Nyimpa-su ahorow ebien na wɔwɔ sor hɔ a wɔfrɛ hɔn abɔfo: hɔn a wɔyɛ esunsum na hɔn so a wɔwɔ nyimpadua a ɔyɛ honam na mbiew. Abɔfo a wɔyɛ esunsum no da ho ara nnyaa nyimpadua a ɔyɛ honam na mbiew, anaadɛ wɔyɛ esunsum a nna wɔwɔ nyimpadua na wɔrotweɔn owusoɛr. Abɔfo a wɔwɔ nyimpadua a ɔyɛ honam na mbiew no yɛ hɔn a wɔasoɛr efi owu mu anaa wɔasakyer hɔn a wɔannsɔ owu annhwɛ no.
Wɔakã abɔfo hɔn dwumadzi ho nsɛm pii wɔ kyerɛwsɛm mu. Ɔto mber bi a abɔfo dze ndze a ɔtse dɛ sor robobɔmu kã Nyame ne nsɛm (Mosiah 27:11–16). Wotum frɛ atseneneefo a wɔwɔ asaase do so abɔfo (JSN, Gen. 19:15 [Ntaekyir Nwoma]). Abɔfo binom etwa Nyame n’ahengua ho ehyia wɔ sor na wɔsom no (Alma 36:22).
Kyerɛwsɛm no so kã abɔnsam n’abɔfoe ho nsɛm. Woyinom nye esunsum no a wɔkãa Lucifer do na wɔpaam hɔn fii Nyame n’enyim na wɔtoow hɔn kyeen asaase do wɔ ber a nna yennyaa mmbaa asaase do no (Nyi. 12:1–9; 2 Ne. 9:9, 16; N&A 29:36–37).