛm. Wɔsɔw ɔkõ a wɔhyɛɛ ase wɔ hɔ no do wɔ asaase do. Etsir 13, 17–19 no, John kãa asaase do emumuyɛ ahenman no a Satan hwɛ do na ɔkyerɛɛw dza ɔbɛba hɔn do ndaama, nye ber a wɔbɛsɛɛ bɔn korakora ho asɛm. Etsir 14–16 no kã Ahotseweefo no ndzeyɛtsenenee wɔ bɔn finimfin wɔ ber a aka kumaabi ma Christ Ne Mbae a Otsĩa Ebien no aso no ho asɛm. Etsir 20–22 no kã Mfe Apem, kuropɔn fɛɛfɛw Jerusalem Fofor no, nye dza odzi wiadze abakɔsɛm ewiei ho asɛm.