Baal

Ewia-bosomnyin bi a nna wɔsom no tsitsir ara wɔ Phoenicia (1 Ahem. 16:31) na wɔsom no so wɔ akwan horow do wɔ mbea horow do: Moabfo frɛ no Baal-peor (Nka. 25:1–3), Shechemfo frɛ no Baal-berith (Atsɛ. 8:33; 9:4), Ekronfo frɛ no Baal-zebub (2 Ahem. 1:2). Ɔbɛyɛ dɛ Baal kor noara so nye Bel a ɔwɔ Babylon na Zeus a ɔwɔ Greece no. Kasafua Baal kyerɛ nkitahodzi a ɔda owura na n’akowaa ntamu. Asɛnkyerɛdze a nna wɔtaa dze gyina hɔ ma Baal nye nantwinyin. Ashtoreth yɛ enyameber a wɔtaa som no kã Baal ho.

Nna ɔto mber bi a wɔdze dzin anaa kasafua bi bata Baal ho dze kyerɛ nkitaho a ɔnye Baal dzi, biribi tse dɛ bea a wɔsoom no wɔ anaa nyimpa bi no su a ɔtse dɛ Baal dze no. Ɔnam dɛ ekyir no Baal n’asekyerɛ bɛyɛɛ biribi a omuo kɛse ntsi, wɔdze kasafua Bosheth hyɛɛ edzin nyina a wɔdze kã noho no ananmu. Bosheth n’asekyerɛ nye “enyimguase”.