Jude

Dza ɔwɔ nwoma yi mu no nye krataa bi a Jude kyerɛwee dze kɛmaa Ahotseweefo binom a nna hɔn gyedzi mu reyɛ mberɛw no. Binom a wɔakã dɛ wɔyɛ Christianfo na mbom woridzi hɔn a wɔyɛ abosonsɔrfo hɔn ehuhusom ekyir na wɔse dɛ wɔama hɔn kwan dɛ mma wonndzi ahosan mbra no do no na wɔrema wɔreyɛ mberɛw no. Jude pɛɛ dɛ okenyan Ahotseweefo no ma wohu hɔn sunsum mu mbusu a wɔwɔ mu no na ɔhyɛ hɔn nkuran ma wɔkɔ do tsena dɛ anokwafo.

Nsɛm bi a ɔwɔ Jude nwoma no mu a ɔsɛ dɛ wɔhyɛ no nsew nye nyiyimu 6, dza ɔkã ɔkõ a osii sor nye Lucifer na n’abɔfoe a wɔtoow hɔn fii sor kyenee wɔ dɛm asetsena ansaana yɛreba asaase no ho asɛm no (Abr. 3:26–28), nye nyiyimu 14–15, dza ɔkã nkɔnhyɛ a Enoch hyɛe ho asɛm no.