Samuel, Ahyɛmu Dadaw mu Nkɔnhyɛnyi
Elkanah na Hannah hɔn babanyin, ɔnam ne nã ne mpaabɔ ho mbuae do na wɔwoo no (1 Samuel 1). Ɔyɛ abofra no wɔdze no hyɛɛ Eli, sɔfopanyin a ɔwɔ ntamadan a ɔwɔ Shiloh hɔ no ne nsa dɛ ɔntsetse no (1 Sam. 2:11; 3:1). Ewuradze frɛɛ Samuel ber a ɔyɛ abofra no dɛ ɔmbɛyɛ nkɔnhyɛnyi (1 Sam. 3). Eli wui ekyir no, Samuel bɛyɛɛ nkɔnhyɛnyi na ɔtsɛmbuafo kɛse wɔ Israel na ɔsanee dze mbra, nhyehyɛɛ, na dabaa nyamesom som baa asaase no do (1 Sam. 4:15–18; 7:3–17).
1 Sam. 28:5–20 yɛ ber a ɔbaa bayifo a ofi Endor maa Samuel fii ewufo mu bae osian Ɔhen Saul n’ebisadze ntsi. Iyi nnkotum ayɛ enyido-adzehu a ofi Nyankopɔn, osiandɛ ɔbaa bayifo anaa sunsum mu ntamugyinafo nnkotum ahyɛ nkɔnhyɛnyi do ma oeyi noho akyerɛ wɔ n’ebisadze ho.
Samuel nwoma 1 na 2
Bible binom mu no Samuel nwoma 1 na 2 no yɛ nwoma kor. Binom so mu nwoma no yɛ ebien. Nsɛm a ɔwɔ nwoma no mu no twa mfe bɛyɛ 130, fi Samuel n’awoo do dze kesi ber a nna aka kakra ma Ɔhen David ewu no.
Samuel nwoma 1
Etsir 1–3 no kyerɛ dɛ Ewuradze dze ndom kãa Eli n’ebusua na ɔtsẽaa hɔn na ɔfrɛɛ Samuel yɛɛ no ɔsɔfopanyin na ɔtsɛmbuafo. Etsir 4–6 no kã mbrɛ ahyɛmudzi adaka no sii kedzii Philistiafo nsamu. Etsir 7–8 no kã Samuel no kɔkɔbɔ a ɔdze bɔɔ nkorɔfo no dɛ wɔwɔ enyame atorfo na ɔhen mumuyɛnyi noho asɛm. Etsir 9–15 no kã mbrɛ osii hyɛɛ Saul ɔhen na n’ahendzi. Etsir 16–31 no kã abakɔsɛm a ɔfa David ho na mbrɛ osii nyaa tum—Samuel seraa David a oekum Goliath no ngo. Saul kyiir David, mbom David poow dɛ oboku Saul ber a onyaa kwan dɛ oku no no.
Samuel nwoma 2
Nwoma no kã David a ɔyɛ Judahhen na afei ɔbɛyɛɛ Israel nyina hen no n’ahendzi ho nsɛm. Etsir 1–4 no kyerɛ aperdzi a ɔkyɛree ara yie wɔ David n’akãdofo na Saul n’akãdofo ntamu ber a Judahfo hyɛɛ David ɔhen no ekyir no ho. Etsir 5–10 no kyerɛ dɛ David ebenya tum kɛse wɔ asaase pii do. Etsir 11–21 mu no kyerɛ dɛ David kɔr famu wɔ sunsum mu osian no bɔn nye etuatsew a ɔbaa nankasa n’ebusua mu ntsi. Etsir 22–24 no kã dɛ David bɔɔ mbɔdzen dɛ ɔnye Ewuradze bɔbɔ mu.