Temple, Ewuradze ne Fie

N’asekyerɛ ara nye Ewuradze ne fie. Aber nyina mu no Ewuradze ahyɛ No nkorɔfo dɛ wonsisi temple, adan krɔnkrɔn a Ahotseweefo a wodzi mu no bedzi dwuma na wɔayɛ asɛmpa n’ayɛdze krɔnkrɔn wɔ mu dze ama hɔnho na wɔdze ama ewufo. Ewuradze sera Ne temple, na wɔyɛ ɔsom mbea nyina mu krɔnkrɔn mapã.

Ntamadan a Moses nye Israelmba sii no yɛ temple a wɔsoa. Ɔno na Israelfo dze dzii dwuma ber a wotuii fii Egypt no.

Temple a ɔbɛyɛɛ atsenkã a wɔbɔɔ dzin wɔ Ahyɛmu Dadaw mu no nye dza Solomon sii wɔ Jerusalem no (2 Mber. 2–5). Babylonfo sɛɛ no wɔ afe 587 mu Ansaana Wɔrobɔwo Christ. Bɛyɛ mfe 70 ekyir no na Zerubbabel sanee sii no bio (Ezra 1–6). Temple yi ne fã beebi hyewee wɔ afe 37 mu Ansaana Wɔrobɔwo Christ, na ekyir no Herod Okokroko no sanee sii no bio. Romefo no sɛɛ temple no Christ N’Awoo Ekyir afe 70 mu.

Mormon Nwoma mu no, Nyankopɔn n’akãdofo atseneneefo no wogya hɔn dɛ wonsisi temple na wonsom wɔ mu (2 Ne. 5:16; Mosiah 1:18; 3 Ne. 11:1). Worisi temple na wɔrosom wɔ mu yie no yɛ nokwar Asɔr nsɛnkyɛrɛdze wɔ mberano biara mu, Asɔr a wɔasan dze aba wɔ hɛn aber yi mu so kã ho. Kirtland Temple nye temple a odzi kan a wosii na wotui hyɛɛ Ewuradze ne nsa wɔ mberano yi mu. Ofi dɛm aber no woetu temple pii dze ahyɛ Ewuradze nsa wɔ nsaase pii do wɔ wiadze nyina mu.