Ezra
Ahyɛmu Dadaw aber do ɔsɔfo na ɔkyerɛwfo a ɔdze Jewfo hɔn mu binom fii Babylon ndɔmmum mu sanee baa Jerusalem (Ezra 7–10; Neh. 8; 12). Afe 458 mu ansaana wɔrobɔwo Christ no, ɔserɛɛ kwan fii Artaxerxes, Persia ɔhen no hɔ, dɛ ɔdze Jewfo ndɔmmumfo no a wɔpɛ dɛ wɔkɔ Jerusalem no bɔkɔ (Ezra 7:12–26).
Ansaana Ezra bɛba no nna asɔfo nko na wɔwɔ tum dɛ wɔkenkan kyerɛwsɛm a wɔakyerɛw a wɔfrɛ no “mbra” no. Ezra boae ma Jewnyi biara ne nsa kãa kyerɛwsɛm no bi. Wɔmaa ho kwan ma obiara tumii kenkaan “mbra nwoma no” na nkakra nkakran otsimii wɔ Jewfo hɔn abrabɔ mu. Ɔbɛyɛ dɛ Ezra ne nkyerɛkyerɛ ne kɛse fi nankasa a osiesiee n’akoma mu dɛ ɔbɔhwehwɛ Ewuradze ne mbra no, na oedzi do, na ɔdze akyerɛkyerɛ binom so (Ezra 7:10).
Ezra nwoma
Etsir 1–6 kã dza osisii fi mfe eduosia dze kesi mfe eduowɔtwe ansaana Ezra reba Jerusalem—Ɔmom a Cyrus yɛe wɔ afe 537 mu Ansaana wɔrobɔwo Christ nye Jewfo a wɔnye Zerubbabel sanee bae no ho. Etsir 7–10 kyerɛ mbrɛ osii ma Ezra kɔr Jerusalem. Ɔno na no dɔm no, kyee kɔm na wɔbɔɔ mpaa dze serɛɛ bambɔ. Wodur Jerusalem no wohun Jewfo pii wɔ hɔ a nna wɔnye Zerubbabel akɔ hɔ dada nna wɔawarwar mbaa a wɔnnyɛ ahyɛmudzi nkorɔfo, dɛm ntsi nna woegu hɔnho fĩ. Ezra bɔɔ mpaa maa hɔn na ɔnye hɔn hyɛɛ ahyɛmudzi ase dɛ wongyaa dɛm yernom no. Ezra n’abakɔsɛm a odzi ekyir no wobohu no wɔ Nehemiah nwoma no mu.