Melchizedek Asɔfodzi

Melchizedek Asɔfodzi no yɛ asɔfodzi a ɔkrɔn anaadɛ ɔsõ kɛse, Aaron Asɔfodzi no yɛ asɔfodzi kuma. Melchizedek Asɔfodzi no Asɔr no sunsum mu nhyira ne nsaafee no kã ho. Ɔnam asɔfodzi a ɔkrɔn no n’ayɛdze do na ɔda nyamesu no tum no edzi kyerɛ nyimpa (N&A 84:18–25; 107:18–21).

Nyankopɔn dzii kan daa asɔfodzi a ɔkrɔn yi edzi kyerɛɛ Adam. Patriarchfo na nkɔnhyɛfo a wɔbɔsoɛr mberano biara no nyaa tumdzi yi (N&A 84:6–17). Ahyɛse no wɔfrɛɛ no Asɔfodzi Krɔnkrɔn wɔ Nyankopɔn ne Ba ne nhyehyɛɛ do. Ekyir no na wɔfrɛɛ no Melchizedek Asɔfodzi (N&A 107:2–4).

Ber a Israelmba ammbɔ bra a ɔfata Melchizedek Asɔfodzi ne ndzinoa na ahyɛmudzi no, Ewuradze faa mbra no a ɔkrɔn no kɔree na ɔmaa hɔn asɔfodzi kumaa na mbra kumabaa (N&A 84:23–26). Iyinom na wɔfrɛɛ no Aaron Asɔfodzi na Moses mbra no. Ber a Jesus baa asaase do no, Ɔdze Melchizedek Asɔfodzi no sanee brɛɛ Jewfo no na Ɔhyɛɛ ase dɛ ɔrekyekyer Asɔr no wɔ hɔn mu. Eso asɔfodzi no nye Asɔr no yeew bio osiandɛ wɔyeew hɔn gyedzi asehwe ntsi. Ekyir no ɔnam Joseph Smith Kakraba do ma wɔasan dze aba (N&A 27:12–13; 128:20; JS—Aba 1:73).

Melchizedek Asɔfodzi no mu na elder, ɔsɔfopanyin, patriarch, Eduosuon, na Ɔsomafo dzibew no wɔ (N&A 107). Melchizedek Asɔfodzi no bɛkã Nyankopɔn n’ahenman a ɔwɔ asaase do ne fã bi ho daa.

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President no nye ne president wɔ asɔfodzi a ɔkrɔn anaa Melchizedek Asɔfodzi, na okitsa Nyankopɔn n’ahenman no a ɔwɔ asaase do no ne nsaafee nyina. President ɔfrɛ no wɔdze ma nyimpa kor ma okura wɔ aber kor mu, na ɔno nko nye nyimpa a ɔwɔ asaase do a ɔwɔ tumdzi dɛ ɔdze asɔfodzi ne nsaafee nyina dzi dwuma (N&A 107:64–67; 132:7).